كەشە قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ ءوزىنىڭ وكىلەتتىگىن توقتاتاتىنىن رەسمي باق-تار ارقىلى مالىمدەدى. پرەزيدەنت سايلاۋىنا دەيىن مەملەكەت باسشىسىنىڭ مىندەتىن سەنات توراعاسى قاسىم-جومارت توقاەۆ اتقارادى.
ەلباسى ءوزىنىڭ وكىلەتتىلىگى توقتاتىلعان جاعدايدا مەملەكەت باسشىسىنىڭ مىندەتىن قاسىم-جومارت توقاەۆ اتقاراتىنىن ايتتى. «قازاقستانداعى بيلىك ساباقتاستىعى كونستيتۋتسيالىق تۇرعىدان رەتتەلگەن. پرەزيدەنتتىڭ وكىلەتتىگى مەرزىمىنەن بۇرىن توقتاتىلعان جاعدايدا ونىڭ وكىلەتتىگى قالعان مەرزىمى اياقتالعانعا دەيىن سەنات توراعاسىنا بەرىلەدى. سودان كەيىن جاڭا پرەزيدەنت سايلاۋى بولادى. قازىر پارلامەنت سەناتىنىڭ توراعاسى قاسىم-جومارت كەمەلۇلى توقاەۆ» دەپ جالعادى ءسوزىن ن.نازارباەۆ.
قاسىم-جومارت توقاەۆ قر پرەزيدەنتى قىزمەتىنە اعىمداعى جىلدىڭ 20 ناۋرىزىنان باستاپ كىرىسەدى. بۇل تۋرالى نۇرسۇلتان نازارباەۆ حالىققا ۇندەۋىندە ءمالىم ەتتى. «قر كونستيتۋتسياسىنىڭ 42-بابىنىڭ 3-تارماعىنا سايكەس, 2019 جىلدىڭ 20 ناۋرىزىنان باستاپ ءوزىمنىڭ قازاقستان رەسپۋبليكاسىنىڭ پرەزيدەنتى وكىلەتتىگىمدى توقتاتۋعا قاۋلى ەتەمىن. كونستيتۋتسيامىزدىڭ 48-بابىنىڭ 1-تارماعىنا سايكەس, قر پرەزيدەنتىنىڭ قالعان مەرزىمدەگى مىندەتى قازاقستان حالقىنا انت بەرگەن ساتتەن باستاپ سەنات توراعاسىنا كوشەدى» دەدى ن.نازارباەۆ.
قاسىم-جومارت كەمەلۇلى توقاەۆ 1953 جىلى تۋعان, ۇلتى – قازاق. ماسكەۋ مەملەكەتتىك حالىقارالىق قاتىناستار ينستيتۋتىن, پەكين لينگۆيستيكالىق ينستيتۋتىن (كحر), رەسەي فەدەراتسياسى سىرتقى ىستەر مينيسترلىگىنىڭ ديپلوماتيالىق اكادەمياسىن بىتىرگەن. ساياسي عىلىمدارىنىڭ دوكتورى. رەسەي فەدەراتسياسى سىرتقى ىستەر مينيسترلىگى ديپلوماتيالىق اكادەمياسىنىڭ قۇرمەتتى دوكتورى جانە پروفەسسورى. جەنەۆا ديپلوماتيا جانە حالىقارالىق قاتىناستار ينستيتۋتىنىڭ قۇرمەتتى دوكتورى. بۇكىلالەمدىك جاراتىلىستانۋ جانە گۋمانيتارلىق اكادەمياسىنىڭ تولىق مۇشەسى. ديپلوماتيالىق دارەجەسى – توتەنشە جانە وكىلەتتى ەلشى.
ءوزىنىڭ ساياسي مانسابىن 1975 جىلى كسرو-نىڭ سىرتقى ىستەر مينيسترلىگىنە قىزمەتكە كەلۋمەن باستاعان. ءبىراز ۋاقىتتان كەيىن سينگاپۋرداعى كەڭەستىك ەلشىلىككە جۇمىسقا اۋىستى. 1979 جىلى كسرو ءسىم-ءنىڭ اپپاراتىنا قايتىپ ورالدى. 1984-1991 جىلدارى بەيجىڭدەگى ەلشىلىكتە ەكىنشى, ءبىرىنشى حاتشى, كەڭەسشى بولىپ قىزمەت ەتتى. 1992 جىلى قازاقستان رەسپۋبليكاسى سىرتقى ىستەر ءمينيسترىنىڭ ورىنباسارى بولىپ تاعايىندالدى. 1999 جىلدىڭ ناۋرىز ايىندا پرەمەر-ءمينيستردىڭ ورىنباسارى بولدى. سول جىلى قازان ايىندا ۇكىمەت باسشىسى قىزمەتىنە تاعايىندالدى. وسى قىزمەتتى 2007 جىلعا دەيىن اتقاردى. ودان ارىدە مەملەكەتتىك حاتشى, سىرتقى ىستەر ءمينيسترى, ءۇشىنشى, ءتورتىنشى سايلانىمداعى قازاقستان رەسپۋبليكاسى پارلامەنتى سەناتىنىڭ توراعاسى بولدى.
بۇۇ باس حاتشىسىنىڭ ورىنباسارى, بۇۇ-نىڭ جەنەۆاداعى بولىمشەسىنىڭ باس ديرەكتورى, قارۋسىزداندىرۋ كونفەرەنتسياسىنىڭ باس حاتشىسىنىڭ قىزمەتىنەن 2013 جىلعى 16 قازاندا قازاقستان رەسپۋبليكاسى پرەزيدەنتىنىڭ جارلىعىمەن پارلامەنت سەناتىنىڭ دەپۋتاتتىعىنا تاعايىندالىپ, قازاقستان رەسپۋبليكاسى پارلامەنتى سەناتىنىڭ توراعاسى بولىپ سايلاندى.
2017 جىلعى 14 قىركۇيەكتە قازاقستان رەسپۋبليكاسى پارلامەنتى سەناتىنىڭ وتىرىسىندا پرەزيدەنتتىڭ ۇسىنىسى بويىنشا جاسىرىن داۋىس بەرۋ ارقىلى قاسىم-جومارت كەمەلۇلى توقاەۆ قازاقستان رەسپۋبليكاسى پارلامەنتى سەناتىنىڭ توراعاسى بولىپ قايتادان سايلاندى.
