ەركەعالي راحماديەۆ اتىنداعى مەملەكەتتىك اكادەميالىق فيلارمونيادا مادەنيەت جانە ونەر قىزمەتكەرلەرى كۇنىندە سالاعا ەڭبەك سىڭىرگەن ونەرپازدار ەلوردا اكىمدىگى اتىنان ماراپاتتالدى.
مادەنيەت سالاسىنداعى قىزمەتكەرلەردى جەمىستى ەڭبەگى ءۇشىن ماراپاتتاۋعا ارنالعان سالتاناتتى جيىنعا استانا قالاسى اكىمىنىڭ ورىنباسارى ەسەت بايكەن مەن قالالىق ءماسليحات توراعاسى ەرلان كاناليموۆ ارنايى قاتىستى. «وركەنيەتتى ۇلت, ەڭ الدىمەن, تاريحىمەن, ونەرىمەن, الەمدىك مادەنيەتتىڭ التىن قورىنا قوسقان ۇلەسىمەن تانىلىپ, باعالانادى. مادەنيەت جانە ونەر مايتالماندارىن قالا اكىمى جەڭىس قاسىمبەكتىڭ اتىنان كاسىبي مەرەكەلەرىمەن قۇتتىقتايمىن! قازىرگى تاڭدا استانادا 46 مادەني مەكەمە جۇمىس ىستەيدى. 5 مىڭعا جۋىق قىزمەتكەر مادەنيەت سالاسىنىڭ دامۋىنا, رۋحاني بايلىعىمىزدىڭ ەسەلەنە تۇسۋىنە ولشەۋسىز ۇلەس قوسۋدا. اينالاسىن دۋمانعا بولەي بىلەتىن سان قىرلى تالانت يەلەرى – رۋحاني جان دۇنيەسى باي, ونەرگە بەرىلگەن ازاماتتار. مەرەكەلەرىڭىز قۇتتى بولسىن! حالىق نازارىنا ۇسىنار تۋىندىلارىڭىز مول بولسىن! سارقىلمايتىن شابىت, ونەر جولىندا شىعارماشىلىق تابىس, شاڭىراقتارىڭىزعا باق-بەرەكە تىلەيمىن!» دەدى ءوز سوزىندە ە.بايكەن.
استانا قالاسى بويىنشا 3 قىزمەتكەرگە قازاقستان رەسپۋبليكاسى مادەنيەت جانە اقپارات ءمينيسترى ايدا بالاەۆانىڭ اتىنان «ەڭبەك ارداگەرى» مەدالى تابىستالسا, 14 قىزمەتكەرگە «مادەنيەت سالاسىنىڭ ۇزدىگى» توسبەلگىسى, 12 قىزمەتكەرگە «قۇرمەت گراموتاسى» جانە 15 قىزمەتكەرگە العىس حات تابىستالدى. 32 قىزمەتكەر استانا قالاسىنىڭ اكىمى جەڭىس قاسىمبەكتىڭ العىس حاتىمەن, 14 قىزمەتكەر استانا قالاسى اكىمىنىڭ ورىنباسارى ەسەت بايكەننىڭ العىس حاتىمەن, 6 قىزمەتكەر استانا قالاسى ءماسليحاتىنىڭ توراعاسى ەرلان كاناليموۆتىڭ العىس حاتىمەن ماراپاتتالدى. «بيىل ءماسليحات دەپۋتاتتارى قالالىق اكىمدىكپەن بىرلەسىپ, مادەنيەت نىساندارىن جوندەۋ مەن سالۋدى, جالاقىنى ارتتىرۋدى, كىتاپحانا جۇيەسىن جاڭعىرتۋدى كوزدەيتىن الداعى 3 جىلعا ارنالعان «مادەنيەت سالاسىن دامىتۋدىڭ كەشەندى جوسپارىن» ازىرلەپ, بەكىتتى. حالىقتىڭ مادەني دامىپ, رۋحاني جاڭعىرۋى باعىتىندا كۇش سالىپ كەلە جاتقان ونەر يەلەرىنە قۇرمەت قاشاندا جوعارى. كاسىبي مەرەكەلەرىڭىزبەن قۇتتىقتاي وتىرىپ, باس قالامىزدىڭ مادەنيەتى مەن ونەرىن ورىستەتۋ, ۇلتتىق مادەني مۇرامىزدى الەمگە تانىتۋ جولىنداعى ەڭبەكتەرىڭىزگە شىعارماشىلىق تابىس تىلەيمىن!» دەدى قالالىق ءماسليحات توراعاسى. مەرەكەلىك جيىن كونتسەرتتىك باعدارلامامەن جالعاسىپ, كەشتە حالىقارالىق بايقاۋلاردىڭ لاۋرەاتتارى التىنبەك ارىستانبەك, اكىمحان ماجەنوۆ, «شالقىما» حالىق بي ءانسامبلى ونەر كورسەتتى.
