ەلوردادا بۇگىن «Birge – taza Qazaqstan» رەسپۋبليكالىق اكتسياسى اياسىندا جالپىقالالىق جانە كوممۋنالدىق سەنبىلىكتەر, سونداي-اق اعاش وتىرعىزۋ ءىس-شارالارى باستالادى. ول مامىردىڭ 16-سىنا دەيىن جالعاسادى.
ەكولوگيالىق ايلىق اياسىندا قالانىڭ ءتورت اۋدانىندا دا سانيتارلىق تازارتۋ جۇمىستارى جۇرگىزىلىپ جاتىر. بۇل رەتتە باس شاھاردىڭ بارلىق كاسىپورىندارى, مەنشىك يەلەرىنىڭ بىرلەستىكتەرى (پاتەر يەلەرىنىڭ كووپەراتيۆتەرى), شاعىن جانە ورتا بيزنەس سۋبەكتىلەرى, ۆولونتەرلەر مەن بەلسەندى قالا تۇرعىندارى سەنبىلىككە شىعىپ, قولدارىنا قولعاپ كيىپ, كۇرەك, تىرنا, سىپىرعىش الىپ, ءوز مەكەمەلەرىنىڭ جانىنداعى الاڭدار مەن اۋلا اۋماقتارىن تازالاپ, اعاشتاردى اكتەپ, كوگالداندىرۋعا ەرەكشە كوڭىل بولۋدە.
تازالاۋ جۇمىسىنا 2 مىڭعا جۋىق جول قىزمەتكەرى مەن 500-دەن استام ارنايى تەحنيكا جۇمىلدىرىلدى. ولار قالاداعى اسفالت پەن تروتۋارلاردى, ايالدامالار مەن جول بەلگىلەرىن, قورشاۋلاردى, جەراستى وتكەلدەرىن ارنايى ەرىتىندىمەن جۋىپ تازالادى.
كوممۋنالدىق قىزمەت ماماندارى قوقىس جاشىكتەرىن قولمەن تازالاپ, قورشاۋلاردى, كوپىرلەردى, ەسكەرتكىشتەردى, تروتۋارلاردى جۋدى, اينالاداعى اعاشتاردىڭ ءتۇبىن قوپسىتىپ, جاڭا اعاشتار وتىرعىزاتىن ورىندار دايىندادى. سونىمەن بىرگە ساياباقتار, گۇلزارلار, الاڭدار, اۋلا ايماقتارى قوقىستان تازارتىلدى, نوسەر جانە ارىق-ناۋالىق كارىز جەلىلەرىن سانيتارلىق تازارتۋ, ساياباقتار مەن گۇلزارلاردا ەگىلگەن كوشەتتەردى كۇتۋ جونىندەگى ماۋسىمدىق اگروتەحنيكالىق جۇمىستار, كوگالدار مەن گۇلزارلار ورناتۋ, رۇقسات ەتىلمەگەن تۇستارعا تاستالعان قوقىستاردى, لاستانعان ۋچاسكەلەردى تازارتۋ جۇمىستارى دا قىزۋ جۇرگىزىلۋدە.
«Birge – taza Qazaqstan» رەسپۋبليكالىق اكتسياسى اياسىندا ەلوردادا اپتا سايىنعى سەنبىلىكتەرگە 80 مىڭنان استام ادام, 10 مىڭ كاسىپورىن مەن ۇيىم قاتىسىپ, جالپى اۋدانى 5,5 ملن شارشى مەتردەن استام ساياباقتار مەن گۇلزارلاردى تازارتتى جانە 12 مىڭنان استام كوشەت وتىرعىزدى. وتكەن جىلى نۇر-سۇلتان قالاسىندا ميلليوننان استام اعاش وتىرعىزىلعان بولاتىن.
الداعى سەنبى كۇنى, ياعني 23 ساۋىردە باس شاھاردا جالپىقالالىق سەنبىلىك جانە جاپپاي اعاش وتىرعىزۋ ءىس-شاراسى وتەدى. بۇل رەتتە قالا اۋماعىن قىس مەزگىلىنەن كەيىن تازارتۋ, رەكرەاتسيالىق ايماقتاردى, ساياباقتاردى, گۇلزارلاردى, اۋلالاردى, سونداي-اق ساۋدا نىساندارىنا, قوعامدىق تاماقتانۋ ورىندارىنا جانە باسقا دا ۇيىمدارعا ىرگەلەس اۋماقتاردى جيناۋمەن بىرگە الماتى, بايقوڭىر, ەسىل جانە سارىارقا اۋداندارىندا اعاش وتىرعىزۋ ءىس-شاراسى ۇيىمداستىرىلادى دەپ جوسپارلانىپ وتىر. وسىلايشا, قالا تۇرعىندارى مەن ۇيىمدارى كوشەلەر مەن اۋلالاردى اباتتاندىرۋدى جاقسارتۋعا ءوز ۇلەسىن قوسۋدا.
گۇلبارشىن وكەشقىزى
