استاناداعى بايتەرەك مونۋمەنتىندە بالانىڭ جىنىسىن انىقتاۋ ءۇشىن ۇيىمداستىرىلاتىن كوڭىلدى ءراسىم «گەندەر پاتي» ءوتىپ ءجۇر, دەپ حابارلايدى astana-akshamy.kz
بۇعان دەيىن الەۋمەتتىك جەلىدە جۇپتاردىڭ «گەندەر كەشىنەن» بىرنەشە ۆيدەو جۇكتەلگەن.
Azattyq Ruhy ءتىلشىسى «بايتەرەك» اكىمشىلىگىنە رەسمي حات جولداپ, ءراسىمنىڭ باعاسى مەن ونى وتكىزۋ تالاپتارى تۋرالى سۇراپ كوردى.
Gender reveal party – بالانىڭ جىنىسىن انىقتاۋ ءۇشىن جاسالاتىن كىشىگىرىم توي. قازاق سالتىنداعى «قۇرساق شاشۋ» ءداستۇرىنىڭ جاڭارتىلعان ءتۇرى دەۋگە كەلەدى. بولاشاق اتا-انا دارىگەردەن بالانىڭ جىنىسىن قاعازعا جازىپ, مەرەكەلىك شارانى وتكىزەتىن جاقىندارىنا, دوستارىنا بەرۋىن وتىنەدى. وسىلايشا وزدەرىنە توسىن سىي جاسايدى. قىزىل ءتۇس – قىزدى, كوك ءتۇس – ۇلدى بولاتىندارىن بىلدىرەدى.
بايتەرەك مونۋمەنتىندا انا قۇرساعىندا جاتقان ءسابيدىڭ جىنىسىن ءبىلۋ ءۇشىن, قىز بولسا – قىزىل, ۇل بولسا – كوك ءتۇستى جارقىراتۋ قۇنى 30 مينۋتقا – 70 مىڭ تەڭگە تۇرادى. ال, نەكە قيۋ ءراسىمىن وتكىزۋدىڭ قۇنى – 45 مىڭ تەڭگە.
«Astana Venue Management» جشس باس ديرەكتورى مالىك حاسەنوۆتىڭ ايتۋىنشا, جارتى جىلدا 3 رەت «گەندەر پاتي» وتكەن. بايتەرەك مونۋمەنتىندە «گەندەر كەشىنەن» باسقا دا ارنايى جارىقتاندىرۋدى قاجەت ەتەتىن ءىس-شارالار وتەدى ەكەن.
«ءىس-شارانى كەشكى ۋاقىتتا وتكىزۋگە بولادى. ۇيىمداستىرۋشى مەن ورىنداۋشى الدىن الا سۇراقتارىن تالقىلاپ, قاجەتتى ءتۇستى جانە ۋاقىتتى تاڭدايدى. سونىمەن قاتار, حالىقتىڭ قاۋىپسىزدىگىنە قاتەر توندىرەتىن جانە مونۋمەنت اۋماعىن ءبۇلدىرۋى ىقتيمال ماتەريالداردى قولدانۋعا, ماسەلەن, سىرلى بوياۋ, كونفەتتي, فەيەرۆەرك جانە باسقالارىنا رۇقسات ەتىلمەيدى. مونۋمەنتتىڭ 3-قاباتىندا نەكە قيۋ ءراسىمىن وتكىزۋگە, فوتو جانە بەينەتۇسىرىلىم جۇرگىزۋگە ارنالعان ورىندار بار», – دەدى ول.
«Astana Venue Management» جشس – بەيبىتشىلىك جانە كەلىسىم سارايى, بايتەرەك مونۋمەنتى سياقتى استانا قالاسىنىڭ ەڭ ءىرى مادەني نىساندارىن باسقارۋشى ءبىرتۇتاس كومپانيا. ول ەلوردا اكىمدىگىنىڭ 100% قاتىسۋىمەن قۇرىلعان.
«استانا قالاسىنىڭ كوممۋنالدىق مۇلكىن «Astana Venue Management» جاۋاپكەرشىلىگى شەكتەۋلى سەرىكتەستىگىنە سەنىمگەرلىك باسقارۋعا بەرۋ تۋرالى» استانا قالاسى اكىمدىگىنىڭ قاۋلىسىنا سايكەس بايتەرەك مونۋمەنتىن سەنىمگەرلىك باسقارۋعا بەرۋ تۋرالى كەلىسىمشارتى جاسالعان. كەلىسىمشارتقا سايكەس, سەرىكتەستىك بايتەرەك مونۋمەنتىندە قىزمەتتەردى بەكىتىلگەن باعا پرەيسكۋرانتى بويىنشا اقىلى نەگىزدە كورسەتەدى», – دەدى مالىك حاسەنوۆ.
