16 جەلتوقسان – تاريحى تەرەڭدە جاتقان, ەلدىڭ جاڭا زاماندا ءوز الدىنا قايتا تاۋەلسىز بولعان كۇن, تەڭدەسى جوق مەرەكە. وسىعان وراي, مەرەكە قارساڭىنداعى نۇر-سۇلتان قالاسىنىڭ ەرەكشە كورىنىستەرىن تاماشالاۋدى ۇسىنامىز.
ەلوردا – وتانىمىزدىڭ جۇرەگى, بەيبىت ەلدىڭ باعا جەتپەس بايلىعى. قازاق دەگەن ابىرويلى ەلدىڭ اتاعىن اسقاقتاتا تۇسكەن بيىك قامال – تاۋەلسىزدىكتىڭ سيمۆولى. كۇن وتكەن سايىن كوركەيە تۇسكەن ەلوردامىز بۇگىندە كوز تويماستاي عاجايىپ بەينەگە يە. جانى جايساڭ قازاق حالقىمىزدىڭ توگىلگەن تەرى مەن ەرەن ەڭبەگىنىڭ, ەلباسىمىزدىڭ كەمەل ساياساتىنىڭ ارقاسىندا ءاربىر ارايلاپ اتقان تاڭ سايىن جەتىپ جاتقان جەتىستىكتەرى وراسان زور. وسىنشا جەتىستىك, وسىنشا ارمانداردىڭ جۇزەگە اسۋى – تاۋەلسىزدىكتىڭ ارقاسى.
ۇلت مەرەيىن اسىرعان تورقالى توي قارساڭىندا نۇر-سۇلتان قالاسى جاڭاشا تۇرلەندى. قالانىڭ ورتالىق كوشەلەرىنە كوك بايراعىمىز ءىلىنىپ, رۋحىمىزعا پاتريوتتىق دەم بەردى. «قازاقستان تاۋەلسىزدىگىنە 30 جىل» دەپ جازىلعان باننەرلەر ەلوردانىڭ قاي بۇرىشىنان قاراساڭىز دا كوزگە بىردەن تۇسەدى. استاناعا قادام باسقان جولاۋشىنىڭ ءبىرىنشى ايالدايتىن «نۇرلى جول» تەمىرجول ۆوكزالى مەن ن.نازارباەۆ اتىنداعى حالىقارالىق اۋەجاي دا تاۋەلسىزدىك كۇنىن ەرەكشە اتاپ وتۋدە. ءدال وسى قالا قاقپالارىندا ەگەمەندىگىمىزدى پاش ەتەتىن كورىنىستەر LED-ەكرانداردا كورسەتىلۋدە. ال كوپقاباتتى عيماراتتاردىڭ قابىرعالارى ءتۇرلى ءتۇستى مەرەكەلىك پلاكاتتارمەن كومكەرىلگەن. التىن كۇن مەن قىران قۇستىڭ بەينەسى ەل تاۋەلسىزدىگىنىڭ مەرەكەسىن ەرتە جەتكىزگەندەي. جەلتوقساننىڭ ىزعارلى ايازى ەلوردالىقتاردىڭ مەرەكەلىك كوڭىل كۇيىنە اسەر ەتە العان جوق. ويتكەنى تاۋەلسىزدىك نىشاندارى قالاعا كورىك بەرىپ تۇر.
حالقىمىز وتىزدى وردا بۇزار جاس دەيدى. جەتكەنىمىزدەن جەتەتىندەرىمىز كوپ. ىستەلگەن ىستەن اتقاراتىنىمىز كوپ. الەمدىك تاريح ءۇشىن بۇل, ارينە, كوپ ۋاقىت ەمەس. بىراق وسى تاۋەلسىزدىكتە وتكەن از ۋاقىت قازاق حالقىنىڭ عاسىرلىق ارمانى بولاتىن. سول بابالار ارمانىنا جەتۋىمىز – ءبىزدىڭ ۇلى جەتىستىگىمىز. ال ۇلى جەتىستىگىمىزدىڭ اسقاق جەمىسى – ەلوردامىز.
