ۇلتتىق اكادەميالىق كىتاپحانادا ءبىر باسىنا سان ءتۇرلى ونەر توعىسقان قارىمدى قالامگەر بايانعالي ءالىمجانوۆتىڭ «سىرىڭدى ايتشى, دۇنيە…» اتتى شىعارماشىلىق كەشى ءوتتى.
كەشتى بەلگىلى عالىم شاكىر ىبىراەۆ جۇرگىزدى. شارا بارىسىندا پارلامەنت ءماجىلىسىنىڭ دەپۋاتاتى ساۋىتبەك ابدراحمانوۆ ءالىمجانوۆتىڭ ازاماتتىق كەلبەتى مەن ونەرى جايىندا سالماقتى ءسوز قوزعاسا, پروفەسسور سەرىك نەگيموۆ كەش يەسىنىڭ جاس كۇنىنەن العىر, وجەت, سۇڭعىلا بولىپ وسكەندىگىن اڭگىمەلەدى.
– قازاقتا «سەگىز قىرلى, ءبىر سىرلى» دەگەن ءسوز بار. بۇل ناقىل بايانعاليدىڭ تۇلعاسىنا شاق كەلمەيدى. ول – «سەكسەن سىرلى, توقسان قىرلى» جىگىت. بايانعالي اتاقتى ءبىرجال سال تۋعان توپىراقتا ومىرگە كەلگەن. وسى كيەلى جەردە ون جەتى بي-شەشەن عۇمىر كەشىپتى. سولاردىڭ بۇگىنگى جۇرناعى بايانعالي دەپ بىلەمىن. ونىڭ ماناسشىل بولۋى دا بەكەر ەمەس. كەزىندە شوقان وقىعان ومبى كادەت كورپۋسىنىڭ ۇستازدارى شاكىرتتەرىن جازعى دەمالىستا جەتىسۋ, ىلە جانە قىرعىز الاتاۋىنا جىبەرىپ, ەپوستىق جىرلاردىڭ ۇلگىلەرىن جيناتقان. كەيىن ول 1840 جىلى كىتاپ بولىپ جارىق كوردى. ياعني, ءبىزدىڭ كوكشەگە دە ماناس جىرى سول كەزدەن تاراعان. بايانعاليدىڭ بالا كۇنىندە سول كونە جىردى بىلەتىن قاريالار بار ەدى. ماناستىڭ رۋحى وعان سولاردان دارىدى دەپ ويلايمىن» دەدى عالىم. اقىن قورعانبەك امانجول دوسى تۋرالى ىزگى لەبىزىن ءبىلدىرىپ: «ءبىرجاننىڭ دومبىراسىن قالعان ۇستاپ, ەل سۇيگەن ەر كوڭىلدى ول ءبىر سەرى!» دەپ ارناۋ ولەڭ وقىدى. سونداي-اق قالامگەردىڭ ولەڭدەرىنە جازىلعان اندەر ورىندالىپ, بالالاردىڭ اۆتوردىڭ تۋىندىلارىنداعى كەيىپكەرلەردى بەينەلەگەن سۋرەت كورمەسى ۇيىمداستىرىلدى.
كەش بارىسىندا ءسوز زەرگەرىنىڭ 13, 14, 15, 16 توم شىعارمالارىنىڭ تانىستىرىلىمى بولدى. بۇل تومدىققا اۆتوردىڭ «ءاي, ارتىستەر-اي!», «باقىتسىز بولعىڭ كەلمەسە…», «بالقان بايدىڭ ايىمدارى», «قارىز بەن قاسپاق» كومەديالارى مەن بالالارعا ارنالعان «الپامىس باتىر مەن الىپ مونستر» پەساسى جانە «باتىر بولماق سويدان-ءدۇر…» اتتى قىزىقتى زەرتتەۋى جانە باسقا دا ماقالالارى توپتاستىرىلعان.
