2017 جىل كۆن ويىندارىندا 17 جىل بويى ونەر كورسەتىپ جۇرگەن «كازاحي» مەن ولاردىڭ ءىزىن جالعاعان «سپارتا نوماد» كومانداسى ءۇشىن جەمىستى بولدى. ماسكەۋدە وزگە ۇلتتىڭ اراسىندا قازاقى قالجىڭىمەن كوزگە تۇسكەن كوماندالار فينالعا ءتورت رەت ىلىگىپ, ءبىرى جازعى كۋبوكتىڭ جەڭىمپازى اتانسا, ەكىنشىسى – ەكى بىردەي جۇلدە – گولوسياششي كيۆين مەن كۆن جوعارى ليگاسىنىڭ كۋبوك يەگەرى اتاندى.
جارتى عاسىردان استام تاريحى بار كلۋبتىڭ جازعى ماۋسىمى وسى جولى استانادا وتكىزىلىپ, الەمدىك ماڭىزى بار «ەكسپو-2017» حالىقارالىق مامانداندىرىلعان كورمەسىنە تۇسپا-تۇس كەلدى. بۇگىندە ءبىز «كۆن» مەكتەبىنەن شىڭدالىپ شىققان تۇرسىنبەك قاباتوۆ, نۇرلان قويانباەۆ, داۋت شايحيسلاموۆ, گۇلنار سيلباەۆا, ماليك حاسەنوۆ, سانات شاپاشوۆ جانە تاعى ءبىر توپ ويىنشىلاردىڭ جەتكەن جەتىستىكتەرىنە
كۋاگەرمىز. ءبىراز ۋاقىت وتە كەلە ولار قايتادان بىرىگىپ, ساحنا الدىنا شىعىپ, ونەر كورسەتىپ, التىن كۋبوكقا لايىق دەپ تانىلدى. جىگىتتەر «تۋعان جەردىڭ توپىراعى ىستىق» ەكەندىگىن جاسىرمادى. توپتىڭ بەلدى مۇشەسى نۇرلان قويانباەۆتىڭ ايتۋىنشا, قازاققا ءتان جۇمساق ءازىل كوپشىلىكتىڭ كوڭىلىنەن شىقتى. ال توپ مۇشەسى سانات شاپاشوۆ «ءبىز ازىرلەگەن ءار قالجىڭ ساراپقا سالىنىپ, 6 كۇن بويى رەداكتسيالانادى. ەگەر قويىلىمدار تالاپقا ساي بولماسا, ستسەناريدى قايتادان جازامىز. كوبىسى كۆن شوۋ-بيزنەسكە اينالعاندىعىن بىلمەيدى. كوماندادا ويىنشىلاردان بولەك قوسالقى اۆتورلاردىڭ بولۋى – زاڭدىلىق. بىزگە اتاقتى كۆن-شى سانگادجي تارباەۆ كومەكتەستى. سانگادجي قازاققا جيەن, ءتىپتى ماقپال تاتە مەن
تۇرسىنبەك جەرلەس» دەپ
كۆن-نىڭ قىر-سىرىمەن ءبولىستى. قۇراما ويىنشىلارى جازعى كۋبوكتىڭ جەڭىمپازدارىنا بەرىلەتىن 400 مىڭ ءرۋبلدى ناۋقاس نياز سۇندەتاليەۆتىڭ ەسەپشوتىنا اۋداردى. وسىلايشا, نيازدىڭ وزگەگە جاساعان سىيى وزىنە قايتىپ كەلدى.
جىل سوڭىنا قاراي قازاق تاعى قۋاندى. «سپارتا نوماد» قۇراماسى نامىستى قولدان بەرمەي, كوپشىلىكتى تاڭعالدىرىپ قايتتى. ءتىپتى, العاشىندا «راديو سۆوبوداعا» جانكۇيەر بولعان كۆن تىزگىنشىسى الەكساندر ماسلياكوۆ, سوڭىندا «سپارتالىقتاردى» مويىندادى. بۇل تۋرالى توپ كاپيتانى دانيار ءجۇمادىلوۆ «ادەتتە, ءبىرىنشى ورىن ويىندى جاباتىن كومانداعا بەرىلەدى. ءبىز بەس قۇرامانىڭ ىشىندە ەكىنشى بولىپ وينادىق. سوندىقتان ەستە قالۋ وڭاي بولمادى» دەدى. «سپارتالىقتار» ويىندى دا ادەمى اياقتادى. ەڭ سوڭعى سايىستا ولار ءبىر ساحنا تورىندە بارلىق قازاقستاندىق كۆن ويىنشىلارىن جيناپ, بىرگە ونەر كورسەتتى.
1999 جىلدان بەرى قازاقستان قۇراماسى جەڭىسكە ۇمتىلىپ, التىن كۋبوكتى يە-
لەنۋدى ارماندادى. سول سەبەپتى, التىن كۋبوك ەلىمىزدىڭ تاۋەلسىزدىگىنە ارنالدى. بۇل جەڭىس كۇللى قازاقتىڭ جەڭىسى دەپ ءبىلۋ كەرەك.
ايتا كەتەيىك, 3 ميلليونعا جۋىق كورەرمەنى بار كۆن ويىنىنىڭ سوڭعى ەفيرىن بۇگىن «ءبىرىنشى ارنا» تەلەارناسىنان تاماشالاۋعا بولادى.
گۇلدانا تالعاتقىزى
