وتاندى قورعاۋ – وتان الدىنداعى ەڭ قاسيەتتى پارىز. قارۋلى كۇشتەر قاتارىندا اسكەري مىندەتىن ورىنداۋ – ءاربىر جاستىڭ ازاماتتىق بورىشى. كەشە ەلوردادان قازاقستان قارۋلى كۇشتەرىندە قىزمەت اتقارۋعا جاس ساربازدار اتتاندى. «ەلدى قورعاۋ – ناعىز ەرلەر ءىسى» دەپ اتالعان اسكەري-پاتريوتتىق اكتسياعا 1500-گە جۋىق ءجاسوسپىرىم مەن جاستار قاتىستى.
«استانا» كونتسەرت زالىندا وتكەن اسكەري-پاتريوتتىق ءىس-شاراعا مەكتەپ وقۋشىلارى, ستۋدەنتتەر, «جاس سارباز» جاسوسپىرىمدەر مەن بالالار اسكەري-پاتريوتتىق كلۋبتارىنىڭ تاربيەلەنۋشىلەرى قاتىستى. سونىمەن قاتار اسكەرگە اتتانىپ بارا جاتقان جاس ساربازداردىڭ اتا-انالارى بولدى.
ءىس-شارا الدىندا قورعانىس مينيسترىنىڭ ورىنباسارى سۇلتان كاماليتدينوۆ, استانا قالاسى اكىمىنىڭ ورىنباسارى ەسەت بايكەن, قارۋلى كۇشتەردىڭ ارداگەرى, گەنەرال-مايور مارات ناعۇمانوۆ ءسوز سويلەپ, جاسوسپىرىمدەر مەن اسكەرگە اتتانىپ بارا جاتقان جاستارعا ءسات ساپار تىلەدى.
«وتان الدىنداعى ازاماتتىق بورىشتى وتەۋ – بۇل وتە ۇلكەن مارتەبە. بۇگىنگى تاڭدا ەلوردادا جاسوسپىرىمدەر اراسىندا اسكەري-پاتريوتتىق تاربيە جۇرگىزۋ بويىنشا جۇيەلى جۇمىس اتقارىلىپ كەلەدى. قورعانىس ىستەرى دەپارتامەنتىمەن بىرلەسىپ اسكەرگە شاقىرۋ ناۋقانى جانە باسقا دا سالالىق باعىتتاعى ءىس-شارالار جۇرگىزىلەدى. بيىل ەلوردادان قارۋلى كۇشتەر قاتارىنا 100-دەن اسا جاس جاۋىنگەر اتتاندى. جاقىندا اسكەري جيىن وتكىزەتىن جان-جاقتى جابدىقتالعان جاڭا عيمارات پايدالانۋعا بەرىلدى. سونىمەن قاتار ۇرىس-قيمىلعا قاتىسقان ارداگەرلەر ۇيىمدارى, «جاس سارباز» اسكەري-پاتريوتتىق كلۋبتارى قوعامدىق نەگىزدە ءىس-شارالار ۇيىمداستىرادى. قالا مەكتەپتەرىندە العاشقى اسكەري دايىندىق كۋرسى وقىتىلادى. بۇگىنگىدەي ءىس-شارانى داستۇرگە اينالدىرامىز. ويتكەنى وتاندى قورعاۋ قاسيەتتى بورىش ەكەنىن ءاربىر ءجاسوسپىرىم ءبىلىپ ءوسۋى كەرەك» دەدى استانا قالاسى اكىمىنىڭ ورىنباسارى ەسەت بايكەن.
كەڭ سارايدىڭ ساحنا تورىندە سەرت بەرۋ ءراسىمى ءوتتى. قازاقستان قارۋلى كۇشتەرى قاتارىندا قىزمەت اتقارىپ جۇرگەن ءبىر توپ جاۋىنگەر اسكەرگە باراتىن جاستارعا ەلىمىزدىڭ تىنىشتىعىن, وتانىمىزدىڭ تاۋەلسىزدىگىن كىرپىك قاقپاي قورعاۋدى امانات ەتسە, اسكەر قاتارىنا ەندى قوسىلاتىن جاستار وتان قورعاۋعا ءازىر ەكەنىنە ءارى ادال قىزمەت ەتۋگە سەرت بەردى.
«اسكەر قاتارىندا بولعاندا سوعىس جاعدايىن باسىمىزدان وتكەرگەن جاۋىنگەرلەر رەتىندە جاستاردىڭ اسكەرگە اتتانۋ سالتاناتىنا قۋانا كەلدىك. ءويتكەنى ەلىمىزدىڭ قورعانى بولۋ – بۇگىنگى جاستاردىڭ قولىندا. ءبىزدىڭ ۇيىم قالادا ءوتىپ تۇراتىن اسكەري-پاتريوتتىق ءىس-شارالارعا ءجيى قاتىسادى. مەكتەپتەردە, كوللەدجدەردە وقۋشىلارمەن كەزدەسۋ وتكىزىپ, باسقا دا پاتريوتتىق ءىس-شارالار ۇيىمداستىرىپ, جاسوسپىرىمدەرگە اقىل-كەڭەسىمىزدى ايتىپ, وتاندى قورعاۋدىڭ ەڭ قاستەرلى پارىز ەكەنىن ۇعىندىرامىز. وتاندى قورعاۋ ناعىز ەرلەردىڭ ءىسى ەكەنىن ءاربىر قازاقستاندىق جاس ءبىلۋى كەرەك. بۇگىن قازاقستان قارۋلى كۇشتەرىنە اتتانىپ بارا جاتقان جاستارعا وڭ ساپار تىلەيمىز» دەدى اكتسياعا قاتىسقان استانا قالاسى «اۋعانستان سوعىسى مۇگەدەكتەرى مەن ارداگەرلەرى وداعى» قوعامدىق بىرلەستىگىنىڭ توراعاسى مەيرامبەك تۋلەكپاەۆ.
اسكەري-پاتريوتتىق اكتسيانىڭ ءمان-مازمۇنى تۋرالى قر قارۋلى كۇشتەرى باس شتابى ۇيىمداستىرۋ جانە جۇمىلدىرۋ جۇمىستارى دەپارتامەنتىنىڭ باستىعى باۋىرجان ارتىقوۆ ايتىپ بەردى.
– بۇگىنگى ءىس-شارانىڭ باستى ماقساتى قازاقستان قارۋلى كۇشتەرىنىڭ ماڭىزىنا ءمان بەرۋ بولىپ وتىر. ءاربىر قازاقستاندىق وتان الدىنداعى ازاماتتىق بورىشىن وتەۋ ۇلكەن مارتەبە ەكەنىن بىلسە ەكەن دەيمىز. بيىلعى اسكەرگە شاقىرۋ ناۋقانى 1 ناۋرىزدان باستالدى. استانادان ءبىرىنشى توپتا شەكارا قىزمەتىنە جاستار جىبەرىلگەن ەدى. ەندى بۇگىن شىعارىپ سالىپ جاتقان جىگىتتەر اۋە-داسانتشىلار اسكەرىنە قوسىلادى. استانا قالاسىنىڭ اكىمدىگىمەن, جەرگىلىكتى قورعانىس ىستەرى دەپارتامەنتىمەن بىرلەسىپ وسىنداي ءىس-شارا وتكىزۋدى ۇيعاردىق. وسىنداي ماعىنالى دا ماڭىزدى اكتسيانى ۇيىمداستىرۋعا قولداۋ بىلدىرگەن ەلوردا اكىمدىگىنە العىس بىلدىرەمىز. بىلە بىلسەك, وتاندى قورعاۋ – ناعىز ەرلەردىڭ ءىسى, سوندىقتان ولاردى اسكەرگە سالتاناتپەن شىعارىپ سالعانىمىز وتە ورىندى دەپ ويلايمىن, – دەدى پولكوۆنيك ب.ارتىقوۆ.
– استانا حالىقارالىق ۋنيۆەرسيتەتىنىڭ 2-كۋرسىندا وقيمىن. مەن اسكەرگە ءوز تىلەۋىممەن بارا جاتىرمىن. بولاشاقتا وفيتسەر بولۋدى ماقسات ەتىپ وتىرمىن. ازاماتتىق بورىشىمدى وتەگەننەن كەيىن اسكەري جوعارى وقۋ ورنىنا تۇسكىم كەلەدى. قازىر مەملەكەت اسكەري وقۋعا جەڭىلدىك بەرىپ وتىر, – دەيدى اسكەر قاتارىنا الىنعان تاميرلان قامزين.
اسكەري-پاتريوتتىق اكتسيا اياسىندا قارۋلى كۇشتەردىڭ اسكەري تەحنيكا كورسەتىلىمى جانە پاتريوتتىق اندەر كونتسەرتى ۇيىمداستىرىلدى.
