الداعى جىلى استانادا وتەتىن «ەكسپو-2017» حالىقارالىق مامانداندىرىلعان كورمەسى قازاقستاننىڭ تاۋەلسىزدىك جىلدارىنداعى ەكونوميكالىق جەتىستىكتەرىن عانا ەمەس, ەلدىڭ باي تاريحى مەن مادەنيەتىن تورتكۇل الەمگە پاش ەتۋى ءتيىس. مەملەكەتىمىزدىڭ ءار ايماعىندا ۇلتىمىزدىڭ وتكەن جولىنان سىر شەرتەتىن, شەتەلدىكتەردى قىزىقتىراتىن تاريحي مەكەندەر بارشىلىق. ەل ىشىنەن قازاق حالقىنىڭ تامىرىن تەرەڭنەن تارتاتىن ونەرىمەن قوناقتاردى تامساندىراتىن ونەرپازدار دا تابىلارى ءسوزسىز.
قوناقتار كۇللى قازاقستاندى ارالايدى
ءىرى حالىقارالىق شارانى ۇيىمداستىرۋشىلار دا سول ماقساتتى كوزدەپ, كورمە قاتىسۋشىلارى مەن قوناقتارىنا وڭىرلەرگە ساپارلاردى دايىنداپ قويىپتى. جاقىندا قر ينۆەستيتسيالار جانە دامۋ ءمينيسترى مەن قر مادەنيەت جانە سپورت ءمينيسترىنىڭ بىرلەسكەن بۇيرىعىمەن تۋريستىك باعدارلار تىزبەسى بەكىتىلدى. وعان جالپى العاندا استانا مەن الماتى قالالارى مەن ەلىمىزدىڭ ون ءتورت وبلىسىن قوسقاندا 73 مارشرۋت ەنگىزىلدى. بۇل دەگەنىمىز – مەيماندار قازاقستاننىڭ بۇكىل ايماعىن ارالايدى دەگەن ءسوز. «اتىڭ باردا جەر تانى جەلىپ ءجۇرىپ» دەپ قازاق ايتپاقشى, قوناقتار كورمە وتەتىن كەزەڭدە ۇيىمداستىرۋشىلار سايلاپ بەرگەن كولىكپەن التايدان اتىراۋعا دەيىن كوسىلىپ جاتقان ۇلانعايىر دالامىزدى كورىپ قالادى.
«تۋريستىك ساپارلار استانادان باستاۋ الادى. ەلوردانىڭ ەنشىسىنە 6 باعدار ءتيىپ وتىر. ال ەڭ كوپ مارشرۋت مىڭجىلدىق تاريحى بار الماتى قالاسىنا بۇيىردى. الاتاۋ باۋرايىنداعى اسەم شاھار بويىنشا 19 باعدار بەلگىلەندى. قالعان مارشرۋتتار وبلىستاردىڭ ەنشىسىندە» دەيدى قر ينۆەستيتسيالار جانە دامۋ مينيسترلىگى تۋريزم يندۋسترياسى دەپارتامەنتىنىڭ ديرەكتورى مارات يعالي.
ونىڭ ايتۋىنشا, تۋريستىك نەگىزگى باعدارلاردى انىقتاۋ ماقساتىندا اتالمىش دەپارتامەنت «استانا-ەكسپو-2017» ۇك» اق مەن وبلىس اكىمدىكتەرىمەن بىرلەسكەن جۇمىستاردى جۇرگىزدى. بۇل مارشرۋتتاردى بەلگىلەگەندە, تۋريستىك ساپارلاردى ءساتتى ۇيىمداستىرۋعا جول اشاتىن باستى تالاپتار دا نازارعا الىندى.
ساپارلار استانادان باستالادى
«كورمە قاتىسۋشىلارى مەن قوناقتارى ەڭ الدىمەن استاناعا كەلىپ, «ەكسپو-2017» كەشەنىن ارالاۋى ءتيىس. ولارعا ۇسىنىلاتىن باعدارلاما دا تاريحي, مادەني جانە ساۋلەتتىك تۇرعىدان مازمۇندى, ۇلتتىق بوياۋى قانىق بولۋى كەرەك. وڭىرلەردەگى تۋريستىك نىساننىڭ جايىنان حابار بەرەتىن اقپاراتتىق انىقتامانى دا قىزىقتى ەتىپ ۇسىنۋعا ءتيىستىمىز. تۋريستىك باعدارعا ەتنو جانە ەكوتۋريزم ەلەمەنتتەرى ەنگىزىلۋى قاجەت. تۋراۆتوبۋستارعا ارنالعان تۇراقتاردىڭ بولۋىن دا ەستەن شىعارمادىق. تۋريستىك نىساندارعا اپاراتىن جولداردا نىساننىڭ قايدا ورنالاسقانىن كورسەتەتىن بەلگى دە ورناتىلۋى كەرەك. مۋزەيلەر اۋديوگيدتەرمەن قامتاماسىز ەتىلۋى ءتيىس. ەكسكۋرسيا جۇرگىزەتىن گيدتەر شەت تىلدەرىندە سويلەي ءبىلىپ, ولاردىڭ بىلىكتىلىگى دە جوعارى بولعانى ءجون دەپ وتىرمىز. كەيبىرەۋلەرگە ۇساق بوپ كورىنەتىن ماسەلەلەرگە دە نازار اۋداردىق. اتاپ ايتساق, تۋريستىك اۆتوبۋستاردى تەلەديدار مەن اۋديوگيدتەرمەن جابدىقتاۋدى, تۋريستىك توپتاردى سينحروندى اۋدارمانىڭ جەكە قابىلداعىشتارىمەن قامتاماسىز ەتۋدى, توقتايتىن جەرلەردە تەلەفوندى قۋاتتاندىراتىن جەرلەردىڭ, قوعامدىق دارەتحانالاردىڭ بولۋىنا دەيىن ويلاستىرىپ قويدىق. سونداي-اق, قازاق, ورىس جانە اعىلشىن تىلدەرىندەگى ۆەب-سايتتى جاساۋدى دا شەشتىك» دەيدى م.يعالي.
كورمەگە قاتىسۋشىلار مەن قوناقتار ساپارلارعا جەڭىل اۆتوكولىكتەرمەن, اۆتوبۋستارمەن, تەمىرجول مەن اۋە قاتىناسى ارقىلى شىعادى. كەيبىر جەرلەردە جاياۋ, سالت اتتى جانە ۆەلوسيپەدپەن دە جۇرە الادى. ولارعا تاۋ وزەندەرى مەن جاساندى كانالدارمەن ءجۇرۋ ءۇشىن ۇرلەنەتىن ۇلكەن قايىقتار – رافتينگ تە ۇسىنىلادى.
ەل جۇرەگى ەلوردا
قر ينۆەستيتسيالار جانە دامۋ مينيسترلىگى تۋريزم يندۋسترياسى دەپارتامەنتىنىڭ ديرەكتورى ايتقانداي, استانا قالاسى بويىنشا التى تۋريستىك باعدار بەلگىلەنگەن. ۇيىمداستىرۋشىلار الدىمەن كورمەگە قاتىسۋشىلار مەن قوناقتارعا ەلوردانىڭ اجارىن ايشىقتايتىن كورىكتى ورىنداردى ارالاتادى. ولاردىڭ قاتارىنا «حان شاتىر» ساۋدا-ويىن-ساۋىق ورتالىعى, «استانا-بايتەرەك» مونۋمەنتى, «ەكسپو» كورمە كەشەنى كىرىپ وتىر. وسى جەردەن شىعىپ, «بۋراباي – قازاقستاننىڭ مارجانى» باعدارلاماسىمەن قوناقتاردى بۇل كۋرورتقا اپارۋ كوزدەلۋدە. ال ودان كەيىن الماتىعا گراند-تۋر ۇيىمداستىرىلماق.
ەكىنشى كەزەڭدە قوناقتار «دۋمان» ويىن-ساۋىق ورتالىعىنا, استانالىق تسيرككە, «اتامەكەن» قازاقستان كارتاسى» ەتنو-مەموريالدىق كەشەنىنە, استانانىڭ ورتالىق ساياباعىنا بارادى. ءارى قاراي «استانا-وپەرا» مەملەكەتتىك وپەرا جانە بالەت تەاترىن, «عاشىقتار» ساياباعىن, «نۇر استانا» مەشىتىن كورەدى. سونداي-اق, ولارعا «ماڭگىلىك ەل» تريۋمف اركاسىن, «قازاق ەلى» مونۋمەنتىن, «نۇرجول» سۋلى-نۋلى جەلەكجولى بويىنداعى بارلىق اسەم عيماراتتاردى كورسەتۋ جوسپارلانۋدا. ارينە, قر تۇڭعىش پرەزيدەنتى – ەلباسىنىڭ كىتاپحاناسى, «ازىرەت سۇلتان» مەشىتى, تاۋەلسىزدىك سارايى, قر ۇلتتىق مۋزەيى, بەيبىتشىلىك جانە كەلىسىم سارايى, «پرەزيدەنتتىك» ساياباعى, مينيسترلىكتەر ءۇيى, «اقوردا» پرەزيدەنت رەزيدەنتسياسى, «قازاقستان» ورتالىق كونتسەرت زالى دا كورسەتىلەدى.
قالعان ءتورت باعىت, سايكەسىنشە, «ەلوردا, سەنىڭ اشىلۋىڭ», «Kazakhstan Switzerland», «Sights of the capital of Kazakhstan» جانە «استانا – ەلىمىزدىڭ جۇرەگى» اتاۋلارىن العان. بۇل باعدارلاردا دا كورمە قاتىسۋشىلارى مەن قوناقتارىنا ۇسىنىلاتىن كورىكتى جەرلەر بارشىلىق. ءبىر سوزبەن ايتقاندا, كورمە كەزىندە ەلوردانىڭ ءسانى مەن ءمانى جاراسقان بارلىق ورىندار پاش ەتىلەدى.
باياناۋىل, ءبىر شەتى قارقارالى
باسقا وبلىستاردى ايتاتىن بولساق, اقمولا وڭىرىندە قوناقتار بۋراباي شيپاجايىنا قوسا, قورعالجىن قورىعىنا بارادى. قاراعاندىنىڭ قارقارالىسى مەن كەرەكۋدىڭ باياناۋىلىنا ساپار شەگەدى. جالپى العاندا, ەلىمىزدىڭ وڭتۇستىگى مەن سولتۇستىگىندەگى, باتىسى مەن شىعىسىنداعى, ورتالىعىنداعى بارشا تاريحي جەرلەردى كورەدى. بۇل تۇرعىدان العاندا, «ەكسپو-2017» حالىقارالىق كورمەسى قازاقستانداعى ءتۋريزمنىڭ دامۋىنا دا ءوزىنىڭ ۇلكەن ۇلەسىن قوسپاق. شىندىعىن ايتقاندا, قازاقستاندىقتاردىڭ وزدەرىنىڭ دە ەلىمىزدە كورەتىن جەرلەر كوپ. سوندىقتان كورمە ۋاقىتىنداعى تۋريستىك ساپارلار بارشاعا قىزىقتى بولادى دەپ ويلايمىز. ات-بابالارىمىز «بالقان, بالقان, بالقان تاۋ, ول دا بىزدەر كورگەن تاۋ» دەپ ايتاتىنداي, ءبىراز جەردى كورەتىن كۇندەرگە بارشامىزدى جەتكىزسىن.
امانعالي قالجانوۆ
