ءتورت جىلدان كەيىن ەلىمىزدە «بولاشاقتىڭ ەنەرگياسى» تاقىرىبىمەن «ەكسپو-2017» حالىقارالىق كورمەسى وتەتىنى بەلگىلى. وسىعان بايلانىستى 15 ماۋسىم كۇنى فرانتسيانىڭ ساۆويا قالاسىنان «The Sun Trip: استانا ەكسپو – 2017» ۆەلوجارىسى باستاۋ الدى.
وعان بەلگيا, شۆەيتساريا, كانادا, چەحيا, فرانتسيا ازاماتتارى جانە قازاقستاندىق ۆەلوشاباندوز اسقار سىزباەۆ قاتىسۋدا. بارلىعى 33 ادام فرانتسيا, بولگاريا, رۋمىنيا, ۋكراينا, تۇركيا, رەسەي, ازەربايجان مەملەكەتتەرىن كوكتەي ءوتىپ, ەلىمىزدىڭ اتىراۋ, اقتوبە قالالارىندا ات شالدىرىپ, استاناعا جەتۋى ءتيىس.
بۇرناعى كۇنى راف ۆان حول ەسىمدى ۆەلوشاباندوز 38 كۇندە 7 مىڭ شاقىرىمدى ارتقا تاستاپ, العاشقى بولىپ باس قالامىزعا «شايتان ارباسىنىڭ» تۇمسىعىن ءتىرەدى. ال, كەشە وسى جوباعا قاتىسۋشى دجوردج مويتا دا كەلىپ جەتتى. قالعان 31 ادام الداعى ەكى اپتا ىشىندە ۆەلوجارىستىڭ سوڭعى نۇكتەسىنە توقتايدى دەپ بولجانۋدا.
استاناعا جەتكەن العاشقى ۆەلوشاباندوزدى «بايتەرەك» مونۋمەنتىنىڭ الدىندا «استانا ەكسپو-2017» ۇق» اق جانە قازاقستان رەسپۋبليكاسىنداعى فرانتسيا ەلشىلىگىنىڭ وكىلدەرى كۇتىپ الدى. بۇل جوبانىڭ نەگىزىن قالاعان فلوريان بايلي دە كەلىپ جەتتى.
فرانتسيانىڭ قازاقستانداعى توتەنشە جانە وكىلەتتى ەلشىسى جان-شارل بەرتونە: «وسى شارا فرانتسيانىڭ قازاقستانداعى ماۋسىمىنا سايكەس كەلىپ, ەكى ەل اراسىنداعى قارىم-قاتىناستى نىعايتىپ قانا قويماي, ونىڭ بۇدان ءارى دامۋىنا جاڭا سەرپىن بەرەدى. ەكى ەلدە دە بالامالى ەنەرگيانى پايدالانۋ ىسىنە ۇلكەن ءمان بەرىلۋدە», – دەدى.
راف ۆان حول ءوز كەزەگىندە: «قازاقستان – وتە تارتىمدى ەل! ەۋروپادا جاتىپ, قازاقستان تۋرالى ەستىگەنىم بولماسا, مۇندا ۇلان-عايىر دالا بارىن بىلمەگەن ەدىم. وسى ەلگە قىزىعۋشىلىعىم ويانعاندىقتان, ساپارعا شىقتىم. تاعى ءبىر ماقساتىم: جانار-جاعارمايدى پايدالانباي-اق, تابيعاتقا ەش زيان كەلتىرمەيتىن كولىكپەن ءبىراز جەرگە بارۋعا بولاتىنىن دالەلدەگىم كەلدى. سول ماقساتىم ورىندالعانداي», – دەپ ءوز-وزىنە ىرزاشىلىعىن ءبىلدىردى.
قوس ماماندىق يەسى – ساۋلەتشى ءجانە ەنەرگەتيكالىق ماسەلەلەر بويىنشا ساراپشى راف ۆان حولدىڭ ايتۋىنشا, بۇل كولىكتى ول ءوزى ويلاپ تاۋىپ, پاتەنتتەپ الىپتى. ەڭ باستىسى, ونىڭ ەكولوگياعا ەش زيان كەلمەۋىنە ءمان بەرىلگەن.
قالعان ۆەلوشاباندوزداردىڭ «شايتان اربالارى» دا وسى تەكتەس بولۋى كەرەك. ولاردىڭ بارلىعى استاناعا جەتكەننەن كەيىن ۆەلوجارىس وتكىزۋ جوسپارلانعان.
امانعالي قالجانوۆ
