«نۇرجول» بۋلۆارىنىڭ بويىمەن قىدىرعان ەلوردالىقتار مەن قالا قوناقتارى ەندى ەلباسىنىڭ قىزمەت جولىنداعى جەتىستىكتەرىنەن سىر شەرتەتىن فوتوسۋرەتتەردى تاماشالاي الادى. مۇنداي مۇمكىندىك «جاسامپازدىق پەن تۇراقتىلىقتىڭ 30 جىلى» اتتى اشىق اسپان استىندا ۇيىمداستىرىلعان گالەرەيا اياسىندا ىسكە اسۋدا.
گالەرەيانىڭ اشىلۋ سالتاناتىنا شاھار اكىمى التاي كولگىنوۆ قاتىستى.
– بۇل سۋرەت كورمەسى – تۇڭعىش پرەزيدەنتتىڭ وتىز جىل ەل باسقارۋداعى ستراتەگيالىق تالانتىن تانىتۋدا, تاۋەلسىز قازاقستاننىڭ قالىپتاسۋىنداعى تاريحي ءرولىن جانە حالىقارالىق ارەناداعى ۇستانىمىن زەردەلەۋدە ماڭىزدى شارا. نۇرسۇلتان ءابىشۇلىنىڭ ەل استاناسىن قازىرگىدەي دەڭگەيگە دەيىن جەتكىزۋدەگى ەڭبەگىن دە ەلەمەۋگە ەش بولماس. وسى جولداعى وقيعالاردىڭ وبەكتيۆكە ىلىنگەندەرىن حالىق بۇگىنگى گالەرەيادان تاماشالاي الادى, – دەدى ول.
كورمەگە 100-گە تارتا جۇمىس قويىلعان. ونىڭ ىشىندە مەملەكەتتىك رامىزدەردىڭ قابىلدانۋى, شەكارانىڭ بەكىتىلۋى, استانانىڭ كوشۋى ءتارىزدى ايتۋلى ساتتەردەن ەستەلىك فوتولار بار. ءىس-شاراعا نۇر-سۇلتان قالاسىنىڭ مەملەكەتتىك ءارحيۆى مەن تىلدەردى دامىتۋ جانە ارحيۆ ءىسى باسقارماسى مۇرىندىق بولعانىن ايتا كەتۋ كەرەك.
