وليمپياداعا 100 كۇن قالدى
ەلوردادا بيىل جازدا پاريجدە وتەتىن جازعى وليمپيادا ويىندارىنىڭ باستالۋىنا 100 كۇن قالۋىنا وراي بۇقارالىق جۇگىرۋ ءىس-شاراسى ءوتتى. استانا قالاسىنىڭ دەنە شىنىقتىرۋ جانە سپورت باسقارماسىنىڭ «بۇقارالىق-سپورتتىق ءىس-شارالاردى وتكىزۋ جونىندەگى ديرەكتسياسى ۇيىمداستىرعان وليمپيادالىق جۇگىرۋگە قاتىسۋشىلار 5 شاقىرىمدى ەڭسەردى.
جۇگىرۋگە جاس شاماسى شەكتەلمەي, بالالار مەن ەرەسەك ادامدار قاتار جۇگىردى. بۇل ءىس-شارا سپورتتىق جارىس ەمەس, وليمپياداشىلارعا كورسەتىلگەن قولداۋ رەتىندە وتكىزىلدى.
دەنە شىنىقتىرۋ جانە سپورت باسقارماسىنىڭ بۇقارالىق سپورتتى جوسپارلاۋ ءبولىمىنىڭ مەنەدجەرى توميريس سمايلوۆا وليمپيادالىق جۇگىرۋ ءىس-شاراسى پاريج وليمپياداسىنا 100 كۇن قالۋىنا وراي ۇيىمداستىرىلعانىن ايتتى.
«جۇگىرۋگە قاتىسقان قالا تۇرعىندارى 5 شاقىرىم قاشىقتىقتى كوڭىلدى كۇيمەن جۇگىرىپ ءوتتى. قاتىسۋشىلار تەك قانا جۇگىرىپ قويماي, دەمەۋشىلەردىڭ كومەگىمەن ۇيىمداستىرىلعان لوتەرەيا ويىنىندا دا باقتارىن سىنادى. سونداي-اق قول كۇرەسى جانە ارقان تارتۋ سەكىلدى سايىستاردى تاماشالادى. ءبىز وسى ءىس-شارا ارقىلى پاريجدە ەل نامىسىن قورعايتىن سپورتشىلارىمىزعا قولداۋىمىزدى بىلدىرمەك بولدىق» دەدى سپورت باسقارماسى وكىلى.
شىن مانىندە, وليمپياداعا ارنالعان بۇقارالىق جۇگىرۋ ەلوردالىقتاردىڭ كوڭىل-كۇيىن كوتەرگەن ءىس-شارا بولدى.