ءجاميلا باقبەرگەنوۆا – ەلدەگى ەڭ تانىمال بالۋان قىز. نامىس پەن رۋحتى, جىگەر مەن قايراتتى بويىنا سىڭىرگەن ول ءوزى قاتىسقان جارىستاردان جۇلدەسىز قايتقان ەمەس. بۇل – بالا كۇنىنەن قالىپتاسقان داعدى. ونى كوپتەن ەرەكشەلەيتىن قاسيەت-قابىلەتى دە وسى.
بيىل جاقسىلىق ۇشكەمپىروۆ اتىنداعى سپورت سارايىنا ازيانىڭ مىقتى سپورتشىلارى جينالىپ, قۇرلىقتىڭ ۇزدىكتەرىن انىقتاعان-دى. وسى تۋرنيردە ءجاميلانىڭ كۇرەسىن كوردىك. كىلەمدە ءوزىن سەنىمدى ۇستاپ, ءادىس-ءتاسىلدى ورىنداۋ شەبەرلىگىنە ءتانتى بولدىق. اقتىق ايقاستا ءجاميلانىڭ قارسىلاسى جاپون سۋميرە نيكۋرا بولدى.
كۇنشىعىس ەلى كۇرەستىڭ ءدال وسى تۇرىنەن ۇستەمدىك قۇرىپ تۇر. الەم چەمپيوناتىن 13 رەت ۇتقان ساوري ەسيدا دا, وليمپيادا ويىندارىن 4 رەت جەڭگەن كاوري يچو دا جاپون وكىلى. قىسقاسى, جاپونيا بايراقتى باسەكەلەرگە تەك ۇزدىك سپورتشىلارىن قوسادى. سۋميرە نيكۋرا دا وسال بالۋان ەمەس. ءبىر جىل بۇرىن موڭعوليانىڭ استاناسى – ۇلان-باتىردا وتكەن ازيا چەمپيوناتىنىڭ فينالىندا جاميلامەن كەزدەسىپ, ءبىزدىڭ بالۋان ەكىنشى رەت قۇرلىقتىڭ ۇزدىگى اتانعان ەدى. سوندىقتان سۋميرە رەۆانش الۋ ءۇشىن استاناعا كەلدى. جەرگىلىكتى جانكۇيەردىڭ قولداۋىن سەزىنگەن ءجاميلا قارسىلاسىن 5:1 ەسەبىمەن ۇتىپ, كەزەكتى رەت ازيا چەمپيونى اتاندى. ءسويتىپ, كۇرەستەن ءۇش دۇركىن ازيا چەمپيونى اتانعان تۇڭعىش قازاق بالۋان بولىپ, قازاقستان تاريحىنىڭ جاڭا بەتىن اشتى.
ءجاميلا – ازيا چەمپيوناتىندا 5 رەت جۇلدە العان سپورتشى. 2020 جىلى نيۋ-دەليدە, 2022 جىلى ۇلان-باتىردا, 2023 جىلى استانادا التىن مەدال يەلەنسە, 2019 جىلى سياندا قولا مەن 2021 جىلى الماتىدا كۇمىس مەدالعا قولى جەتتى. ودان بولەك, 2019 جىلى وسلودا, 2022 جىلى بەلگرادتا وتكەن الەم چەمپيوناتىندا, 2023 جىلى حانچجوۋدا بايراعى كوتەرىلگەن ازيا ويىنىندا ەكىنشى ورىن الدى. سپورتتاعى جەتىستىگى ەسكەرىلىپ, 2022 جىلى ءوز سالماعىندا UWW رەيتينگىندە كوش باستادى, قازاقستاننىڭ ۇزدىك سپورتشىسى اتاندى.
– ءوزىم قاتىسقان جارىستاردان جۇلدەسىز ورالعان ەمەسپىن. بۇل – ۇزدىكسىز ەڭبەك پەن ىزدەنىستىڭ ناتيجەسى. الەم چەمپيوناتىنىڭ فينالىندا ەكى رەت جولىم بولماعانى ازداپ قىنجىلتادى. الەم چەمپيوناتىنىڭ التىن مەدالى ءۇشىن كۇرەسۋدى توقتاتپايمىن. باستى ماقساتىم – پاريج وليمپياداسىنىڭ شىڭىن باعىندىرۋ, – دەيدى چەمپيون رۋحتى بالۋان.
ءبىز بالۋاننان العاشقى جانە ەڭ ۇلكەن جەڭىسى تۋرالى سۇرادىق. ويتكەنى سپورتشىنىڭ العاشقى جارىستاعى جەتىستىگى كەلەشەكتەگى جولىنا اسەر ەتپەي مە؟!
– العاشقى جارىسىم الماتىداعى تاەكۆوندودان قالالىق تۋرنير بولدى. ۇزىناعاشتا تۇراتىنبىز. 4-سىنىپ وقيمىن. جارىسقا بارىپ-قايتاتىن قارجىنى انام بەردى. جارىسقا سىڭارىم ءمادينا دا بارعان-دى. قارسىلاستارىمنىڭ وسال تۇسىن تاۋىپ, فينالعا شىقتىم. الايدا فينالدىڭ 1-راۋندىندا جەڭىلىپ جاتتىم. ءمادينا راۋند ارالىق ۇزىلىستە قاسىما جۇگىرىپ كەلىپ, «مامام اقشانى ۇتىلسىن دەپ بەردى مە؟» دەپ ايقايعا باستى. وسىدان كەيىن جينالىپ, كۇش-جىگەرىمدى سالىپ, ۇتىپ, قاتتى قۋاندىم. ءبىرىنشى جارىسىمدا وسىنداي ەرەكشە اسەر الدىم. نەگىزى, ءار چەمپيوننىڭ ارتىندا قولداۋشى مىقتى انا تۇرادى عوي. ەڭ ۇلكەن جەڭىسىمە كەلەتىن بولساق, ءاربىر جارىستاعى جەتىستىك ۇلكەن ەڭبەكتىڭ ناتيجەسىمەن كەلەدى. ازيا چەمپيوناتىندا 1-ورىن العان كەزدە قۋاندىم. بىراق مەنىڭ ەڭ بيىك جەتىستىگىم دەپ ايتا المايمىن. مەنىڭ شىڭىم – وليمپيادا ويىندارىنىڭ شىڭى. وسى ماقساتتا تەر توگىپ كەلەمىن, – دەدى ماقساتشىل سپورتشى.
ءار بالۋان كۇرەسكەندە ءادىس-ءتاسىل جاساۋعا ىڭعايسىز قارسىلاسى بولادى. سپورتشى قارسىلاسىنان كەيدە پسيحولوگيالىق, كەيدە تاكتيكالىق تۇرعىدا ۇتىلىپ جاتادى. كەيدە جارىسقا بابىندا بارا الماي, جولىنان جاڭىلادى. جəميلا باقبەرگەنوۆا ءار جىلى وتكەن الەمدىك دودالاردا قىرعىز ايپەرى مەدەتقىزىنا, موڭعول داۆااناسان ەنح-امارينعا, جاپون ماساكو فۋرۋيچيگە, امەريكالىق اميت ەلورعا ۇپاي سانىمەن ەسە جىبەرگەنىن بىلەمىز. ودان باستى قارسىلاسى كىم ەكەنىن بىلدىك.
– مەنىڭ باستى قارسىلاسىم – ءوزىم. كەز كەلگەن قارسىلاستىڭ وسال تۇسى بار. ەگەر باپكەردىڭ بەرگەن اقىل-كەڭەسىن دۇرىس ورىنداپ, تاكتيكالىق تۇرعىدا ساۋاتتى كۇرەسسە, ءبارىن دە ۇتۋعا بولادى, – دەيدى ول.
قازىر ءجاميلا 27-جاستا. تاجىريبەسى تولىسقان, تەحنيكالىق شەبەرلىگى شىڭدالعان ول كەز كەلگەن جارىسقا ءوز سالماعىندا نەگىزگى فاۆوريت رەتىندە قاتىسادى. سوندىقتان پاريج وليمپياداسىندا جۇلدە الاتىن مۇمكىندىگى مول.
– بەلگرادتاعى الەم چەمپيوناتى مەن حانچجوۋدا ازيا ويىنىنىڭ اراسى ەكى اپتا بولدى. ءبىر جاعى تولىق دەمالىپ ۇلگەرمەدىم-اۋ, ەكىنشى جاعى ازيادا باسەكەسىندە جاڭا سالماقتا كۇرەستىم. ارينە, مۇنىڭ ءبارى جەڭىلىستى اقتالۋعا سەبەپ ەمەس. دايىندىعىمدى كۇشەيتىپ, الداعى جارىستاردا جەڭىستى جولدى جالعاستىرۋعا كۇش سالامىن, – دەيدى كەيىپكەرىمىز.
P.S: مىنە, ەلدىڭ ماقتانىشى ءجاميلاداي-اق بولۋى كەرەك. ماقساتى ايقىن, تالابى بيىك بالۋاننىڭ باعىندىرار بيىگى كوپ بولىپ, ەل ابىرويىن بيىكتەتە بەرسىن!
