مەملەكەت باسشىسى كورمە كەشەنىنىڭ بولاشاق حالىقارالىق, تاقىرىپتىق پاۆيلوندارىنىڭ, سونداي-اق, ساۋىق جانە قىزمەت كورسەتۋ نىساندارىنىڭ ماكەتتەرىمەن تانىستى.
سونىمەن قاتار نۇرسۇلتان نازارباەۆقا كورمەنىڭ ورتالىعى – قازاقستاننىڭ ۇلتتىق پاۆيلونىندا بولاتىن نىساندار جونىندە جان-جاقتى باياندالدى.
سودان سوڭ قازاقستان پرەزيدەنتى كەڭەس وتكىزىپ, قۇرىلىس جۇمىستارىنىڭ بارىسىنا توقتالدى. مەملەكەت باسشىسى ىسكە قوسۋ جانە ارلەۋ جۇمىستارىن جۇرگىزۋ ءۇشىن كەشەندى 2016 جىلعى قىركۇيەككە دەيىن دايىن ەتۋ قاجەتتىگىن ايتىپ, جۇمىس كەستەسىن ساقتاۋ ماسەلەسىن اتاپ ءوتتى.
نۇرسۇلتان نازارباەۆ سالىنىپ جاتقان عيماراتتاردى كورمەدەن كەيىن دە پايدالانۋ ماسەلەسىن ۇكىمەتپەن بىرلەسە وتىرىپ انىقتاۋ باستى مىندەتتەردىڭ ءبىرى ەكەندىگىنە نازار اۋداردى.
– كەيبىر ەلدەردەگى سەكىلدى نىساندار بوس تۇرىپ قالماۋى كەرەك. قوناقتارعا ارنالعان باسپانا, قوناق ءۇي جانە كونگرەسس-ورتالىق ماقساتتى پايدالانىلادى. بۇل رەتتە, كورمەدەن كەيىن شەتەلدىك مەملەكەتتەردىڭ پاۆيلوندارى مەن وزگە دە كوپتەگەن ورىن-جايلار بوس قالادى. كەشەن ودان ءارى قالاي پايدالانىلاتىنىن قازىردىڭ وزىندە شەشىپ العان ءجون. مۇمكىن وندا حالىقارالىق شارالار, اسكەري, اگروونەركاسىپتىك كورمەلەر وتكىزىلەر. الەمدىك ءىرى كومپانيالاردى ءبىزدىڭ نىساندارىمىزدى ءوز جۇمىستارىنا پايدالانۋى ءۇشىن قىزىقتىرۋ قاجەت. سونىمەن قاتار, مۇندا حالىقارالىق بانكتەر, بۇقارالىق اقپارات قۇرالدارى ءوز كەڭسەلەرىن اشۋعا تىلەك بىلدىرۋدە. جالپى العاندا, بارلىق عيماراتتار 2017 جىلدىڭ كۇزىنەن سوڭ ءارى قاراي پايدالانۋعا بەرىلۋگە ءتيىس, – دەدى قازاقستان پرەزيدەنتى.
مەملەكەت باسشىسى ەلىمىزدىڭ «ەكسپو-2017» كورمەسىن وتكىزۋدەگى ماقساتى قازاقستاننىڭ تابىستارىن ايگىلەۋدى, الەمدىك قوعامداستىققا ونىڭ مۇمكىندىكتەرىن پاش ەتۋدى كوزدەيتىنىن اتاپ ءوتتى.
– ءبىزدىڭ رەسپۋبليكامىزدى كوپتەگەن اسپەكتىلەر بويىنشا – ءىرى ەنەرگەتيكالىق مەملەكەت, ۋران كەنىن وندىرەتىن جەتەكشى ەل, استىق ەكسپورتتاۋشى, باي تابيعي رەسۋرستارعا يە مەملەكەت رەتىندە بىلەدى. ەندى بولاشاققا ۇمتىلعان جاڭا ەلدى كورسەتۋ قاجەت. ۇلتتىق پاۆيلون تۇجىرىمداماسىنىڭ ءوزى دە قازاقستان جەتكەن جەتىستىگىمەن توقتالىپ قالمايتىنىن, ءاردايىم
ءارى قاراي ىلگەرىلەۋدى ماقسات تۇتاتىنىن كورسەتەدى, – دەدى نۇرسۇلتان نازارباەۆ.
سونداي-اق, قازاقستان پرەزيدەنتى جوبا استانانىڭ بەدەلىن بۇدان دا ءارى نىعايتۋعا سەپتىگىن تيگىزەتىنىنە نازار اۋداردى.
سوڭىندا مەملەكەت باسشىسى جوبانى بۇدان ءارى جۇزەگە اسىرۋعا قاتىستى بىرقاتار ناقتى تاپسىرمالار بەردى.
كەڭەس بارىسىندا «استانا ەكسپو-2017» ۇك» اق باسقارماسىنىڭ توراعاسى ت.ەرمەگياەۆ كورمە كەشەنى قۇرىلىسىنداعى قازاقستاننىڭ ۇلەسىن ارتتىرۋ تۋرالى مەملەكەت باسشىسىنىڭ تاپسىرماسىنا سايكەس حالىقارالىق ءىس-شارا دايىندىعىنا جانە وعان قاتىسۋعا ەلىمىزدىڭ بيزنەس-قوعامداستىعى بەلسەندى تۇردە تارتىلىپ جاتقانىن ايتتى. ەكسپو نىساندارىنداعى قازاقستاندىق ۇلەس 60%-دان كەم بولمايدى دەپ جوسپارلانۋدا.
سونىمەن قاتار قۇرىلىس بارىسى تۋرالى «Sembol», «ءBى Group», «ابك قۇرىلىس-1», «Mabetex Group», «سك بازيس», «كومپانيا ادس», «MegaManagement» سياقتى مەردىگەرلىك قۇرىلىس كومپانيالارىنىڭ باسشىلارى بايانداما جاسادى.
* * *
جالپى اۋدانى 174 گەكتار بولاتىن كورمە كەشەنىنىڭ اۋماعىندا 38 نىسان بوي كوتەرەتىن بولادى. جوباعا 8 قۇرىلىس ۇيىمى جانە 3500-دەن استام جۇمىسشى قاتىسىپ جاتىر.
كەشەننىڭ كورمە ايماعىندا ديامەترى 80 مەترلىك, شار ءپىشىنىندەگى قازاقستاننىڭ ۇلتتىق پاۆيلونى, سونداي-اق, حالىقارالىق, تاقىرىپتىق جانە كورپوراتيۆتىك پاۆيلوندار, ساۋدا, ويىن-ساۋىق جانە قىزمەت كورسەتۋ نىساندارى ورنالاسادى. كورمە سىرتىنداعى ايماققا كونفەرەنتسيا ورتالىعى, ءباسپاسوز ورتالىعى, جابىق قالا, تۇرعىن ۇيلەر مەن قوناق ۇيلەر ەنەدى.
ەكسپو نىساندارى جەل, كۇن جانە وزگە دە بالامالى قۋات كوزدەرىنەن الىناتىن «جاسىل» ەنەرگەتيكامەن قامتاماسىز ەتىلەدى دەپ جوسپارلانىپ وتىر.
