«QAZAQSTAN» ۇلتتىق ارناسى ەلىمىزدىڭ ۇلىق مەرەكەسى – تاۋەلسىزدىك كۇنى قارساڭىندا قالىڭ كورەرمەنگە تاعىلىمعا تولى سىي ۇسىندى. 1916 جىلعى تورعايداعى ۇلت-ازاتتىق كوتەرىلىسى قاھارماندارىنىڭ ءبىرى, قۇرالايدى كوزگە اتقان مەرگەن, حالقىمىزدىڭ ازاتتىعى ءۇشىن باسىن بايگەگە تىككەن باتىر, ءبىر عاسىرعا جۋىق جات جەردە باسسۇيەگى ساقتالىپ, بىلتىر ەلگە اكەلىنىپ, تۋعان جەرىنە جەرلەنگەن اسىل ەر كەيكى كوكەمبايۇلى جايىندا «كەيكى مەرگەن» اتتى 16 بولىمنەن تۇراتىن تاريحي درامانىڭ تانىستىرىلىمى بولدى.
ايتۋلى شارانىڭ تىزگىنىن ۇستاعان «قازاقستان» رترك» اق باسقارما توراعاسى ەرلان قارين ۇلتتىق ارنانىڭ وتانشىلدىق رۋح باعىتىندا ءبىرتالاي جوبالاردى جۇزەگە اسىرىپ جاتقاندىعىن ايتا كەلىپ: «بىزدە تاريحي تاقىرىپتار وتە كوپ. سوندىقتان جىل باسىندا قانداي تاريحي دراما تۇسىرەتىنىمىزدى كوپ ويلاندىق. اقىرى, بىلتىر باسسۇيەگى ەلگە اكەلىنگەن ەرجۇرەك كەيكى اتامىزدى تۇسىرۋگە توقتالدىق. ونىڭ ۇستىنە وتكەن جىلى جارىققا شىققان «تار زامان» مەن «كەيكى مەرگەن» تەلەحيكاياسىنىڭ وقيعا جەلىسى مەن كەيىپكەرلەرى ورتاق. بارلىعى دا ءبىر ۋاقىتتا بولعان جاعدايلار. وسى حيكايانى تۇسىرۋگە قولداۋ كورسەتكەن اقپارات جانە كوممۋنيكاتسيا مينيسترلىگىنە العىسىمدى بىلدىرەمىن» دەدى.
كوركەمتۋىندى وتكەن عاسىردىڭ باسىنداعى «اق قاشىپ, قىزىل قۋعان» الاساپىران كەزەڭدەگى باتىردىڭ جان كۇيزەلىسىن سۋرەتتەيدى. تاريحي درامادا كەيكىمەن بىرگە امانگەلدى باتىر, ابدىعاپار حان, ءالىبي جانگەلدين, مىرجاقىپ دۋلاتوۆ جانە احمەت ءبىرىمجانوۆ سەكىلدى تۇلعالاردىڭ وبرازدارىن كورەسىز.
ءفيلمنىڭ عىلىمي كەڭەسشىسى بولعان تاريحشى-عالىم بەرىك ابدىعالي ءوز سوزىندە حيكايادا باتىردىڭ عانا ەمەس, سول زاماندا ءومىر سۇرگەن تۇلعالاردىڭ ءومىرى مەن تاريحي وقيعالار ارقىلى ازاتتىق ويدى كورسەتۋ بولعاندىعىن باياندادى. جاسىنان ەل ىشىندەگى مەرگەندى كوزى كورگەن قاريالاردان ەستىگەن اڭگىمەلەر مەن تاريحي دەرەكتەردى جيناقتاپ, «كەيكى باتىر» دەگەن كىتاپ جازعان ولكەتانۋشى ءشوپتىباي ءبايدىلدين ءتۇسىرىلىم توبىنا كەڭەسشى رەتىندە كوپ مالىمەتتەر بەرگەن. تانىستىرىلىمدا ءشوپتىباي اعامىز دا باتىر ومىرىنەن قىسقاشا وي ءوربىتتى. ال قوستانايدان ادەيى ات ارىتىپ كەلگەن, كەيكىنىڭ تۋعان اعاسى قوسجاننىڭ ۇرپاعى سەيىتقالي قوسجانوۆ وسى يگىلىكتى ءىستىڭ باسى-قاسىندا جۇرگەن ازاماتتارعا اۋلەتى اتىنان ريزاشىلىعىن جەتكىزدى.
تاريحي دراما تۇركىستان, جامبىل جانە الماتى وبلىستارىندا ءتورت اي ىشىندە تۇسىرىلگەن.
تانىستىرىلىمدا جينالعان قاۋىمعا درامانىڭ سوڭعى 16-ءبولىمى ۇسىنىلدى. مۇندا كەيكى باتىر مەن جارى اقجان جانە سەرىكتەرىمەن قىزىلداردىڭ جازالاۋشى جاساعىنىڭ قولىنان ازاپتاپ ولتىرىلگەن ءساتى بەينەلەنگەن.
تۇجىرىپ ايتقاندا, ۇلتتىق ارنانىڭ ازاتتىق اڭساعان باتىر تۋرالى تۇسىرىلگەن 16 بولىمنەن تۇراتىن ءفيلمى بۇگىننەن باستاپ كورەرمەنگە جول تارتىپ, مەرەكەلىك دەمالىستا كۇن سايىن 4 سەريادان كورسەتىلەدى.
