ەرتەڭ ەركەعالي راحماديەۆ اتىنداعى مەملەكەتتىك اكادەميالىق فيلارمونيا مەكەمەگە بەلگىلى كومپوزيتوردىڭ ەسىمىن بەرۋ قۇرمەتىنە ارناپ سالتاناتتى كونتسەرت ۇسىنادى. كونتسەرتكە شىعارماشىلىق ۇجىمدار مەن سوليستەر قاتىسادى.
بيىل مۋزىكا قاۋىمى كسرو حالىق ءارتىسى, قازاقستاننىڭ ەڭبەك ەرى, قازاقتىڭ كورنەكتى كومپوزيتورى, پەداگوگ, قوعام قايراتكەرى ەركەعالي راحماديەۆتىڭ تۋعانىنا 90 جىل تولۋىن اتاپ وتۋدە. ونىڭ «دايراباي» جانە «قۇداشا-دۋمان» سيمفونيالىق كۇيلەرى, «قامار سۇلۋ», «الپامىس» جانە «ابىلاي حان» وپەرالارى, رومانستار مەن اندەرى, جالپى كوپتەگەن شىعارمالارى ۇلتتىق كومپوزيتورلىق مەكتەپ ءۇشىن ەرەكشە تۋىندىلارعا اينالدى.
ماەسترونىڭ شىعارماشىلىق قىزمەتى 2004 جىلدان باستاپ ەلوردامەن تىعىز بايلانىستى بولدى. ەركەعالي راحماديەۆ ءومىرىنىڭ سوڭعى كۇندەرىنە دەيىن ءوزىنىڭ تالانتىن, تاجىريبەسى مەن ءبىلىمىن اينالاسىنداعىلارمەن قۋانا ءبولىسىپ وتىردى.
ونىڭ ەسىمىنىڭ جەڭىس داڭعىلى بويىندا ورنالاسقان, قازاق ۇلتتىق ونەر ۋنيۆەرسيتەتىنىڭ ۇلكەن زالىنا جانە بىلتىر ەلوردانىڭ مەملەكەتتىك اكادەميالىق فيلارمونياعا بەرىلۋى قالانىڭ ماڭىزدى وقيعالارىنىڭ بىرىنە اينالدى. وسى ايتۋلى وقيعاعا وراي فيلارمونيانىڭ ۇجىمى مەن ورىنداۋشىلارى سالتاناتتى مەرەكەلىك كونتسەرت ۇسىنادى.
كەش بارىسىندا ماەسترونىڭ ەڭ تانىمال تۋىندىلارى, سونىڭ ىشىندە وپەرالاردان ۇزىندىلەر, سيمفونيالىق كۇيلەر جانە ت. ب. ورىندالادى. كونتسەرتكە قازاق وركەسترى, سيمفونيالىق وركەستر, كامەرالىق حور, «شالقىما» حالىق بي ءانسامبلى, عازيزا جۇبانوۆا اتىنداعى مەملەكەتتىك ىشەكتى اسپاپتار كۆارتەتى, «قورقىت» ەتنوانسامبلى جانە جەكە ورىنداۋشىلار – قازاقستاننىڭ جانە تاتارستاننىڭ حالىق ءارتىسى نۇرجامال ۇسەنباەۆا, قازاقستاننىڭ ەڭبەك سىڭىرگەن قايراتكەرلەرى ازامات جىلتىركوزوۆ, بيبىگۇل جانۇزاق, سۆەتلانا ايتباەۆا, ارايلىم راحىمقىزى, سونداي-اق فيرۋزا راحمەتوۆا, التىنبەك ءابىلدا جانە ت. ب. قاتىسادى.
