«…جالاڭبۇت جۇرەر جايىم جوق»
ۆياچەسلاۆ كۋزمين:
– №12 اۆتوبۋستىڭ مارشرۋتىن الىپ تاستاعاندارىڭىزدى جۋىردا عانا ءبىلدىم. كونستيتۋتسيا كوشەسىنەن سول جاعالاۋعا, قوناەۆ كوشەسىندەگى قتج عيماراتىنا دەيىن باراتىن جالعىز كولىك ەدى. ءبىزدىڭ ورامدا وڭكەي تەمىرجولشىلار تۇرادى, سولاردىڭ دەنى وسى №12 مارشرۋتقا مىنەتىن. ىلعي ىشىنە ادام سىيماي, اۋزى-مۇرنىنان شىعىپ جۇرەتىن. ونى الىپ تاستاۋعا نە سەبەپ بولدى, الدە ورنىنا باسقا اۆتوبۋس شىعا ما؟ جولشىباي كولىك اۋىستىرىپ, اۆتوبۋستان اۆتوبۋسقا ءمىنىپ ءجۇرۋ جونىندە ايتا كورمەڭىزدەر, جولاقى ونسىز دا قىمبات, دىتتەگەن جەرىمىزگە جەتكەنشە قالتامىز قاعىلىپ, جالاڭبۇت قالاتىن جايىمىز جوق.
وسى شاعىمعا بايلانىستى 5 كۇن ىشىندە جاۋاپ بەرىلدى.
جولاۋشىلار كولىگى جانە اۆتوموبيل جولدارى باسقارماسى:
– قۇرمەتتى ۆياچەسلاۆ الەكساندروۆيچ! ءسىزدىڭ حاتىڭىزدا جازىلعان جايتكە بايلانىستى مىنانى قاپەرلەيمىز: №12 مارشرۋتتىڭ ءجۇرىس ءتاسىمى عىلىمي زەرتتەۋ نەگىزىندە, ونىڭ جۇمىسىنىڭ تيىمدىلىگىن ارتتىرىپ, جۇكتەمەسىن جەڭىلدەتۋ, قوزعالىس جيىلىگىن قىسقارتۋ ماقساتىندا وزگەرتىلدى. ونىڭ ۇستىنە, اتالعان اۋدانعا قاتىنايتىن مارشرۋتتار جەتكىلىكتى, اتاپ ايتقاندا, №42, 6, 26, 20, 33, 106, 103 اۆتوبۋستار تولاسسىز اعىلىپ جاتادى, سونداي-اق, №130 شاعىن اۆتوبۋس سىيىمدىلىعى ۇلكەن №81 مارشرۋتپەن اۋىستىرىلماقشى. قالا ىشىندە قاتىناپ, ساپار شەگەتىن جولاۋشى قوعامدىق كولىك باعدارىن وزگەرتپەي, اۆتوبۋستان اۆتوبۋسقا مىنبەي ءبارىبىر جۇرە المايدى عوي. ايتپاقشى, ەكىنشى جارتىجىلدىقتان باستاپ جتەج (جولاقى تولەۋدىڭ ەلەكتروندى جۇيەسىن) ەنگىزۋ كوزدەلىپ وتىر. ونىڭ ءبىر ارتىقشىلىعى – جولاقىسى جىكتەلىمدى ەسەپپەن, ءجۇرىپ وتكەن ايالدامانىڭ ناقتى سانىنا بايلانىستى تولەنەدى.
«تۇرمىستىڭ» جۇمىسى تۇرالاپ جاتىر
Gafur Baktugulov:
– كەرەي-جانىبەك حاندار كوشەسىندەگى 9-ءۇيدىڭ تۇرعىنى رەتىندە تۋراسىن ايتايىن: وسى ءۇيدى كۇتىپ ۇستاۋعا, اسىرەسە, تۇرعىنداردىڭ قاۋىپسىز ءجۇرىپ-تۇرۋىن قامتاماسىز ەتۋگە مىندەتتى «تۇرمىس» جشس-ءنىڭ جۇمىسى تۇرالاپ جاتىر. كەشە جەل وتىندە بىلعاڭداپ تۇرعان قاپتاما تاقتاشانى ۆيدەوعا ءتۇسىرىپ الدىم, ول كەز كەلگەن ۋاقىتتا ادامنىڭ باسىنا ءتۇسىپ نەمەسە ماشيناعا قۇلاپ, مايىپ قىلۋى مۇمكىن. قۇداي ءۇشىن ءبىزدى «تۇرمىستان» قۇتقارىڭدارشى, ابدەن شارشاتتى, ولاردىڭ وزدەرىنە دە, سوزدەرىنە دە سەنۋدەن قالدىق. شىدامىمىز تۇگەسىلدى…
ماسەلە 3 كۇندە شەشىمىن تاپتى.
تۇرعىن ءۇي ينسپەكتسياسى باسقارماسى:
– قۇرمەتتى Gafur, استانا قالاسى اكىمىنىڭ سايتىنداعى «تۇرمىس» جشس-نە قاتىستى شاعىمىڭىزدى قاراپ, مىنانى حابارلايمىز: قالالىق تۇرعىن ءۇي ينسپەكتسياسى باسقارماسىنىڭ قىزمەتكەرلەرى كەرەي-جانىبەك حاندار كوشەسىندەگى № 9 ءۇيدىڭ قاسبەتىنىڭ تەحنيكالىق جاي-كۇيىن تەكسەرىپ كوردى. 2015 جىلدىڭ 9 شىلدەسىنەن باستاپ «ستروينۆەست» جشس – قۇرىلىس كومپانياسى تۇرعىن ءۇيدىڭ قاسبەتىندەگى قاپتاما تاقتاشالاردىڭ اقاۋىن جويىپ, بۇلىنگەنىن اۋىستىرۋ جۇمىستارىن جۇرگىزبەكشى. ەگەر دە قىزمەت كورسەتۋشى كومپانيا جۇمىسى پاتەر يەلەنۋشىلەردى قاناعاتتاندىرماسا, قازاقستان رەسپۋبليكاسىنىڭ «تۇرعىن ءۇي قاتىناستارى تۋرالى» زاڭىنىڭ 42-بابىنىڭ 1-تارماعىنا سايكەس ولار وزدەرىنىڭ جالپى جينالىسىن وتكىزىپ, كۇن تارتىبىنە كوندومينيۋم نىسانىن باسقارۋ ءتۇرىن تاڭداۋ نەمەسە وزگەرتۋ تۋرالى ماسەلە كوتەرۋگە قاقىلى.
شىنجىر كەرىپ كەتكەنى – نە ەتكەنى؟!.
راحمەدين زياروۆ:
– كەشە قان تاراتىپ, بوي سەرگىتۋ ءۇشىن «سپورتتايم» كەشەنىنە كەلگەن ەدىم, ماشينا قاڭتاراتىن جەر تابا الماي, شىر اينالدىم. تۇراقجايداعى ورىنداردى بىرەۋلەر شىنجىر كەرىپ, قورشاپ الىپتى. بۇل زاڭدى ما؟ قايدام… اركىم ءوز بەتىنشە بيلىك جۇرگىزىپ, قوعامدىق جەردى قالاۋىنشا قورشاپ الۋ بەيباستاقتىق قوي. وسىعان شارا قولدانۋلارىڭىزدى سۇرايمىن.
ميرزويان كوشەسىندەگى 25-ءۇي, تۇراقجاي ءۇيدى بويلاي, تقس-عا قارسى ورنالاسقان.
ماسەلە 6 كۇندە شەشىمىن تاپتى.
الماتى اۋدانى اكىمىنىڭ اپپاراتى:
– قۇرمەتتى راحمادين! ءسىزدىڭ شاعىمىڭىزدا كورسەتىلگەن ماسەلە راستالعانىن, قازىرگى كەزدە تۇراقجايداعى قورشاۋ الىنىپ تاستالعانىن حابارلايمىز.
«قاقپاعى جوق قۇدىقتان قورقام…»
ابزال الپىسباەۆ:
– قۇرمەتتى استانا قالاسىنىڭ اكىمى, چەحوەۆ كوشەسىندەگى 1-ءۇيدىڭ اۋلاسىندا كارىز قۇدىقتارىنىڭ قاقپاعى اشىق-شاشىق جاتىر, كەنەرەسىنە دەيىن جۇلىپ اكەتكەن, ونى كۇندە جاۋىپ, قىمتاپ الەكپىز. بۇلار «استانا سۋ ارناسىنا» تيەسىلى ەكەن. ءبىر شارا قولدانباساڭىزدار, بىرەۋ-مىرەۋ قۇدىققا قۇلاپ كەتە مە دەپ قورقامىن.
ماسەلە 3 كۇندە شەشىمىن تاپتى.
سارىارقا اۋدانى اكىمىنىڭ اپپاراتى:
– قۇرمەتتى ابزال الپىسبايۇلى! ءسىزدىڭ حاتىڭىزدا مازمۇندالعان ماسەلەگە وراي مىنانى حابارلايمىز: 8 شىلدە كۇنى «استانا- سۋ ارناسى» مكك قىزمەتكەرلەرى اتالعان مەكەنجايداعى قۇدىقتاردىڭ اۋزىن جاۋىپ, بىتەدى.
قاجىمۇقاندا الاڭ بار قيراپ قالعان
تاتيانا كازناچەەۆا:
– قاجىمۇقان كوشەسىندەگى 6-ءۇيدىڭ بالالار ويناۋعا ارنالعان الاڭقايىنىڭ جاسالعانىنا ەلۋ جىلداي بولىپ قالدى, بىراق, جيىرما جىلدان بەرى جوندەۋ كورگەن جوق. ورىندىقتارى قيراپ, مەتالل كونسترۋكتسيالارى مايقامدالىپ جاتىر.
ماسەلە 7 كۇن ىشىندە شەشىمىن تاپتى.
الماتى اۋدانى اكىمىنىڭ اپپاراتى:
– قۇرمەتتى تاتيانا! ءسىزدىڭ حاتىڭىزدى قاراپ, استانا قالاسىن اباتتاندىرۋ, سانيتاريالىق تۇرعىدان كۇتىپ ۇستاۋ, اۋماقتا جيناپ, تازالاۋ ەرەجەسىنىڭ 4.2-تارماعىنا سايكەس مىنانى حابارلايمىز: كوندومينيۋم باسقارۋعا نەمەسە تۇرعىن ءۇيدى باسقارۋعا مىندەتتى ورگان اباتتاندىرۋ جۇمىستارى اياقتالعان سوڭ قاراماعانداعى مۇلىكتى كۇتىپ ۇستاپ, اۋلاداعى كىر جاياتىن, سپورتپەن شۇعىلداناتىن جانە بالالار وينايتىن الاڭداردى, شاعىن ارحيتەكتۋرالىق پىشىمدەردى (ورىندىقتاردى, قوقىس سالعىشتاردى جانە ت.ب.) جىل سايىن جوندەپ شىعۋعا ءتيىستى. قوسىمشا ايتارىمىز: اتالعان مەكەنجايداعى ءۇي اۋلاسىنا جاڭادان ويىن جانە سپورت الاڭىن سالۋ جونىندە جوبا جاسالدى. ول ءتيىستى قارجى بولىنگەن جاعدايدا 2016 جىلى جۇزەگە اسىرىلادى.
«ۇيالتتىڭ مەنى, ءۇش ءارىپ…»
يگور بوگريانسكي:
– سالەماتسىزدار ما! «كومسومولسكي» تۇرعىن الابىنداعى ترانسفورماتور قۇجىراسىنا جازىلعان بوعاۋىز ءسوزدى ءسۇرتىپ تاستاڭىزدارشى. مۇندا ديپلوماتيالىق وكىلدىكتەر كوپ ورنالاسقان, ءتىپتى, ىڭعايسىز ەكەن, «استانا» دەگەن اتىمىزعا ءمىن عوي. نەبارى ءۇش ارىپتەن قۇرالعان ورىسشا اتاۋدى ءوشىرىپ تاستاۋعا الگى نىساندى يەلەنەتىن كوممۋنالدىق قىزمەتتىڭ نەمەسە ەنەرگەتيكتەردىڭ دە شاماسى كەلەدى عوي…
ماسەلە 11 كۇندە شەشىمىن تاپتى.
ەسىل اۋدانى اكىمىنىڭ اپپاراتى:
– قالا اكىمى سايتىنا جازعان حاتىڭىزعا بايلانىستى «كومسومولسكي» تۇرعىن الابىنداعى شاعىن ترانسفورماتور ستانساسىن قاراپ, سىرتىنا بوعاۋىز ءسوز جازىلعانىن انىقتادىق. ونى «استانا – رەك» اق قىزمەتكەرلەرى ءوشىرىپ تاستادى.
اتاكەنتتى جايلاعان الباتى ءيىس
darya RL:
– اتاكەنت تۇيىق كوشەسىندە بۇرىن كوپشىلىككە ارنالاعان اجەتحانا بار ەدى, بىراق كەيىن ونىڭ قالقاسىن بۇزىپ تاستادى; ەندى الگى اشىق جاتىر, ءناجىس پەن قوقىس كوزگە شىققان سۇيەلدەي كورىنەدى, ساسىق ءيىسى كوشەنى جايلاپ العان. وسىعان شارا قولدانىپ, بەرەكەسىز تىرلىككە – انتيسانيتاريالىق الباتىلىققا نۇكتە قويۋلارىڭىزدى وتىنەمىن. سول ماڭايدا بالالار وينايدى, ويتكەنى…
ماسەلە 9 كۇندە شەشىمىن تاپتى.
سارىارقا اۋدانى اكىمىنىڭ اپپاراتى:
– ءسىزدىڭ اتاكەنت كوشەسىندەگى يەسىز قالعان اجەتحانا ماسەلەسى جونىندەگى شاعىمىڭىز اۋدان اكىمى اپپاراتىندا قارالدى. اتالعان كەمشىلىكتەر جويىلعانىن حابارلايمىز.
استانا قالاسى اكىمىنىڭ www.astana.gov.kz سايتى ماتەريالدارى بويىنشا دايىندالدى.
ماقسوت ىزىمۇلى
