قارجاۋباي سارتقوجاۇلى,
فيلولوگيا عىلىمدارىنىڭ دوكتورى, پروفەسسور
– سايىن ساحارا سارىارقانىڭ توسىنەن, ەسىلدىڭ جاعاسىنان قازاق ۇلتىنىڭ تاۋەلسىزدىگىنىڭ نىشانى بولعان اسەم استانانىڭ بوي كوتەرگەنىنە دە 20 جىلدان استى. بۇل تاريح ءۇشىن از عانا ۋاقىت بولعانمەن, وسى جيىرما جىلدا ارقا توسىنەن اسەم قالا سالدىق. ەندى عانا تاۋەلسىزدىك الىپ, قات-قابات قيىنشىلىق جان-جاقتان قىسىپ تۇرعان كەزدە استانانى كوشىرىپ, قىسقا عانا ۋاقىت ىشىندە وسىنداي اسەم قالا سالۋ – قازاق ەلى ءۇشىن ۇلكەن جەتىستىك. استانانى الماتىدان اقمولاعا كوشىرۋدە ەلباسى نۇرسۇلتان نازارباەۆ ۇلكەن پاراساتتىلىق بايقاتتى. باسىندا كوپ ادام قارسى بولدى, بىراق بۇل ساياسي تۇرعىدان دا, ەكونوميكالىق تۇرعىدان دا دۇرىس شەشىم ەكەنىن, مىنە, ۋاقىت كورسەتتى. شىنىن ايتقاندا, الماتى – ەڭ اۋەلى قورعانىسقا قولايسىز, ەلدىڭ شەتى. ەكىنشىدەن, جاڭا قۇرىلىستار سالۋ ءۇشىن قىرۋار قارجى جۇمسالادى, حالىق تا سىيماي كەتەتىن ەدى. ءتۇرلى جاراتىلىستىق اپاتتاردىڭ تۋىلۋ قاۋپى دە كۇشتى. ال قازىرگى استانامىزدىڭ ورنى وتە ىڭعايلى. جازىق جەردەن قانشا قالا سالساڭ دا تارلىق كورمەيسىڭ. ونىڭ ۇستىنە بۇل قالا – بۇكىل ەلىمىزدىڭ ورتاسى, قالانى قاق جارىپ وزەن اعىپ جاتىر, شىعىس پەن باتىستى, وڭتۇستىك پەن سولتۇستىكتى قوساتىن قاتىناس تورابى بار. بىلايشا ايتقاندا, ەۋرازيا قۇرلىعىنىڭ قاق ورتاسىندا ورنالاسقان. كەزىندە قانىش ساتباەۆ تا قازاق كسر-ءنىڭ استاناسىن قازاقستاننىڭ گەوگرافيالىق ورتالىعى قاراعاندىعا نە تسەلينوگرادقا كوشىرۋدى ۇسىنىپتى. ول كىسى دە رەسپۋبليكانىڭ استاناسى ەلدىڭ تۇكپىرىندە بولماۋى كەرەك دەگەندى ايتقان. كوك تۇرىك داۋىرىندە سارىارقا القابى كەڭورىس دەپ اتالىپتى. ول كەزدە بۇل القاپتا كوپ ەل بولماعان. ەندى, مىنە, سول كەڭورىستىڭ القابىندا ءبىزدىڭ استانامىز پايدا بولدى.
مەن استاناعا 2001 جىلى موڭعوليادان كوشىپ كەلدىم. شىنىمدى ايتايىن, ءبىر ەلدىڭ استاناسىنا ەمەس, ءبىر وبلىستىڭ ورتالىعىنا دا جەتپەيتىن قالاعا كوشىپ كەلگەندەي كۇي كەشتىم. سەبەبى مەن كەلگەن كەزدەگى تسەلينوگراد پەن بۇگىنگى نۇر-سۇلتاندى مۇلدە سالىستىرۋعا كەلمەيدى. ەلدىڭ ەكونوميكالىق قۋاتى دا ناشار ەدى. اۋىر جاعدايدا جۇمىس ءجۇرىپ جاتتى, بىراق قارقىنى باياۋ ەدى. دەگەنمەن بىرنەشە جىلدان كەيىن قالا سالۋ جۇمىسى عاجاپ قارقىن الدى دا, استانا جىلدان-جىلعا تۇرلەنىپ, تولىقسي ءتۇستى. استانانىڭ قۇرىلىسىن سالۋعا اتسالىسقان جۇمىسشىلاردىڭ اراسىندا شىمكەنت قازاقتارى مەن موڭعوليادان كەلگەن ازاماتتار كوپ بولدى. دەمەك, قالانى دا قازاقتار ءوزى سالدى دەپ ايتۋعا بولادى.
استانانىڭ اۋا رايى دا وزگەردى. ونى وزگەرتكەن باستى سەبەپ – ەلوردانىڭ اينالاسىنداعى 100 مىڭ گەكتارعا جۋىق جاسىل بەلدەۋ. ەلوردانىڭ قىسى دا بۇرىنعىداي ەمەس, جۋاسىدى. «اكەڭنەن مال قالعانشا, تال قالسىن» دەيدى اتامىز قازاق. بۇل دا ءبىزدىڭ كەلەر ۇرپاققا جاساعان ۇلكەن سىيىمىز.
