مەملەكەت باسشىسى 2022 جىلدى ەلىمىزدە بالالار جىلى دەپ جاريالاعانى ءمالىم. وسىعان وراي, بيىل ەلوردادا كوپتەگەن ءىس-شارا وتكىزىلدى. استانا قالاسى اكىمدىگىنىڭ ءباسپاسوز ورتالىعىندا «استانادا بالالار جىلى اياسىندا ءوتىپ جاتقان ءىس-شارالار جونىندە» تاقىرىبىندا ونلاين-بريفينگ ءوتتى. سپيكەرى – استانا قالاسى ءبىلىم باسقارماسى باسشىسىنىڭ ورىنباسارى مارجان كايرباەۆا.
بالالار قاۋىپسىزدىگى – باستى نازاردا
«ءبىلىم الۋشىلاردىڭ قۇقىقتىق ساۋاتتىلىعىن ارتتىرۋ ءۇشىن قاناتقاقتى رەجيمدە 57 مەكتەپتە (59,3%) قۇقىق بۇزۋشىلىقتىڭ الدىن الۋ جونىندەگى مەنەدجەردىڭ شتات بىرلىكتەرى ەنگىزىلدى» دەدى م.كايرباەۆا ءوز سوزىندە.
قۇقىق بۇزۋشىلىقتىڭ الدىن الۋ بويىنشا جۇمىستاعى ءتيىمدى ادىستەردىڭ ءبىرى – «مەكتەپ مەدياتسياسى قىزمەتى». قازىرگى ۋاقىتتا مەكتەپ مەدياتسياسى قىزمەتى 15 مەكتەپتە جۇمىس ىستەيدى. وسى ماقساتتا بىرقاتار وقىتۋ سەمينارى وتكىزىلىپ, ءبىلىم بەرۋ ۇيىمدارىندا قىزمەتتى ەنگىزۋ بويىنشا ادىستەمەلىك ۇسىنىمدار بەرىلدى. بۇگىنگى تاڭدا 40-تان استام ءوتىنىش قارالىپ, ناتيجەسىندە تاراپتار ءوزارا بىتىمگە كەلدى.
ءبىلىم باسقارماسى جانىنان ومىرلىك قيىن جاعدايعا تاپ بولعان وتباسىلارمەن جۇمىس جۇرگىزۋ ماقساتىندا «پسيحولوگيالىق سۇيەمەلدەۋ قىزمەتى» جوباسى باستالدى. كومەككە مۇقتاج كەز كەلگەن ادام پسيحولوگيالىق, قۇقىقتىق جانە الەۋمەتتىك كومەككە جۇگىنە الادى (اقىسىز). 9 ايدا الەۋمەتتىك قىزمەتكەرلەر 100-دەن استام ادامعا باعىت-باعدار بەرىپ, 316 جانعا زاڭ تۇرعىسىنان كەڭەس ايتىپ, 307 ادامعا جەكە جانە توپتىق پسيحولوگيالىق كومەك كورسەتتى.
سونىمەن قاتار ءبىلىم بەرۋ ۇيىمدارىندا قولما-قول اقشاسىز تولەم جۇرگىزۋ جۇيەسى ەنگىزىلدى. قازىرگى ۋاقىتتا وقۋشىلار مەن ولاردىڭ اتا-انالارى اراسىندا قولما-قول اقشاسىز ەسەپ ايىرىسۋدىڭ تيىمدىلىگى مەن قاۋىپسىزدىگى تۋرالى ءتۇسىندىرۋ جۇمىستارى جۇرگىزىلۋدە. بۇل باعىتتاعى جۇمىس جالعاسۋدا جانە ءبىلىم باسقارماسىنىڭ ەرەكشە باقىلاۋىندا.
مەكتەپتە, ۇيدە جانە كوشەدە قيىندىقتارعا تاپ بولعان وقۋشىلار مەن ولاردىڭ اتا-انالارىنا كومەك كورسەتۋ ماقساتىندا قر وقۋ-اعارتۋ مينيسترلىگىنىڭ بالالاردىڭ قۇقىقتارىن قورعاۋ كوميتەتى «Bala Qorgau» جوباسىن ىسكە قوستى. وسى جوبا شەڭبەرىندە بارلىق ءبىلىم بەرۋ ۇيىمدارىندا پەداگوگتار, وقۋشىلار جانە ولاردىڭ اتا-انالارى اراسىندا QR-كودتار ورنالاستىرىلعان اقپاراتتىق تاقتايشالار بويىنشا ءتۇسىندىرۋ جۇمىستارى جالعاسۋدا. بالالاردىڭ قۇقىقتارىن بۇزۋ تۋرالى ءاربىر جاعداي تولىق انىقتالعانعا دەيىن, سونداي-اق شەشىلگەنگە دەيىن ايرىقشا نازاردا بولادى.
«جايلى مەكتەپ» ۇلتتىق جوباسى قولعا الىندى
«جايلى مەكتەپ» جوباسى اياسىندا 2023-2026 جىلدار ارالىعىندا ارقايسىسى 2000 ورىندىق 20 مەكتەپ سالۋ جوسپارلانۋدا. بۇگىنگى تاڭدا مەكتەپ قۇرىلىسىنا ارنالعان جەر ۋچاسكەلەرى انىقتالدى, سونداي-اق جوبالاردى ىسكە اسىرۋ جوسپارى پىسىقتالۋدا.
اعىمداعى جىلى 23580 ورىندىق 11 مەكتەپتىڭ قۇرىلىسى جۇرگىزىلۋدە (2 مەكتەپ اعىمداعى جىلدىڭ قىركۇيەك ايىندا پايدالانۋعا بەرىلدى). ونىڭ ىشىندە 7 مەكتەپ ينۆەستيتسيا جانە مەملەكەتتىك-جەكەشەلىك ارىپتەستىك ەسەبىنەن سالىنادى.
بيىل دەمەۋشىلىك كومەكپەن «جاسىل مەكتەپ» جوباسى ىسكە قوسىلدى. 1 شىلدەدە №87 مەكتەپتە العاشقى جىلىجاي اشىلدى, سونداي-اق وسى جىلدىڭ سوڭىنا دەيىن 18 مەكتەپتە جانە كوللەدجدە تاعى 19 جىلىجاي اشۋ جوسپارلانعان.
قوسىمشا ءبىلىم بەرۋ
بالالاردى قوسىمشا بىلىممەن قامتۋدى جانە قادامدىق قولجەتىمدىلىكتى ارتتىرۋ ماقساتىندا 2022 جىلى 10000-نان استام بالانى قامتيتىن 10 نىسان اشىلدى. سونىمەن قاتار مەكتەپتەردە «التىن ۇرپاق», «التىن دومبىرا» جوبالارى جۇزەگە اسىرىلىپ جاتىر. بيىل بارلىق ءبىلىم بەرۋ ۇيىمدارىندا دومبىرا جانە شاحمات بويىنشا ۇيىرمەلەر ەنگىزىلدى.
قازىرگى ۋاقىتتا استانا قالاسى بويىنشا 94 ورتا مەكتەپتە 107 ءۇش ءتىلدى پىكىرسايىس كلۋبى جۇمىس ىستەيدى. 11 مەملەكەتتىك جانە 8 جەكەمەنشىك كوللەدجدە 22 پىكىرسايىس كلۋبى جۇمىس ىستەيدى.
بۇگىنگى تاڭدا ينكليۋزيۆتى ءبىلىم بەرۋ ءۇشىن قالانىڭ 94 مەكتەبىندە جاعداي جاسالعان. تۇزەتۋ, پسيحولوگيالىق-مەديتسينالىق-پەداگوگيكالىق كابينەتتەر سانى ارتىپ كەلەدى. جىل باسىنان بەرى 1 ينكليۋزيانى قولداۋ كابينەتى, 1 پپتك, 1 پمپك اشىلدى.
تەحنيكالىق جانە كاسىپتىك ءبىلىم بەرۋ ۇيىمدارىنداعى جاعدايعا كەلەتىن بولساق, بيىل 16 كوللەدج (5-ەۋى – مەملەكەتتىك, 11-ءى – جەكەمەنشىك) ەرەكشە قاجەتتىلىكتەرى بار 97 بالانى قابىلدادى. دەگەنمەن وتكەن جىلى ەرەكشە قاجەتتىلىكتەرى بار بالالار تەك ءبىر تجكب وقۋ ورنىندا وقىسا, قازىرگى ۋاقىتتا بالا سانى 197-ءنى قۇرادى.
