استانا قالاسىنداعى بالالار ينفەكتسيالىق اۋرۋحاناسىنا مەنينگيت دياگنوزىمەن مەكتەپ جاسىنداعى سەگىز بالا تۇسكەن.
جىل باسىنان بەرى وسى جۇقپالى دەرت ەلدى ءبىراز ابىگەرگە سالدى. جاز ورتاسىنان بەرى ەكپىنى باسىلعان بولىپ ەدى. كۇن سۋىتا قايتا كورىنىس تاپتى. اتالعان اۋرۋحانانىڭ باس دارىگەرى ساۋلە نۇراشەۆانىڭ ايتۋىنشا, قازىر جەتكىنشەكتەردىڭ جاعدايى جاقسارىپ كەلەدى ەكەن.
«اۋرۋحاناداعى ستاتسيونارلىق ەمدەۋدە 8 بالا ەم الىپ جاتىر. ولار بىزگە 5 قازاندا تۇسكەن. قازىر دەنساۋلىقتارى قالىپتى, وزدەرىن جاقسى سەزىنەدى. ون كۇننەن سوڭ قايتادان اناليز الىپ, ءبارى دۇرىس بولسا, اۋرۋحانادان شىعارىپ, امبۋلاتوريالىق باقىلاۋدا ۇستايمىز. بۇل – ۆيرۋستى ينفەكتسيا. ەشقانداي كۇردەلى اسقىنۋ جوق. ءبارى قالىپتى دەڭگەيدە ءوتىپ كەتەدى. بيىل بىزدەن وسىنداي 190-عا جۋىق بالا ەمدەلىپ شىقتى. سوندىقتان اتا-انالارعا قاتتى ۋايىمداپ, ۇرەيلەنۋدىڭ كەرەگى جوق» دەدى باس دارىگەر.
سونداي-اق ول مەنينگيتكە شالدىققان بالالاردىڭ اتا-اناسىنا ونى وزدىگىمەن ەمدەۋگە بولمايتىندىعىن جەتكىزدى. ەگەر ونىڭ العاشقى بەلگىلەرى, مىسالى, باس اۋىرىپ, جۇرەك اينىپ, تەمپەراتۋرا 39 گرادۋسقا دەيىن كوتەرىلگەن جاعدايدا جەتكىنشەكتى تەز ارادا پەدياترعا نەمەسە اتالعان اۋرۋحانانىڭ ستاتسيونارىنا اپارۋ كەرەك.
ايتپاقشى, مەنينگيتپەن اۋرۋحاناعا تۇسكەن بالالار قالاداعى ءارتۇرلى مەكتەپتە وقيدى. سوندىقتان ولارعا ءبىر-بىرىنەن جۇقتى دەگەن دە قيسىنسىز ءسوز.
«بۇل ۆيرۋستى ينفەكتسيا اۋا ارقىلى ادامنان ادامعا جۇعادى. بىلايشا ايتقاندا, جىل سايىن قايتالاناتىن نارسە. ماسەلەن, بيىل مەنينگيتپەن تۇسكەندەر وتكەن جىلعا قاراعاندا كوپ ەمەس. سوندىقتان دۇرلىكپەۋ كەرەك» دەدى ساۋلە نۇراشەۆا.
