Paris-2024 پاراليمپيادا ويىندارىنا 100 كۇن قالۋىنا وراي ەلوردادا ۆولەيبولدى وتىرىپ ويناۋدان ۇلتتىق قۇراما مەن برازيليا اراسىندا جولداستىق ماتچ ۇيىمداستىرىلدى. اتالعان ءىس-شارا «حان-شاتىر» ويىن-ساۋىق ورتالىعىندا ءوتىپ, ويىندى ەلوردالىقتار كەڭىنەن تاماشالادى.
– ويىن وتە كەرەمەت ءوتتى. اسىرەسە, قازاقستان ءۇشىن قولداۋ ءبىلدىرۋ ۇلكەن ماقتانىش. بۇل سپورت تۇرىمەن 2017 جىلدان بەرى اينالىسامىن. استانادا وتكەن ازيادا-2023 جارىسىنا قاتىسقانمىن. قازاقستان بۇگىن جەڭەدى دەگەن ويدامىن. سپورتشىلار ارقاشان دودالاردا باق سىناپ جۇرەدى. مەنىڭ ءتىپتى ولاردىڭ جەڭەتىنىنە ەشقانداي كۇمانىم جوق, – دەدى جانكۇيەر گۇلجامال سۇلتانبەكوۆا.
ەسكە سالساق, 1 ءساۋىر كۇنى پاراليمپيادا سپورتشىلارى ۇلتتىق كومانداعا 11 ليتسەنزيا قانجىعالادى. الدا بولاتىن جارىسقا سپورتشىلارىمىزدىڭ دايىندىعى قىزۋ ءجۇرىپ جاتىر.
– العاش رەت برازيليا قۇراماسى قازاقستانعا وقۋ-جاتتىعۋ جيىنىنا كەلىپ جاتىر. وقۋ-جاتتىعۋ جيىنى – پاريجدە وتەتىن پاراليمپيادا الدىنداعى دايىندىق. كوماندا مىقتى. رەيتينگتە ءبىز 6-ورىنمەن تۇرساق, ولار 2-ءشى تۇرعان توپ. سپورتتا وڭاي نارسە جوق. بۇگىنگى ويىن شوتى تەڭبە-تەڭ كەلە جاتىر. قازىر وقۋ-جاتتىعۋ شارالارىمەن ءجۇرمىز, – دەپ اتاپ ءوتتى كوماندا سپورتشىسى بەرىك امانقوسۇلى.
قۇراما ماۋسىم ايىندا امەريكا قۇراما شتاتتارىنا وقۋ-جاتتىعۋ جيىنىنا بارسا, شىلدەدە گوللانديادا وتەتىن تۋرنيردە ەلىمىزدىڭ نامىسىن قورعاماق. حالىقارالىق تۋرنيردە پاراليمپياداعا قاتىساتىن 8 كوماندانىڭ 7-ەۋى بولادى. باپكەر دايىندىقتى ءساتتى جۇرگىزۋدە.
– بىلتىر گوللانديادا وتكەن جارىستا بۇل كوماندانى ۇتقانبىز. ءدال وسى شوتپەن بۇگىن قايتالاپ وتىرمىز. نەگىزگى ماقسات – پاراليمپيادادا بيىكتەن كورىنۋ. جۇمىس بەلسەندى اتقارىلىپ جاتىر. بۇگىنگى ءىس-شارانى ۇيىمداستىرعان دەمەۋشىلەرگە العىسىمىزدى بىلدىرەمىز. ولار قازاقستاندا سپورتتى كوپ دامىتۋعا ۇلەس قوسۋدا, – دەدى وتىرىپ ويناۋ ۆولەيبولىنان قر قۇراما كومانداسىنىڭ باس جاتتىقتىرۋشىسى باۋىرجان تاحاۋوۆ.
جولداستىق ماتچتا 3:1 ەسەبىمەن قازاقستان ۇلتتىق قۇراماسى جەڭىستى ەنشىلەدى. الداعى پاراليمپيادا ويىنى 28 تامىز بەن 8 قىركۇيەك ارالىعىندا وتەدى. دودادا قازاقستان 9 سپورت تۇرىنەن ويىن كورسەتۋدى جوسپارلاپ وتىر. ولار: پارا جەڭىل اتلەتيكا, پارا پاۋەرليفتينگ, پارا تاەكۆوندو, پارا ۇستەل تەننيسى, پارا ءجۇزۋ, پارا دزيۋدو, پارا كانوە, وتىرىپ وينايتىن ۆولەيبول, پارا نىسانا كوزدەۋ.
گۇلناز مۇحانجان, ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى
