بيىل ەلوردادا 22 مىڭنان استام ادام جۇمىسپەن قامتىلادى. قازىرگى ۋاقىتتا ەلوردادا جۇمىسسىزدىق دەڭگەيى 4,6 پايىزدى قۇراپ وتىر. بۇل تۋرالى قالا اكىمدىگىندە وتكەن بريفينگ بارىسىندا حالىقتى جۇمىسپەن قامتۋ ورتالىعىنىڭ ديرەكتورى ازامات بايتاسوۆ مالىمدەدى.
ورتالىق باسشىسىنىڭ ايتۋىنشا, وتكەن جىلى 7 مىڭنان استام ادام تۇراقتى جۇمىسقا, 200 ادام «جۇمىسپەن قامتۋ» جول كارتاسى ارقىلى جۇمىسقا ورنالاستىرىلعان.
«2021 جىلى «ەڭبەك» مەملەكەتتىك باعدارلاماسى اياسىندا 23 مىڭنان استام ادام جۇمىسپەن قامتۋعا جاردەمدەسۋ ءىس-شارالارىنا قاتىسادى. «جاستار» تاجىريبەسىمەن 914 ادام قامتىلىپ, الەۋمەتتىك جۇمىس ورىندارىنا – 185, قوعامدىق جۇمىستارعا 2848 ادام جىبەرىلدى. «العاشقى جۇمىس ورنى» جوباسىنا – 91, «ۇرپاقتار كەلىسىمشارتى» جوباسىنا 2 ادام قاتىستى. 213 ادام قىسقا مەرزىمدى كاسىپتىك وقىتۋمەن ءبىلىم الىپ, 91 پايىزى جۇمىسپەن قامتىلدى. «باستاۋ بيزنەس» جوباسى بويىنشا 1384 ادامعا كاسىپكەرلىك نەگىزدەرىن وقىتۋعا جولداما بەرىلدى. ونىڭ ىشىندە 503 ادام مەملەكەتتىك گرانت الدى. كاسىپكەرلىك باستامالاردى قولداۋ اياسىندا 92 بيزنەسكە نەسيە بەرىلدى. جالپى ءبىلىم بەرەتىن مەكتەپتەردىڭ 9-سىنىپ وقۋشىلارى اراسىندا الەۋمەتتىك كاسىبي باعدارلامامەن قامتىلعاندار سانى 8235 ادامدى قۇرادى. مۇگەدەكتىگى بار ادامداردى جۇمىسقا ورنالاستىرۋ ماقساتىندا 10 ارنايى جۇمىس ورنى قۇرىلدى» دەدى ول بريفينگ بارىسىندا.
«جۇمىسپەن قامتۋ» جول كارتاسى اياسىندا 2021 جىلى 14 ينفراقۇرىلىمدىق جوبا ىسكە اسىرىلىپ, 635 جۇمىس ورنى قۇرىلدى. بۇل باعدارلاما قاتىسۋشىلارىنىڭ ورتاشا جالاقىسى 115 مىڭ تەڭگەنى قۇرادى. ورتالىق I توقساندا – 3773 وتباسىنا, II توقساندا – 3302 وتباسىنا, III توقساندا – 2992 وتباسىنا, IV توقساندا 2909 وتباسىنا ااك تاعايىندادى.
حالىقتى جۇمىسپەن قامتۋ ورتالىعىندا 3823 ادام جۇمىسسىز, ونىڭ ىشىندە 915 جاس ەسەپتە تۇر. جىل باسىنان بەرى 1614 ادام جۇمىسقا ورنالاستى. ونىڭ ىشىندە 558-ءى – جاستار. 2022 جىلى جۇمىسپەن قامتۋدىڭ بەلسەندى شارالارىمەن 22 مىڭعا جۋىق ادامدى تارتۋ جوسپارلانىپ وتىر. ونىڭ ىشىندە 7150 ادامدى تۇراقتى جۇمىس ورىندارىنا ورنالاستىرادى.
ەلوردادا جاستار تاجىريبەسىنە قاتىسۋشىلاردىڭ دا ەڭبەكاقىسى ارتادى. ياعني بيىلدان باستاپ تاجىريبەدەن ءوتۋ ماماندارىنىڭ جالاقىسى 122 مىڭ تەڭگەنى قۇرايدى. ال تاجىريبەدەن ءوتۋ مەرزىمى 6 ايدان 1 جىلعا دەيىن ۇزارادى. «جاستار» تاجىريبەسىنە 998 ادام جىبەرىلەدى. قازىرگى تاڭدا بۇل باعدارلاما اياسىنداعى جالاقى 122 مىڭ تەڭگەنى قۇرايدى. العاشقى جۇمىس ورنىنا 179 ادام جىبەرىلەدى. مەملەكەت تاراپىنان تولەنەتىن جالاقى مولشەرى 91 مىڭ تەڭگە بولىپ وتىر. سونىمەن قاتار بيىل «ۇرپاقتار كەلىسىمشارتى» باعدارلاماسى ىسكە اسادى.
«العاشقى جۇمىس ورنى» جوباسى جيىرما توعىز جاسقا تولماعان, ونىڭ ىشىندە NEET ساناتىنداعى جانە جۇمىس تاجىريبەسى جوق تۇلەكتەرگە ارنالعان. قالالىق جۇمىسپەن قامتۋ ورتالىعى ديرەكتورىنىڭ ورىنباسارى تالعات ەسىموۆتىڭ ايتۋىنشا, قاتىسۋ مەرزىمى 18 ايدان اسپايدى.
«جاستار تاجىريبەسى تۇلەكتەردىڭ العان ماماندىعى بويىنشا وقۋدى اياقتاعاننان كەيىن 3 جىل ىشىندە باستاپقى جۇمىس تاجىريبەسىن جيناقتاۋىنا ارنالعان. جالاقىنى مەملەكەت تولەيدى. بۇدان باسقا, «العاشقى جۇمىس ورنى» جوباسىنا قاتىسۋشىلاردىڭ جالاقىسى 30 اەك-كە دەيىن نەمەسە 91 مىڭ تەڭگەگە دەيىن وسەدى» دەدى تالعات ەسىموۆ.
2022 جىلدان باستاپ جاڭا بيزنەس-يدەيالاردى ىسكە اسىرۋ ءۇشىن مەملەكەتتىك گرانت سوماسى 200-دەن 400 اەك-كە دەيىن ارتادى. بۇل 1225200 تەڭگەگە تەڭ.
