ەل اراسىندا «جاقسى جاكەم» اتالىپ كەتكەن جانقۇتتى بوتانتايۇلى قاراعاندى وبلىسىنىڭ شەت اۋدانىندا دۇنيەگە كەلگەن. جانقۇتتى ءوز زامانىنىڭ ءادىل ءبيى, وت اۋىزدى, وراق ءتىلدى شەشەنى شابانباي بي بىلاي دەپ باتاسىن بەرگەن ەكەن: «اعايىنعا جاعام دەسەڭ – قازاندى بول, حالقىڭا جاعام دەسەڭ – ءادىل بول, سۋداي تازا بول, جەردەي بەرىك بول, ءومىرىڭ ۇزاق بولسىن, ايماعىڭ سۋات بولسىن, ءسوزىڭ حالقىڭا قۋات بولسىن!».
ول زامانداستارى كۇنانباي, الشىنباي, قۇسبەك تورە سياقتى ەل جاقسىلارىمەن قارىم-قاتىناستا بولعان. بۇگىندە جانقۇتتىنىڭ ەت تاباعى جازۋشى كامەل جۇنىستەگىنىڭ قولىندا ساقتاۋلى تۇر. «ەسكىنىڭ كوزىنە 200 جىلدان استام ۋاقىتتىڭ جوباسى بولىپ قالعان شىعار. بۇل تاباقتان بەس اتانىڭ يگى جاقسىلارىمەن بىرگە, بايسەيىت, دۇيسەنباي, قارا, ءدىناسىل سىندى ابزالدار دا ءدام تاتقان. كەنەسارىنىڭ دا وسى تاباقتان ءدام تاتقانى تۋرالى مىناداي دەرەك بار. ونى ءدىناسىل دەگەن قوجانىڭ ۇرپاقتارىنان ەستىپ ەدىم. ولار شەت اۋدانىنان وتەتىن قاناقا وزەنىنە كەنەسارىنىڭ كەلگەن ساپارىندا شومىلعانىن ايتاتىن. سول جولى سۇلتاندى ەلدىڭ باسشىلارى قوناققا شاقىرىپ قۇرمەت كورسەتەدى. قاسيەتتى جادىگەر 1929 جىلعا دەيىن جانقۇتتى ءبيدىڭ شوبەرەسى قارعاجاننىڭ قولىندا بولعان. ۇلى كامپەسكە باستالعاندا, بىردە تۇندەلەتىپ قارعاجان ءبىزدىڭ نەمەرە اكەمىز كوپجانعا كەلىپ: «مىنا تاباققا يە بولاتىن سىزدەن باسقا ەشكىمدى كورە الماي تۇرمىن» دەپ اتاسىنان قالعان تاباقتى تابىستايدى. ال ءوزى ءبىر تۇندە الماتى جاققا قاشىپ كەتىپ, باس ساۋعالايدى.
كوپجاننىڭ جالعىز ۇلى ءالى اكەسىنىڭ الدىندا دۇنيەدەن ءوتتى. ودان كەيىن كوپ ۇزاماي اكەمىز دە ومىردەن وزدى. جەڭگەمىزدەن تاباقتى بىرەۋلەردىڭ سۇراپ الىپ كەتكەنىن ەستىپ ءبىلدىم. جادىگەردىڭ جايىن سىرتتاي ءبىلىپ ءجۇرىپ, جانقۇتتىنىڭ ۇرپاقتارىنا اتالارىڭنىڭ كوزى عوي, اۋلەتتەرىڭدە ۇستاڭدار دەپ ەدىم, اسا نيەت بىلدىرە قويمادى. سودان ءبىر تايىمدى بەرىپ, تاباقتى الدىرىپ ەدىم. بۇل جادىگەردىڭ بار قۇپياسى وسى» دەيدى كامەل اعا.
