بيىل ءوزىنىڭ اسەم داۋىسىن, تۋما تالانتىن, ەرەكشە كوركەمدىگىن كورسەتىپ, تاپ-تازا, ءموپ-ءمولدىر ونەردى پاش ەتىپ جۇرگەن ديماشتىڭ ايى وڭىنان تۋدى. بۇل جىلى جۇلدىزى جارقىراپ, اتى الەمگە ايگىلى بولعان جاس قىران ميللياردتاردى شىن مانىندە مويىنداتتى. جاس بولسا دا مەملەكەتتىك ماسشتابتاعى سالتاناتتى كونتسەرتتەر مەن ءان كەشتەرىنەن كورىنىپ جۇرەتىن تالانت قىتايدىڭ چانشا قالاسىندا وتكەن «I am ا Singer-2017» بايقاۋىندا الەمدى اۋزىنا قاراتتى.
ونەردەگى كەڭىستىكتە شەكارا بولمايدى. وسى بايقاۋدان كەيىن ديماش قۇدايبەرگەننىڭ ەسىمى ەلىنىڭ ابىرويىنا جۇمىس جاساي باستادى. قازاق قاتتى قۋاندى. شابىستى جۇيرىك اتتى سەيىلتەر بەلدەۋدە, جابۋ استىندا تۇرعاندا تانيدى. كوزدەرى كورىپ, كوڭىلدەرىنە تۇيگەنىن الەمدىك دەڭگەيدەگى ونەر مايتالماندارى دا, قازاقتىڭ قابىرعالى قايراتكەرلەرى دە جاسىرىپ قالعان جوق. قازاقستاننىڭ ەڭبەك ەرى ايمان مۇساقوجاەۆا دا «مەن – ءانشىمىن!» دوداسىنىڭ فينالىنا بارىپ, ديماشقا قولداۋ ءبىلدىردى. ونىڭ ەشكىمگە ۇقسامايتىن ەرەكشە داۋىسىنا لارا فابيان مەن اتاقتى دجەكي چاننىڭ ءوزى تاڭداي قاقتى. ءتىپتى, قازاق بالاسى تانىمال گولليۆۋد ءفيلمىنىڭ ساۋندترەگىن دە ورىندادى. وسى جەڭىستىڭ قۇرمەتىنە ديماشتىڭ سۋرەتى شانحاي (Shanghai Bund) جانە نيۋ-يورك قالالارىنداعى (Times Square) LED ەكرانعا شىقتى. مىنە, مىقتىلىق!
مىقتىلىق دەگەننەن شىعادى, ديماش وزگەلەردىڭ ىعىنا جىعىلماي, ءوز ۇلتىنىڭ نامىسىن بيىك ۇستاۋمەن بولدى. قىتايدا تۇرمىن دەمەدى, تەك قازاقشا سويلەدى. قازاقتىڭ ءانىن ايتتى. دومبىرا تارتتى. ۇلتتىق كيىمىن پاش ەتتى. بۇرىن-سوڭدى مۇنداي ماراپاتقا, ىقىلاسقا بولەنگەن ءانشى بولدى ما بىزدە؟
قىتاي ەلىندەگى ەڭ ۇزدىك مۋزىكالىق بايقاۋلاردىڭ ءبىرى, سونداي-اق, «حۋنان تۆ» ارناسىنىڭ ەڭ تانىمال مۋزىكالىق شوۋى سانالاتىن سايىستا ديماش ورتالىق ازيادان قاتىسقان العاشقى ءانشى بولدى. ديماشتىڭ داڭقىن اسقاقتاتقان بۇل بايقاۋدا ول ۇنەمى ۇزدىكتەردىڭ قاتارىنان كورىندى. ديماشتىڭ تاماشا داۋىسى مەن ءاربىر ءانى ءار كەزەڭدى تاماشالاۋعا كەلگەن جانكۇيەرلەردىڭ تاڭدايىن قاقتىردى.
ديماش بۇدان كەيىن «ازيانىڭ ەڭ تانىمال ءانشىسى», «حالىقارالىق دارەجەدەگى تانىمال ءانشى», «جىلدىڭ ەڭ تانىمال ءانشىسى», «جىلدىڭ ۇزدىك ەر ءانشىسى», «ازيانىڭ ەڭ تانىمال شەتەلدىك ءانشىسى» جانە «شەتەلدىڭ ەڭ تانىمال ءانشىسى» جۇلدەلەرىن دە جەڭىپ الدى. ال جاقىندا عانا «Golden mango melody awards» ماراپاتىندا جىلدىڭ ۇزدىك تانىمال ءانشىسى اتاندى. تالاي قازاقتىڭ جۇرەگىن سەلت ەتكىزىپ, كوزىنە قۋانىشتىڭ كوز جاسىن اكەلگەن قارشاداي بالانى جاقسى كورمەي كور سوسىن.
ول ءوزىنىڭ ءناپ-نازىك جۇرەگىنىڭ سىرىن ونەردىڭ مەيرامىنا اينالدىرا ءبىلدى. مىڭنان بىرگە بەرىلگەن, ديماشتىڭ ماڭدايىنا جازىلعان باق بۇل!
بۇل – الەم الدىنداعى قازاقتىڭ جەڭىسى!
گۇلجان راحمان
