استانا اكىمدىگى جانىنان قالالىق دامۋ اكسەلەراتورى قۇرىلۋدا. بۇل – قالالىق iKomek مونيتورينگ جانە جەدەل ارەكەت ەتۋ ورتالىعىنىڭ بازاسىندا قۇرىلاتىن جاڭا جۇمىس توبى.
ەلوردا تۇرعىندارى «109» جەدەل جەلىسىنە قالاداعى ءتۇرلى ماسەلە بويىنشا ءوز وتىنىشتەرى مەن ۇسىنىستارىن, شاعىمدارىن تاۋلىك بويى جولداپ, اتالمىش سەرۆيستى بەلسەندى تۇردە پايدالانۋدا. iKomek ورتالىعى ارقىلى استانالىقتار بيىلعى 11 اي ىشىندە 793 مىڭنان اسا ءوتىنىش-تىلەكتەرىن ايتىپ, ماسەلە كوتەرسە, ونىڭ 99 پايىزى وڭ شەشىمىن تاپقان.
قالالىق دامۋ اكسەلەراتورىنىڭ قۇرامىنا اكىمدىك قىزمەتكەرلەرى مەن قوعامدىق بىرلەستىك وكىلدەرى, ساراپشىلار, عالىمدار, كاسىپكەرلەر, بەلسەندى تۇرعىندار كىرىپ, جۇمىس توبىنا شاھار باسشىسى مەن ونىڭ ورىنباسارلارى جەتەكشىلىك ەتەدى. بۇل جۇمىس توبىن قۇرۋداعى ماقسات – از ۋاقىت ىشىندە, ياعني ۇزاعانى 100 كۇندە قالاداعى كوپتەگەن تۇيتكىلدىڭ ءتۇيىنىن شەشۋ. جالپى, دامۋ اكسەلەراتورىنىڭ مىندەتى – ماسەلەنى شەشۋمەن قاتار, دامۋدىڭ ستراتەگيالىق كورسەتكىشتەرىنە دە قول جەتكىزۋ.
مۇنداي دامۋ اكسەلەراتورى وسىعان دەيىن دۋباي قالاسىندا مەملەكەتتىك دەڭگەيدە جۇمىس جۇرگىزىپ, قىسقا مەرزىم ىشىندە جوعارى جەتىستىكتەرگە قول جەتكىزىپتى. اتاپ ايتقاندا, 60 كۇن ىشىندە ەڭ قاۋىپتى بەس جولعا وزگەرىس ەنگىزىلىپ, ناتيجەسىندە 24 ادامنىڭ ءومىرى قۇتقارىلىپ, مەملەكەتتىك بيۋدجەتتىڭ 63 پايىزىنىڭ ۇنەمدەلۋىنە اسەر ەتكەن. سونىمەن قاتار 100 كۇن ىشىندە قارجى سەكتورىندا مىڭنان اسا جۇمىس ورنى اشىلىپ, Emirates Global Aluminium زاۋىتىنىڭ شىعىندارى 16 پايىزعا كەمىگەن دەسەدى. بۇل تاجىريبە ەندى استانادا جۇزەگە اسىرىلماق.
