نۇرايىم قابدىل – №74 مۇقاعالي ماقاتاەۆ اتىنداعى مەكتەپتىڭ 8-سىنىپ وقۋشىسى. كىشكەنتايىنان مۋزىكاعا جاقىن. فلەيتا اسپابىندا وينايدى.
نۇرايىمنىڭ انگە قىزىعۋشىلىعى 3-4 جاسىندا باستالعان. العاش كارىس اندەرىن ايتقان.
– اعام انگە قىزىعۋشىلىعىمدى بايقاپ, اتا-اناما بۇل ونەرىمدى دامىتۋعا كەڭەس بەردى. ساحناعا 7 جاسىمدا شىعىپ, بايقاۋعا قاتىستىم. قاتتى قوبالجىعانىممەن, ساحنادا كورەرمەنننىڭ جىلى لەبىزىن سەزىندىم. كەيىن ۇستازىم انار اپاي «ءان ايتقان كەزدە دەمدى دۇرىس الۋ ءۇشىن ۇرمەلى اسپاپتارعا بارعان دۇرىس» دەگەن سوڭ فلەيتانى تاڭدادىم. 6 جىل قاتىستىم. فلەيتا اعاش نەمەسە جەزدەن, كۇمىس, التىن مەتالداردان دا جاسالادى. جەكە ورىنداۋدا, ءان سۇيەمەلدەۋدە جانە باسقا اسپاپتارمەن بىرگە انسامبلدە قولدانىلادى. فلەيتانىڭ اۋەنى, نەگىزى, ادەمى ءارى كۇيزەلىسكە تۇسكەن جاندارعا پايدالى. سىرتىنان قاراساڭىز دا وتە نازىك اسپاپ ەكەنى بايقالادى. بىراق اتا-انام مەكەنجاي اۋىستىرعان سوڭ, مۋزىكا مەكتەبىنە قاتىسۋ قيىنداۋ بولدى. بۇل ساباعىما دا اسەر ەتتى. سول ءۇشىن قازىر فلەيتا اسپابىنا قاتىسىپ جۇرگەن جوقپىن. بولاشاقتا جالعاستىرۋ ويىمدا بار, – دەدى ول.
اناسى گۇلجاننىڭ ايتۋىنشا, نۇرايىم وسى ۋاقىتقا دەيىن ءتۇرلى شارالارعا قاتىسقان. ساحناعا قاتتى قىزىعادى.
– ۇيدەگى ديپلوم, مەدالدەن ءۇي سالۋعا بولادى. ساحناعا شىققاندى جانى سۇيەدى. اكەسى جۋرناليست بولعان سوڭ با, ءسوز ساپتاۋ شەبەرلىگى دە جاقسى دامىعان. 9 جاسىندا «بالاپان» تەلەارناسىندا «ويلان, تاپ» باعدارلاماسىن جۇرگىزدى. ارنايى كاستينگ ءوتىپ, تاڭداپ الىندى. ەفير جۇرگىزگەن وعان قاتتى ۇنادى. مەكتەپتە دە وليمپيادالاردان قالمايدى, وتە العىر. ءبىز ونىڭ بولاشاعىنا سەنەمىز, – دەدى اناسى گۇلجان.
ۋاقىتىن پايدالى وتكىزگەندى جاقسى كورەدى. سودان بولار, بۇرىن مۋزىكالىق قابىلەتىن دامىتسا, قازىر ءتۇرلى تىلدەردى ۇيرەنىپ ءجۇر.
– عىلىمي جوبا قورعاپ, بەلگىلى ءبىر تاقىرىپتى زەرتتەپ ءجۇرمىن. بۇل بولاشاقتا ءوز سالامدا ناعىز مامان بولۋ ءۇشىن كەرەك. ودان بولەك, سۋرەت سالۋ, اعىلشىن ءتىلى, ءجۇزۋ ۇيىرمەلەرىنە بارامىن. اعىلشىن تىلىنەن IELTS جانە SAT سىناقتارىنا دايىندالىپ ءجۇرمىن. سەبەبى بۇل – ماڭىزدى سىناقتار. وعان قازىردەن باستاپ دايىن بولۋ كەرەك دەپ ويلايمىن. ونىڭ ۇستىنە 11-سىنىپ بىتىرگەن سوڭ قاي وقۋ ورنىندا وقيتىنىمدى ءارى ماماندىعىمدى قاتتى ويلانامىن. سەبەبى ماماندىق تاڭداۋ – ەڭ ماڭىزدى ءارى قيىن شەشىم. قىزىعۋشىلىعىم وتە تەز اۋىسىپ جۇرگەندىكتەن, ءالى ءبىر ناقتى شەشىمگە كەلمەدىم. قازىرگى جۇرەك قالاۋىم – حيرۋرگ بولۋ. ادامداردىڭ جان جاراسىن ەمدەپ, ەلىمىزدەگى مەديتسينانى دامىتقىم كەلەدى, – دەدى نۇرايىم.
مەكتەپتە سۇيىكتى پاندەرىنىڭ ءبىرى – قازاقستان تاريحى. الاش پارتياسى, حالقىمىزدىڭ رۋحاني مادەنيەتى ونى وتە قاتتى قىزىقتىرادى. الەمدىك كينو تۋىندىلاردى دا ءجيى قارايدى.
– ەڭ سوڭعى رەت «بەتمەن» ءفيلمىن كوردىم. بىراق وتە ۇزاق بولعاندىقتان ماعان ۇنامادى. جاقىندا «دجەين ەير» كىتابىن وقىپ ءبىتىردىم. شىعارمادا اتا-اناسىز قالعان دجەيننىڭ ءومىرى سيپاتتالادى. مەكتەپتە وقىپ, ءبىلىمىن جەتىلدىرىپ, مۇعالىم بولىپ قىزمەت ەتكەن ونىڭ كوپتەگەن قيىنشىلىقتان ءوتىپ, سونى جەڭگەن قايسارلىعى ءتانتى ەتتى. قازىر «دوريان گرەيدىڭ پورترەتىن» وقىپ جاتىرمىن. جالپى الەمدىك كلاسسيكالىق شىعارمالاردى قالدىرماي وقۋعا تىرىسامىن.
اكەمدى ۇلگى تۇتامىن. كەز كەلگەن ىسىمە ۇنەمى قولداۋ كورسەتىپ وتىرادى. بالاعا اتا-انانىڭ قولداۋى مەن ماحابباتىنان اسقان قىمبات نارسە كەرەك ەمەس قوي. سول ءۇشىن دە بولاشاقتا اتا-انامنىڭ ماعان دەگەن سەنىمىن اقتاعىم كەلەدى, – دەدى ول.
نۇرايىمنىڭ جۇرەگى جۇمساق. حيرۋرگ ماماندىعىن تاڭداپ, ءوز كلينيكاسىن اشقىسى كەلەدى. ال تۇسكەن قارجىنىڭ ءبىر بولىگىن بالالار ۇيىنە نەمەسە كومەككە ءزارۋ وتباسىلارعا بەرگىسى كەلەدى.
– ەگەر مەملەكەت باسشىسى بولسام, ەلىمىزدە عالىمدارعا جاعداي جاساۋدى قاراستىرار ەدىم. سەبەبى قازىر عىلىممەن اينالىسۋعا قۇرال-جابدىق, ءتۇرلى كىتاپ, وقۋلىق, وقۋ ورىندارى جەتىسپەيدى. سولاردىڭ ورنىن تولتىرار ەدىم. وقۋ ساپاسىن جاقسارتۋدى كوزدەر ەدىم. سوندا عانا ەلىمىزدە ساپالى ماماندار تولىعىپ, ءبىلىم ساپاسى جاقساراتىنىنا سەنىمىم مول, – دەدى ول.
ايزادا جايىققىزى
