استانادا اقىن, جازۋشى, دراماتۋرگ, كورنەكتى مەملەكەت قايراتكەرى ساكەن سەيفۋللين تۇرعان ءۇي تابىلدى.
جانگەلدين كوشەسى, 29/2 مەكەنجايىندا ورنالاسقان ۇيدە (بۇرىنعى مەكەنجايى – لەسنايا كوشەسى, 65) 1916 جىلى قازاقتىڭ داۋىلپاز اقىنى, جازۋشى, 1920-1925 جىلدارى حالىق كوميسسارلارى كەڭەسىنىڭ توراعاسى (قازىرگىشە – پرەمەر-مينيستر) قىزمەتىن اتقارعان ساكەن سەيفۋللين تۇرعان ەكەن. قازىر ول جەردە ساكەندى قاشىپ جۇرگەندە پانالاتقان ءابىلدا بەلجانوۆ دەگەن كىسىنىڭ بالالارى تۇرادى. ول 1889 جىلى قازىرگى قاراعاندى وبلىسىنىڭ نۇرا اۋدانىندا تۋىپ, 1970 جىلى تسەلينوگراد قالاسىندا قايتىس بولعان. وسى كىسى ءۇيدى 1916 جىلى رەسەيدىڭ ىشكى وڭىرىنەن كەلگەن ءبىر ادامنان ساتىپ العان ەكەن. بۇرىن ساكەن تۇرعان ءۇي كىشكەنتاي بولعان كورىنەدى. ال 1964 جىلى قايتا سالىنعاننان كەيىن كەڭەيگەن.
قازىر ءابىلدا بەلجانوۆتىڭ ءتورت بالاسى بار ەكەن. ەكى بالاسى قايتقان. 1946 جىلى تۋعان بەكەن بەلجانوۆ 1994 جىلى قايتىس بولسا, 1953 جىلى دۇنيەگە كەلگەن جۇماعۇل بەلجانوۆ 2004 جىلى فانيدەن باقيعا اتتانعان. ال بۇگىندە ءتورت بالاسىنىڭ ۇشەۋى استانادا تۇرادى. ۇلكەنى – ساكەن بەلجانوۆ 1939 جىلى تۋعان. ونىڭ اتىن ءابىلدا بەلجانوۆ ساكەن سەيفۋلليننىڭ قۇرمەتىنە قويعان ەكەن. ودان كەيىنگى ورتانشىسى – جۇماباي بەلجانوۆ 1950 جىلعى, ءباتيما بەلجانوۆا 1955 جىلعى. ال كىشى قىزى كۇلجاميلا بەلجانوۆا 1958 جىلى تۋعان. قازىر ول كىسى الماتىدا.
وسى كىسىلەرمەن سويلەسىپ, جۇماباي اعا ماعان اكەسىنىڭ اڭگىمەسىن ايتتى. ونىڭ اكەسى ءۇيدى 1916 جىلى ساتىپ العاندا كوپ ادام ساكەندى ۇيگە كىرگىزۋگە قورىققان ەكەن. سودان اكەسى ساكەندى ۇستاتپاۋ ءۇشىن ۇيگە كىرگىزىپ, ءبىر بولمەسىن بەرگەن كورىنەدى.
«ءبىزدىڭ كوكەمىز سەيفۋللينمەن جاقسى قارىم-قاتىناستا بولدى. ەكەۋى سىيلاسىپ, ءبىر-ءبىرىنىڭ قاس-قاباعىنا قاراپ تۇردى. كوكەم ساكەندى ماقتاپ وتىراتىن. بالا كەزىمىزدە ول تۋرالى كوپ اڭگىمە ايتاتىن. حالقىنا جاناشىر, باۋىرمال, ەلىنىڭ قامىن ويلاپ جۇرەتىن سىمباتتى ازامات بولاتىن دەيتىن. سودان كەيىن ساكەن كوكەمە «وسى ۇيدە بىرنەشە اي تۇردىم. سىزدەرگە كەسىرىم تيمەسىن دەپ باسقا جاقتى ىزدەيىن» دەگەنىندە كوكەم ءوزىنىڭ قارىنداسى ءامينا جازىلبەكقىزىنىڭ ۇيىنە اپارعان. سول ۇيدە ول 3 اي تۇردى. ودان كەيىن ساكەن كوكشەتاۋعا كەتىپ, ۇستالدى. بۇرىن ول ءۇي قازاق كوشەسىندە ورنالاسقان ەدى. قازىرگى مەكەنجايى – سەيفۋللين مەن ايمانوۆ كوشەلەرىنىڭ قيىلىسىندا, بۇرىنعى «پوجاركانىڭ» بەر جاعىندا بولاتىن. بىراق قازىر ونىڭ ورنى جوق. ىسىرىلىپ كەتكەن» دەيدى جۇماباي اعا.
ونىڭ ايتۋىنشا, قازىر ساكەن سەيفۋللين تۇرعان جەردە ءۇيدىڭ سىرتىنداعى شارباقتار عانا قالىپتى.
داستان كەنجالين, جۋرناليست
