تورتجىلدىقتىڭ باستى دوداسى – مۋنديال-2022 باستالدى. قازىر ميلليونداعان جانكۇيەر ءوز كومانداسىنىڭ ويىن ورنەگىن باقىلاپ, نازارى فۋتبول قويىلىمىنا اۋدى. الدىمەن قاتارداعى چەمپيوناتتىڭ نەگىزگى ەرەكشەلىگى, فاۆوريت كوماندالار مەن العاشقى ويىنداردى تالداساق.
بەس ەرەكشەلىگى نەدە؟
ءبىرىنشىسى – الەم چەمپيوناتى قىستا وتۋدە. ياعني تۋرنير العاش رەت كۇزدە جانە قىستا وتكىزىلدى. مۇنىڭ ءبارى قاتاردىڭ كليماتتىق ەرەكشەلىگىنە بايلانىستى ەكەنى انىق.
ەكىنشىسى – بۇل الەم چەمپيوناتىندا زاماناۋي تەحنولوگيا قولدانىلادى. جاڭا تەحنولوگياعا ستاديون توبەسىندە ورناتىلعان 12 ارنايى قاۋىپسىزدىك كامەراسى مەن شارلارداعى سەنسورلار كىرەدى. بۇل قۇرىلعى ويىنشىلاردىڭ الاڭداعى ورنىن ءدال انىقتاۋ ءۇشىن وفسايدتى انىقتاۋ كەزىندە كامەرالار سەكۋندىنا 50 كادر جىلدامدىعىمەن ءاربىر جەكە ويىنشىنىڭ 29 نۇكتەسىنە دەيىن تۇسىرە الادى.
ءۇشىنشىسى – الەم چەمپيوناتىندا العاش رەت نازىك جاندىلار باس تورەشى رەتىندە قىزمەت اتقارادى. ولار: ستەفاني فراپپار (فرانتسيا), ساليما مۋكانسانگا (رۋاندا) جانە يوشيمي ياماشيتا (جاپونيا).
ءتورتىنشىسى – الەم چەمپيوناتىنا قاتار 8 ستاديون سالدى. بۇل ستاديونداردىڭ ەرەكشەلىگى – جارتىسى بولشەكتەلىپ, باسقا ەلدەرگە تاسىمالدانادى نە سپورتتىق ەمەس نىساندارعا اينالادى.
بەسىنشىسى – جاتتىقتىرۋشىلار ءار ماتچتا 5 اۋىستىرۋ جاساي الادى جانە جانكۇيەرلەردىڭ ستاديوندا سىرا ىشۋىنە رۇقسات ەتىلمەيدى.
نەگىزگى فاۆوريت كىم؟
سپورت ساراپشىلارى برازيليا قۇراماسىنا 5,50 كوەففيتسيەنت بەرىپ, باستى فاۆوريتكە جاتقىزادى. وڭتۇستىك امەريكانىڭ ىرىكتەۋ ايماعىن وڭاي جەڭىپ, 17 كەزدەسۋدە 40:5 گول تىركەلدى. بۇل گولداردىڭ ۇشتەن بىرىنەن استامىن نەيمار مەن ريشارليسون سوقتى.
ارگەنتينا قۇراماسىنا 7.00 دەگەن باعا بەرىلىپ وتىر. امەريكا كۋبوگىنىڭ جەڭىمپازى مىقتى شابۋىلداۋشى كوماندا رەتىندە ەرەكشەلەنەدى.
ەكس-چەمپيون – فرانتسيا قۇراماسىنىڭ جەڭىسى 7,50 كوەففيتسيەنتپەن باعالانادى. بۇل قۇراما ءوز تاريحىندا ەكى رەت چەمپيون اتانعان-دى. ەندى يتاليا مەن برازيليانىڭ ەرلىگىن قايتالاپ, ءوزىنىڭ چەمپيون اتاعىن قورعاي الا ما؟
بۇل قاتارعا انگليا مەن يسپانيانى دا قوسۋ كەرەك. ەكى كوماندا دا ءوز تاريحىندا ەكىنشى رەت كۋبوكقا يە بولۋدى مۇرات ەتەدى. ءارى مۋنديالعا سول ءۇشىن كەلدى.
العاشقى توپتىق ويىندار
ءبىرىنشى سەنساتسيالىق ويىنعا توقتالايىق. بۇل – ارگەنتينا مەن ساۋد ارابيا اراسىندا وتكەن ماتچ. شىنى كەرەك, ليونەل مەسسيدىڭ قالىڭ جانكۇيەرى بۇل ويىندى اسىعا كۇتكەنى انىق. ءارى بۋكمەكەرلىك كەڭسەلەرگە قوماقتى قارجى تىگىپ, سۇيىكتى كومانداسى ۇتاتىنىنا سەندى. الايدا جەڭىس ارابتاردىڭ ۋىسىندا كەتتى.
جالپى ارگەنتينا مەن ساۋد ارابياسى اراسىنداعى كەزدەسۋدىڭ تاريحىنا توقتالاتىن بولساق, العاشقى كەزدەسۋ 1988 جىلى 6 شىلدەدە ءوتىپ, 1:1 ەسەبى تىركەلگەن-ءدى. ارادا 10 كۇن وتكەندە ەكى كوماندا قايتا كەزدەسىپ, ليونەل سكالوني باپتايتىن ارگەنتينالىقتار 2:0 ەسەبىمەن باسىم ءتۇستى.
1992 جىلى 20 قازاندا كونفەدەراتسيا كۋبوگىنىڭ فينالىندا ارگەنتينا قۇراماسى 3:1 ەسەبىمەن ۇتادى. ارادا 10 جىل وتكەندە – 2012 جىلى 14 قاراشادا دوستىق كەزدەسۋدە ەكى كوماندانىڭ فۋتبولشىلارى قاقپادان ساڭىلاۋ تاپپايدى.
ارادا تاعى 10 جىل وتكەندە – الەم چەمپيوناتىنىڭ توپتىق كەزەڭىندە «سارى قۇرلىقتىڭ» 3 دۇركىن چەمپيونى ساۋد ارابيا قۇراماسى لاتىن امەريكانىڭ 16 دۇركىن چەمپيونى ارگەنتينانى 1:2 ەسەبىمەن ۇتتى. ءسويتىپ, ءوز تاريحىندا تۇڭعىش رەت ازيالىق كوماندا لاتىنامەريكالىق ۇجىمنان باسىم ءتۇستى. وسىلايشا ارگەنتينانى اڭ-تاڭ, مەسسيدى مەڭ-زەڭ ەتكەن ويىن بولدى.
يراندى ايقىن باسىمدىقپەن ۇتقان انگليا (6:2) مەن اۋستراليانى تىزە بۇكتىرگەن فرانتسيا (4:1) ءتۋرنيردى سەنىمدى باستادى. بۇل كوماندالار مۋنديالعا بابىندا كەلىپتى. ەندى حورۆاتيا, گەرمانيا, برازيليانىڭ ويىنىن باقىلاپ, چەمپيوندىققا لايىقتى كوماندانىڭ ويىنىن تالدايتىن بولامىز.
