ادام بالاسى ءۇشىن باسقا ادامداردىڭ سەنىمىنە يە بولۋدان اسقان ابىروي جوق. بيىلعى جىلدىڭ باسىندا, مەن مىڭداعان ەلوردالىقتىڭ سەنىمىنە يە بولىپ, باس قالانىڭ ۋاكىلەتتى ورگانى – ءماسليحاتتىڭ دەپۋتاتى اتاندىم. قالا شەتىندەگى «ينتەرناتسيونالنىي», «ميچۋرين», «كۇيگەنجار», «پرومىشلەننىي», «تەمىرجولشىلار» كەنتتەرىنىڭ تۇرعىندارى ءوز داۋىسىن بەرىپ, سەنىمىن ارتتى. 32 مىڭ ادامنىڭ داۋسىنىڭ سىرتىندا سونشا تاعدىر تۇر.
ماعان وكرۋگ تۇرعىندارىنىڭ كۇندەلىكتى بەتپە-بەت كەزدەسىپ جۇرگەن پروبلەمالارى جاقسى تانىس. جارتى جىلعا جۋىق ۋاقىتتا جۇزدەگەن اداممەن جۇزدەسىپ, ولاردىڭ كوكەيىن تەسكەن ماسەلەلەرىنە قۇلاق تۇردىك. ونىڭ ىشىندە ەڭ باستىسى – تۇرعىن ءۇي ماسەلەسى. وسى ورايدا, ەلباسىنىڭ بيىلعى جولداۋىنا سايكەس, ۇكىمەت «قولجەتىمدى باسپانا» باعدارلاماسىن ازىرلەدى. بيىل ەل اۋماعىندا 450 مىڭ شارشى مەتر جاڭا باسپانا سالىنادى. باعدارلامادا 2014 جىلدان 2020 جىلدار ارالىعىندا جىل سايىن 1,3 ملن شارشى مەتر پاتەردى پايدالانۋعا بەرۋ جوسپارلانىپ وتىر. ارينە, ونىڭ نەگىزگى بولىگى وسى استانا قالاسىندا سالىنباق. وسى رەتتە ءوز باسىم دەپۋتات رەتىندە وكرۋگىمدەگى قۇرىلىس قارقىنىن دامىتۋعا بار كۇش-جىگەرىمدى سالامىن دەپ سەنىممەن ايتا الامىن.
بۇگىندە قۇرىلىس جۇرگىزۋ تۋرالى جوسپارىمىز دايىن. سەبەبى, ءبىزدىڭ وكرۋگتەگى ساياجاي اۋماقتارى ىسىرىلۋعا جىبەرىلەدى. ءتىپتى, وسىعان بايلانىستى تۇرعىندار تاراپىنان كوپتەگەن سۇراقتار تۋىنداپ جاتىر. ايتاتىنىم, ىسىرىلۋ ناۋقانى باستالماس بۇرىن, جەرگىلىكتى بيلىك تۇرعىنداردى حاباردار ەتەتىن بولادى.
تاعى ءبىر ماسەلە – اباتتاندىرۋعا قاتىستى. استانانىڭ تاپ ىرگەسىندە تۇرعان كەنتتەردىڭ تۇرعىندارى جولدارىنىڭ ساپالى, كوشەلەرىنىڭ جارىق, ىشەتىن سۋى تازا بولعانىن قالايدى. بۇل اتالعانداردىڭ بارلىعى «استانا قالاسىنىڭ 2011-2015 جىلدارعا ارنالعان دامۋ باعدارلاماسىندا» كوزدەلگەن. ءبىز, دەپۋتاتتار, بۇل باعدارلامانىڭ ۋاقىتىندا ورىندالىپ, ناتيجەسىنىڭ ساپالى بولۋىن قاداعالايمىز. سول سياقتى دەنساۋلىق ساقتاۋ سالاسىنىڭ قىزمەتىنە دەگەن وكپە ءجيى بوي كوتەرەدى. اسىرەسە, ول مەديتسينالىق مامانداردىڭ بىلىكتىلىگىنە قاتىستى. قالادا بۇل ماسەلەنى شەشۋ باعىتىنداعى جۇمىس بەلسەندى جۇرگىزىلىپ كەلەدى. سوندىقتان, ۋاقىتتىڭ ەنشىسىندەگى ماسەلە كوپكە سوزىلماي ناتيجە بەرەدى دەپ سەندىرگىم كەلەدى.
حالىقپەن جۇمىس ىستەيتىن ادام ءبىرىنشى كەزەكتە سول حالىقتىڭ ءسوزىن تىڭداي ءبىلۋ كەرەك. بۇلاي دەيتىنىم, تۇرعىندار كوپ ايتاتىن شاعىمنىڭ ءبىرى مەملەكەتتىك قىزمەتكەرلەردىڭ جۇمىسىنا تىكەلەي قاتىستى. كەيبىر ورتانقول شەنەۋنىكتەر الدىنا كەلىپ تۇرعان ادامنىڭ ءسوزىن تىڭداماي, ولاردىڭ وتىنىشىنە قۇلاق اسپايدى. سەنگەن ادامىنىڭ «سيقىن» كورگەندە تاۋى شاعىلماعاندا قايتەدى؟ ءوز باسىم قىزمەتى مەن مىندەتىنە سالعىرت قارايتىن مەملەكەتتىك قىزمەتكەرلەردى جونگە سالۋ تۋرالى الداعى سەسسييادا ماسەلە كوتەرمەكپىن. حالىق الدىنداعى پارىزىن نەگە ادال اتقارمايتىنىن سۇراۋ كەرەك. سەبەبى, كەز كەلگەن شەنەۋنىكتىڭ بەلگىلى ءبىر ورىنتاققا وتىرۋى – حالىقتىڭ ارقاسى. جالپى, بۇل ماسەلەگە وتە مۇقيات بولۋىمىز كەرەك.
بۇعان قوسا, تاپ قازىر حالىقتىڭ قۇقىقتىق ساۋاتىن ارتتىرۋ ماڭىزدى. ويتكەنى, ءوز قۇقىعىڭدى بىلمەي, دالاعا اتتاپ باسۋدىڭ ءوزى قيىن. وسى ورايدا, ءبىز جاقىندا جەكەمەنشىك نوتاريالدىق كومپانيامەن زەينەتكەرلەرگە تەگىن كەڭەس بەرىپ وتىرۋعا كەلىسىم جاسادىق. زەينەت جاسىنداعى ادامداردى ءبولىپ العانىمىز, كوبىنە-كوپ ەگدە جاستاعى ادامدار قۇقىقتىق كومەككە ءزارۋ.
تىزە بەرسەك, وزەكتى ماسەلە كوپ. بىراق, دىتتەگەنىم, ونى جىپكە تىزگەندەي ساناپ بەرۋ ەمەس. ايتقىم كەلەتىنى, جەتكىزبەيتىن ماقسات جوق. ءبىزدىڭ دە – استانانى اجارلى, حالقىنىڭ ءال-اۋقاتىن جاقسى ەتەمىز دەگەن جوسپارىمىز دا كوپ ۇزاماي ورىندالادى. ەڭ باستىسى, حالىق ءوز قالاۋلىلارىمەن بىرگە بولىپ, ولاردىڭ يگى باستاماسىنا قولداۋ ءبىلدىرىپ وتىرسا, بولعانى. ويتكەنى, ءبىز, دەپۋتاتتار, ەل ءۇشىن ەڭبەك ەتەمىز.
توكەن ەگىنباەۆ, ءماسليحات دەپۋتاتى
