قازاقستان پرەزيدەنتى نۇرسۇلتان نازارباەۆ ءبىر توپ قازاقستاندىقتارعا مەملەكەتتىك ناگرادالار تاپسىردى. ەلباسى سالتاناتتى راسىمگە قاتىسۋشىلاردى تاۋەلسىزدىك كۇنىمەن قۇتتىقتاپ, بۇل اسا ماڭىزدى تاريحي وقيعا جاڭا قازاقستاننىڭ دامۋىنا جول اشىپ, بىرەگەي مۇمكىندىكتەر تۋعىزعانىن اتاپ ءوتتى.
– ءبىز الەمنىڭ وزىق دامىعان 30 ەلىنىڭ قاتارىنا قوسىلۋدى ماقسات تۇتقان بەرىك ءارى ورنىقتى مەملەكەت قۇردىق. دامۋ جولىن ۇستانا وتىرىپ, ءبىز ءتۇرلى سالالار مەن باعىتتاردا زور تابىسقا جەتتىك. بۇل جەتىستىكتەرگە بارشا قازاقستاندىقتاردىڭ كۇش-جىگەرى مەن جاسامپاز قۋاتىنىڭ ارقاسىندا قول جەتكىزدىك, – دەدى ەلباسى.
قازاقستان پرەزيدەنتى مەملەكەتىمىز جىل سايىن وتانىمىزدىڭ گۇلدەنۋىنە زور ۇلەس قوسقان ازاماتتارىن ناگرادالارمەن ماراپاتتاپ, سىيلىقتار تاپسىراتىنىن ايتىپ, مۇنداي ماراپاتقا ەڭ ۇزدىكتەر, كاسىبي تۇرعىدان بيىكتى باعىندىرعان جانە قوعام تاراپىنان مويىندالعان ادامدار عانا يە بولاتىنىنا توقتالدى.
– سىزدەر وسكەلەڭ ۇرپاق پەن ەلىمىزدىڭ بارشا ازاماتتارى ءۇشىن ايانباي قىزمەت ەتۋدىڭ, ەڭبەكتى ايرىقشا قۇرمەتتەۋدىڭ جانە ناعىز ءپاتريوتيزمنىڭ جارقىن ۇلگىسى بولىپ سانالاسىزدار. سىزدەردىڭ جەتىستىكتەرىڭىز مەملەكەتتىڭ ەڭ جوعارى باعاسىنا جانە حالىقتىڭ قۇرمەتىنە يە بولۋعا ءتيىس, – دەدى نۇرسۇلتان نازارباەۆ.
مەملەكەت باسشىسى «اقتوبە قالاسىنداعى سال اۋرۋىنا شالدىققان ازاماتتاردى قولداۋ ورتالىعى» قوعامدىق بىرلەستىگىنىڭ ءتورايىمى قۇرالاي بازاربايقىزى بايمەنوۆاعا, ءبىلىم بەرۋ جۇيەسىن دامىتۋعا مول ۇلەس قوسىپ كەلە جاتقان الينا روبەرتوۆنا سولوۆەۆاعا, ادال ەڭبەگى ارقىلى تۋعان جەرىنىڭ دامۋىنا جانە وركەندەۋىنە ايتارلىقتاي ۇلەس قوسىپ كەلە جاتقان ءىرى شارۋا قوجالىعىنىڭ باسشىسى سايرامباي الىقۇلۇلى دونەنباەۆقا «قازاقستاننىڭ ەڭبەك ەرى» اتاعىن تاپسىردى.
ءىى دارەجەلى «بارىس» وردەنىمەن اباي بايگەنجين مەن قازاقستاننىڭ حالىق جازۋشىسى قابدەش ءجۇمادىلدى ماراپاتتالدى.
نۇرسۇلتان نازارباەۆ استانا قالالىق ىشكى ىستەر دەپارتامەنتى جول-پاترۋلدىك پوليتسياسىنىڭ ينسپەكتورى ازامات بالتاباەۆتى ءىى دارەجەلى «ايبىن» وردەنىمەن ماراپاتتاي وتىرىپ, قاھارمان كاسىبىنىڭ يەلەرى ازاماتتارىمىزدىڭ قاۋىپسىزدىگى مەن تىنىشتىعىن قامتاماسىز ەتۋ جولىندا ءاردايىم ەرلىك كورسەتۋگە ءازىر ەكەنىن اتاپ ءوتتى.
ەلباسى ادەبيەت پەن ونەر سالاسىنداعى جوعارى ماراپاتتى تىنىشتىقبەك ابدىكاكىموۆكە, اقۇشتاپ باقتىگەرەەۆاعا جانە وتەگەن ورالباەۆقا تابىس ەتىپ, ازاماتتارىمىزدىڭ رۋحاني تۇرعىدان جاڭعىرۋى مەن شىعارماشىلىق الەۋەتىنىڭ دامۋى ەلىمىزدىڭ ماڭىزدى باسىمدىعى بولىپ سانالاتىنىن ايتتى.
«قازاقستاننىڭ ەڭبەك سىڭىرگەن قايراتكەرى» اتاعى كينو ءارتىسى س.ءى.ەسلياموۆاعا جانە «قۇرمانعازى اتىنداعى قازاق ۇلتتىق كونسەرۆاتورياسى» رمم اعا وقىتۋشىسى يا.س.رۋدكوۆسكيگە بەرىلدى.
سونىمەن قاتار, ءراسىم بارىسىندا قازاقستان رەسپۋبليكاسىنىڭ ادەبيەت پەن ونەر سالاسىنداعى 2018 جىلعى مەملەكەتتىك سىيلىق «اباي» وپەراسى ءۇشىن ت.ن.الپيەۆ, س.ءا.بايعوجين, ع.ا.احمادياروۆتان قۇرالعان اۆتورلار ۇجىمىنا جانە «اناعا اپارار جول» تولىقمەترلى كوركەم ءفيلمى ءۇشىن ا.ق.ساتاەۆ, ءا.ن.نازارباەۆا, ا.ب.نوگەربەك, ءا.ە.احمەتوۆتان قۇرالعان اۆتورلار ۇجىمىنا تابىس ەتىلدى.
قازاقستان پرەزيدەنتى مەملەكەتتىك ناگرادالار مەن سىيلىقتار ەلىمىزدىڭ باستى مەرەكەسى – تاۋەلسىزدىك كۇنى قارساڭىندا تابىس ەتىلۋىنىڭ سيمۆولدىق مانىنە توقتالدى.
– سىزدەر مەملەكەتتىڭ وسى جوعارى باعاسىنا لايىقتى بولىپ, قازاقستان حالقىنىڭ يگىلىگى جولىندا قىزمەت ەتە بەرەتىندەرىڭىزگە سەنىمدىمىن. جاستارىمىز سىزدەر سالعان جولمەن ءجۇرىپ, جاڭا بەلەستەر مەن ىستەردى باعىندىراتىن بولادى. وتانىمىزدىڭ قاۋىپسىزدىگى مەن باقۋاتتىلىعى سىزدەردىڭ قولدارىڭىزدا! وسى جوعارى ءارى مارتەبەلى ميسسياعا ارقاشان لايىق بولىڭىزدار! – دەدى نۇرسۇلتان نازارباەۆ.
