ەلوردالىق ليتسەيدە شاحمات سىنىبى اشىلدى

2024 جىلدىڭ 29 ساۋىرىندە KazChess/قازاقستان شاحمات فەدەراتسياسى Freedom Broker جانە «Freedom شاپاعات» ەق قولداۋىمەن استانا قالاسىنداعى №8 مەكتەپ-ليتسەيىندە شاحمات سىنىبىن اشتى.

ەلوردالىق ليتسەيلەردىڭ بىرىندە شاحماتسىنىبىنىڭ اشىلۋى – KazChess/قازاقستان شاحمات فەدەراتسياسىنىڭ وقۋ-اعارتۋ مينيسترلىگىمەن, عىلىم جانە جوعارى ءبىلىم مينيسترلىگىمەن جانە جەرگىلىكتى اتقارۋشى ورگاندارمەن بىرلەسىپ جۇزەگە اسىرىپ جاتقان «ءبىلىم بەرۋدەگى شاحمات» جوباسىن ىلگەرىلەتۋدەگى تاعى ءبىر قادام.

پيلوتتىق جوبانىڭ نەگىزگى ماقساتتارىنىڭ ءبىرى – قازاقستان رەسپۋبليكاسىندا شاحماتتى دامىتۋدىڭ 2023–2027 جىلدارعا ارنالعان كەشەندى جوسپارىنا سايكەس «باستاۋىش سىنىپتاعى بالالاردى شاحمات ۇيرەتۋمەن 20% ۇلەسپەن قامتۋ».

شاحمات سىنىبىنىڭ سالتاناتتى اشىلۋىنا KazChess ءبىرىنشى ۆيتسە-پرەزيدەنتى سادۋاقاسوۆ دارمەن, استانا قالاسى ءبىلىم باسقارماسىنىڭ باسشىسى سەنعازىەۆ قاسىمحان جانە استانا قالاسى №8 مەكتەپ-ليتسەيىنىڭ ديرەكتورى ايتيموۆا گۇلنۇر قاتىستى.

«مەملەكەت الدىنداعى جاۋاپكەرشىلىگىن سەزىنە وتىرىپ, KazChess/قازاقستان شاحمات فەدەراتسياسى ينتەللەكتۋالدى ۇلتتى قالىپتاستىرۋعا بەلسەندى اتسالىسۋدا. شاحمات ويناۋ تاباندىلىقتى, ستراتەگيالىق ويلاۋدى, توزىمدىلىكتى دامىتىپ, وقۋشىنىڭ ناتيجەلى بولۋىنا ىقپال ەتەتىنى بەلگىلى. جوبا اياسىندا بۇدان دا كوپ وقۋ ورىندارىن قامتۋدى جوسپارلاپ وتىرمىز. پيلوتتىق جوبا مەكتەپتەر ءۇشىن ستاندارت بولۋى كەرەك», – دەدى قۇتتىقتاۋ سوزىندە KazChess ءبىرىنشى ۆيتسە-پرەزيدەنتى دارمەن سادۋاقاسوۆ.

قازىرگى ۋاقىتتا جوبا اياسىندا بارلىق دەڭگەيدە ەكى ءبىلىم بەرۋ باعدارلاماسى ازىرلەنىپ, كەلىسىلدى: ءبىرى 1–4 سىنىپ وقۋشىلارى ءۇشىن, ەكىنشىسى شاحمات مۇعالىمدەرىنىڭ بىلىكتىلىگىن ارتتىرۋعا ارنالعان. سونىمەن قاتار قازاقستاننىڭ كەيبىر جوعارى وقۋ ورىندارىندا شاحماتتان قوسىمشا ءبىلىم بەرۋ باعدارلاماسى ەنگىزىلۋدە. قازىرگى تاڭدا مۇعالىمدەرگە ارنالعان وقۋلىقتان, جۇمىس داپتەرلەرىنەن جانە وقۋلىقتان تۇراتىن وقۋ-ادىستەمەلىك كەشەنى بەكىتىلىپ جاتىر. سونىمەن قاتار, مۇعالىمدەرگە توپتىق ساباقتاردى ءتيىمدى وتكىزۋگە كومەكتەسۋ ءۇشىن «Chess class» اتتى ونلاين پلاتفورماسى ازىرلەندى.

بۇگىنگى تاڭدا KazChess Freedom Broker جانە كق «Freedom شاپاعات» قولداۋىمەن ەلىمىزدىڭ 7 ايماعىنداعى 7 بازالىق مەكتەپكە شاحماتتى ساپالى وقىتۋعا ارنالعان تولىق جيىنتىقتى (جيھاز, تەحنيكالىق قۇرال-جابدىقتار, شاحمات جابدىقتارى) قامتاماسىز ەتتى.

شاحمات ءپانىن بۇگىندە ەلىمىزدىڭ جەتى وبلىسىنداعى 42 مەكتەپتە باستاۋىش سىنىپ مۇعالىمدەرى وقىتادى, وقۋعا مىڭنان استام ءبىرىنشى سىنىپ وقۋشىلارى قامتىلعان. 2024-25 جاڭا وقۋ جىلىندا جوباداعى مەكتەپتەردىڭ سانىڭ 350-گە دەيىن قامتۋ جوسپارلانۋدا. KazChess شاحمات ويىنى ارقىلى جاس قازاقستاندىقتاردىڭ اقىلدى, ءبىلىمدى جانە تاربيەلى بولۋىنا ۇلەس قوسۋىن جالعاستىرادى.