تورىندە تۇر اقوردا

استانا – ارۋ قالا

قالقامان سارين

استانام! ارۋ قالام, اسقاق وردام,
قالىڭ جۇرت, قازاعىما قاقپا بولعان.
تۋ ۇستاپ, تۇلپار مىنگەن بابالارىم,
بەرمەگەن ەل نامىسىن جاتقا قولدان.

بوزوعىم, بوزبەتكەيلىم, باققا ورانعان,
تاريحتىڭ قويناۋىنان تاپقان ولجام.
باياندى باقىتىمنىڭ باستاۋىنداي,
اينالدىڭ استاناعا اپپاق ارمان…

جار بولىپ جاببار يە جالعىز عانا,
عاسىرعا اياق باستىق ال ءبىز جاڭا.
سۇرلانىپ سىرت اينالعان سۋىق كوزدەر
قارايدى ءالى ساعان ءسال قىزعانا.

كوش كەلدى قاراوتكەلگە ءور تۇلعالى,
كەڭەسىن ەرلەرىمنىڭ ەل تىڭدادى.
تۇلعاسى بوي كوتەردى حان كەنەنىڭ
جاراسىپ جارق-جۇرق ەتكەن ەر-تۇرمانى.

ەرتەڭىڭ ۇلتىن سۇيگەن ۇلىڭا سىن,
قاشاندا ەركىندىكتىڭ قۇنى باسىم.
كەرىلىپ كەربەز دالام كوسىلەدى,
سەزىنىپ بوستاندىقتىڭ شۇعىلاسىن!

سان عاسىر ارمانداعان الاش بابام,
جالعاندى جالت قاراتتى
جاڭا استانام.
بىرلىكتى بايراق ەتىپ بولاشاققا,
بارايىن, ۋا, جاراتقان, جول اش ماعان!

قيالىڭداي سامعايدى

كادىربەك قۇنىپياۇلى

شات قۋانىش سىيلاعان
كارىگە دە, جاسقا دا.
قۇشاق جايىپ تۇر ماعان
اسەم قالا – استانا.

ارالادىم ەرتەمەن
ارمان بولعان قالانى.
ورتاسىندا ەركە وزەن –
ەسىل اعىپ بارادى.

ۇجماق شاھار ۇققانعا,
ۇيا سىيلار ۇل-قىزعا.
«بايتەرەككە» شىققاندا
توبەڭ تيەر جۇلدىزعا.

تاڭعالدىرماي قويمايدى
سونشا ساۋلەت, سونشا ءتۇر.
قيالىڭداي سامعايدى
ەرتەگى بوپ حان شاتىر.

تورىندە تۇر اقوردا,
بايىرقالاپ بارشا باق.
توعىسادى سان ارنا
ەل تىلەگىن ارقالاپ.

كۇلىمدەيدى شاتتانا
كۇللى ەلىمنىڭ تىلەگى.
اسەم قالا استانا –
قازاقستان جۇرەگى!

جۇلدىزداي جانعان

ەسەنگەلدى ءسۇيىنوۆ

نۇرلانتقان ءومىردى,
كوركەيتكەن ءوڭىردى.
ءان قىلىپ, جىر قىلىپ,
شالقىتقان كوڭىلدى,
كيەلى مەكەن – استانام مەنىڭ!

اڭساتقان مەنى,
تامسانتقان مەنى.
جىراققا كەتسەم,
ىزدەدىم سەنى,
جۇلدىزداي جانعان – استانام مەنىڭ!

اسىقتىم ساعان,
عاشىقپىن ساعان.
ءموپ-ءمولدىر ماحاببات,
سىيلادىڭ ماعان,
اياۋلىم مەنىڭ – استانام مەنىڭ!

تولقيدى جانىم,
اعادى قانىم.
قىزىقتاپ جۇرەم,
ەسىلدىڭ ماڭىن,
ارمانىم اسىل – استانام مەنىڭ!

ەرتەڭىم بۇگىنىمنەن باستالادى

گۇلسانا تىلەۋبەكوۆا

ەسكە السام ايبارىمدى – استانانى,
ءتول ءرامىز – سودان تەك باستالادى.
تورتكۇل دۇنيە تۇگەلدەي تانىدى عوي,
قازاققا بولعان قازىر باس قالانى.
قازاعىمنىڭ قاشاندا اسقاق ءانى,
استانانى ايشىقتار جاستار ءالى.
سالىپ بەرگەن نۇراعام نۇرلى جولمەن,
بولاشاعىم بۇگىننەن باستالادى.
كوكوراي شالعىن, كوك بەلدى,
ەسكە الساڭ سوناۋ وتكەندى.
قازاعىم مەنىڭ قايىسىپ.
قيىنشىلىق باستان كوپ كوردى,
وتكەننىڭ ەندى ءبارى ارتتا قالدى.
جىرلايىن استانانى, باس قالانى,
ەرتەڭىم بۇگىنىمنەن باستالادى,
ەلىمنىڭ ماقتانىشى – اسقاق ءانى.
استانانىڭ شىرقالسىن اسقاق ءانى,
وزىڭدە تۋىپ-وسكەن جاستار جالىن.
ەرتەڭى كەمەل ەلدىڭ كەلەشەگى,
ەرتەڭىم بۇگىنىمنەن باستالادى.

ەۋرازيا جۇرەگىندە

اقبوتا حاميت

بوي كوتەرگەن ەركە ەسىل جاعاسىندا,
عيماراتتار بار وندا جاراسىمدى.
كوركىنە تەڭ كەلەردەي جەر بەتىندە
قالانى مۇنان ارتىق تاباسىڭ با؟!

نۇر سەبەلەپ جاستاردىڭ ساناسىنا,
الىپ قويعان تاريحتان باعاسىن دا…
ۇمىتتەنىپ قارايمىز ءبىز جولىنا
اينالار دەپ بولاشاقتىڭ قالاسىنا!

عاجايىپتار ورىن العان بۇل ەلىمدە
ازاماتتار وسۋدە «تىرەگىم» دەر.
ماقتانىشپەن ايتامىز بىزدەر بۇگىن
استانا – ەۋرازيانىڭ جۇرەگىندە!