ادام بالاسى ەس بىلگەننەن باستاپ زەينەتكە جەتكەنگە دەيىن ءارتۇرلى ءومىر بەلەستەرىنەن وتەدى. حالقىمىزدا مىناداي ءسوز بار عوي: كورەشەگىڭدى كورمەي ولمەيسىڭ دەگەن. ءومىر جولىندا نەشە ءتۇرلى قيىنشىلىقتاردى, قۋانىشتاردى ىڭعايسىزدىقتاردى باستان كەشىرەسىڭ. زەينەتكە شىققاننان كەيىن وسىلاردىڭ ءبارىن ەسىڭە الىپ, ەلىمە, حالقىما, وتباسىما, بالالارىما, تۋىستارىما, جورا-جولداستارىما قانداي جاقسىلىق جاسادىم دەپ وي ەلەگىنەن وتكىزەسىڭ. سونداي كۇيدە ءبىر كەزدەرى مەنىڭ كەيىپكەرىم امانجول نۇرمۇحامبەتۇلى جازين بولعان شىعار دەپ ويلايمىن.
ول كىسىنىڭ ءومىربايانىن قاراپ وتىرساڭ ەلۋ جىلعا تارتا ەڭبەك جولىندا ەلىنە, حالقىنا ادال ەڭبەك ەتكەندىگى تايعا تاڭبا باسقانداي كورىنىپ تۇر. ون ءتورت جاسىندا ماماندىق الۋ ءۇشىن تەمىرجول كولىگى تەحنيكۋمىنا وقۋعا تۇسەدى. ونى ءتورت جىلدا ءبىتىرىپ, ەرەيمەنتاۋ لوكوموتيۆ دەپوسىندا تەپلوۆوز ءماشينيسىنىڭ كومەكشىسى بولىپ ەڭبەك جولىن باستايدى. سودان كەيىن ۋچيليششەدە ماستەر, ۇستاز قىزمەتتەرىن اتقارادى. ءارى قاراي ەنەرگەتيكا سالاسىنا جۇمىسقا اۋىسىپ, ينجەنەر, باس ينجەنەر, شەف-ينجەنەر لاۋازىمدارىندا جۇمىس اتقارادى. كەڭەستىك داۋىردە كوممۋنيستىك پارتيا كادرلار دايىنداۋعا ءجىتى قارايتىن. دايىندىقتان وتكەن, ءبىلىمدى, باسقارۋ قىزمەتىنە ىڭعايى بار جاستاردى كومسومول, پارتيا جۇمىستارىنا شاقىراتىن.
– بۇرىنعى قىزمەتىمدە جالاقىم وتە جاقسى بولسا دا, ودان جالاقىسى اجەپتاۋىر تومەن تسەلينوگراد قالالىق پارتيا كوميتەتىنە نۇسقاۋشى بولىپ اۋىستىم. ودان كەيىن مەنىڭ قابىلەتىمدى بايقادى-اۋ دەيمىن, مەنى وبلىستىق پارتيا كوميتەتىنىڭ وندىرىستىك-كولىك ءبولىم مەڭگەرۋشىسىنىڭ ورىنباسارلىعىنا قىزمەتكە شاقىردى, – دەپ ەسكە الادى امانجول نۇرمۇحامبەتۇلى. ءبىزدىڭ اياۋلى اعامىز قاسىم اپپاسۇلى تاۋكەنوۆ اتباسارعا ءبىرىنشى حاتشى بولىپ بارعاننان كەيىن ءوندىرىس-قۇرىلىس سالاسىن جۇرگىزەتىن حاتشى ىزدەيدى. تاڭداۋ امانجول جازينگە تۇسەدى.
– مەن وندا بارعانىما وكىنبەيمىن, مەنى قاسەكەڭ قىزمەتتى ۇتىمدى جۇرگىزۋدىڭ ءارتۇرلى جولدارىن ۇيرەتتى. ول كىسىدەن باسقارۋدىڭ, حالىقپەن جۇمىس ىستەۋدىڭ قىر-سىرىن ۇيرەندىم. مەن ول كىسىگە وتە ريزامىن جانە قارىزدارمىن, – دەپ ەسكە الادى مەنىڭ كەيىپكەرىم. بۇل اۋداندا جەمىستى ءۇش جىل قىزمەت اتقارعاننان كەيىن اۋجەكەڭدى استراحان اۋداندىق اتقارۋ كوميتەتىنىڭ توراعاسى قىزمەتىنە اۋىستىرۋعا وبلىستىق پارتيا كوميتەتى شەشىم قابىلدايدى. بۇدان ون بەس جىل بۇرىن وسى اۋداندا وسى قىزمەتتى اكەسى نۇرمۇحامبەت جازين اتقارىپ كەتىپتى. استراحاندىقتار اكەسىن قاتتى سىيلاپ قۇرمەت تۇتقان. ونىڭ ايعاعى – اۋدان ورتالىعىندا ول كىسىنىڭ اتىندا كوشە جانە مەموريال تاقتا ورناتىلىپتى. بۇل اعامىز ەكى مارتە لەنين وردەنىمەن ماراپاتتالىپ, وسىنشا رەت قازاق سسر جوعارعى كەڭەسىنىڭ دەپۋتاتى بولىپ سايلانادى. نۇرەكەڭ حرۋششەۆتىڭ سولاقاي ساياساتىنىڭ ءبىرى جەكەمەنشىك مالدى ۇستاۋدى كۇرت تومەندەتۋ كەرەك ەكەندىگىن شەشكەن كەزدە وعان قارسى بولىپ, اۋدان تۇرعىندارىنىڭ مالدارىنا تيىسكىزبەيدى. سول ءۇشىن بيۋرودا قاتاڭ سوگىس الادى. اكەسىنىڭ ورنىنا بارۋعا قورقاقتايدى. وبكوم شەشتى, ارتقا جول جوق. «اكەدەن ۇل تۋماي ما, اكە جولىن قۋماي ما» دەگەن قاعيدانى باسشىلىققا الىپ, بۇل جۇمىسقا دا كىرىسىپ كەتەدى.
بۇدان كەيىنگى قىزمەتتەرىنىڭ ايشىقتىسى – تەڭىز اۋدانىنىڭ ءبىرىنشى حاتشىسى. اۋدان قوي شارۋاشىلىعىنا بەيىمدەلگەن. سول كەزدە ل.ي.برەجنەۆ قازاقستاندا بولىپ, سىزدەر قويدىڭ سانىن ەلۋ ميلليونعا جەتكىزۋگە مۇمكىنشىلىكتەرىڭ بار دەگەن بولاتىن. وسى تاپسىرما ورىندالماسا دا, قوي سانىن ارتتىرۋ ماقساتى تۇردى. اۋدان جابىلعاننان كەيىن بۇل اۋداننىڭ جەرىن قاراعاندى وبلىسىنىڭ نۇرا اۋدانىنا بەردى. مەنىڭ كەيىپكەرىمنىڭ ءسوزى بويىنشا قاراعاندىلىقتار جاقسى قارسى الىپتى. قويشىلارعا نە كەرەك بارىمەن قامتاماسىز ەتىپ وتىرىپتى. قاراعاندى قالاسىندا د.ا.قوناەۆتىڭ قاتىسۋىمەن وتكەن جينالىستا امانجول جازين سويلەپ, كوركين باستاعان باسشىلارعا ريزاشىلىعىن ءبىلدىرىپتى. اۋىلى ارالاس, قويلارى قورالاس بولعان ۇزاق جىلدار قورعالجىنعا قايتادان نەگە بەرمەدى دەگەن سۇراعىما اۋجەكەڭ ن.ۆ.موروزوۆ بۇل اۋداننان قۇتىلۋعا تىرىسىپ, شۇباركولدى سىلتاۋ ەتىپ قاراعاندىعا وتكىزۋگە بارلىق ءادىستى قولداندى دەپ جاۋاپ بەردى. سودان كەيىن اقمولا وبلىسىنىڭ ەكونوميكا باسقارماسى باستىعىنىڭ ورىنباسارى, تارتىپتىك كەڭەسى توراعاسى, وبلىستىق ءماسليحات حاتشىسى قىزمەتتەرىن اتقاردى. 2007 جىلى ءتورتىنشى شاقىرىلعان ماجىلىسكە دەپۋتات بولىپ سايلانادى. امانجول نۇرمۇحامبەتۇلى قاي قىزمەتتە بولسا دا, ەلىنە ادال قىزمەت ەتۋگە تىرىسادى. سونىڭ بەلگىسى بولار, «قۇرمەت» وردەنىنىڭ جانە بىرنەشە مەدالدار, ماقتاۋ گراماتولارىنىڭ يەگەرى بولۋى. مەنىڭ كەيىپكەرىم بۇگىنگى پرەزيدەنتىمىز ق.-ج.توقاەۆ تۋرالى جىلى لەبىزدەرىن ءبىلدىردى. ول كىسى سەنات توراعاسى بولىپ تۇرعاندا رەسپۋبليكا كۇنىمەن قۇتتىقتاۋ جىبەرىپ, ءبىر كىتابىن سىيعا تارتىپتى.
ءبىر اقساقال ايتىپتى عوي: توقسانعا كەلەم دەگەن جاسىم با, بىلامىق ىشەم دەگەن اسىم با دەپ. سول كىسى ايتپاقشى, امانجول نۇرمۇحامبەتۇلىنا سەكسەننىڭ سەڭگىرىنە شىعىڭىز, توقساننىڭ بىلامىعىن ءىشىڭىز, جۇزگە قاراي قادام باسىڭىز دەمەكپىن.
ەركىن داۋەشۇلى,
قازاقستان جۋرناليستەر وداعىنىڭ جانە استانا قالالىق ارداگەرلەر كەڭەسى
مەدياتوبىنىڭ مۇشەسى
