مەملەكەت باسشىسى استانا قالاسىن دامىتۋ ماسەلەلەرى جونىندە كەڭەس وتكىزدى. قازاقستان پرەزيدەنتىنە بۇعان دەيىنگى بەرىلگەن تاپسىرمالاردىڭ ورىندالۋ بارىسى جانە ەلوردا قۇرىلىسىنىڭ پەرسپەكتيۆالىق جوسپارى جونىندە باياندالدى.
كەڭەسكە پرەزيدەنت اكىمشىلىگىنىڭ باسشىسى ءا.جاقسىبەكوۆ, استانا قالاسىنىڭ اكىمى ءا.يسەكەشەۆ, استانا قالاسى اكىمىنىڭ ءبىرىنشى ورىنباسارى س.حوروشۋن جانە استانا قالاسىنىڭ ساۋلەت, قالا قۇرىلىسى جانە جەر قاتىناستارى باسقارماسىنىڭ باسشىسى ب.تايتاليەۆ قاتىستى.
ەلباسى قالا قۇرىلىسىن جۇرگىزۋ بارىسىندا قازىرگى ينفراقۇرىلىم مەن كوممۋنيكاتسيالاردىڭ مۇمكىندىكتەرىن ەسكەرۋ ماڭىزدى ەكەنىن ايتتى.
اسەت يسەكەشەۆ نۇرسۇلتان نازارباەۆقا ەلوردا قۇرىلىسىنىڭ بەسجىلدىق جوسپارى مەن جاڭا نىساندار سالۋ پەرسپەكتيۆالارى جونىندە مالىمدەدى.
– جوسپار اياسىندا 5 قۇرىلىس ايماعى قاراستىرىلعان. 2023 جىلعا دەيىن 9,5 ميلليون شارشى مەتر تۇرعىن ءۇي سالىنىپ, 500 مىڭ ادامعا ارنالعان 156 مىڭ پاتەر بەرىلەدى. 2027 جىلعا دەيىن 800 مىڭ ادامعا ارنالعان 16 ميلليون شارشى مەتر تۇرعىن ءۇي سالىنادى. وسىلايشا, ءسىزدىڭ تاپسىرماڭىزعا سايكەس, قالامىزدا 2 ميلليون ادامنىڭ تۇرۋىنا جاعداي جاسالاتىن بولادى, – دەدى استانا قالاسىنىڭ اكىمى.
كەڭەس قورىتىندىسى بويىنشا قازاقستان پرەزيدەنتى استانا قالاسىن ودان ءارى دامىتۋ جونىندە بىرقاتار ناقتى تاپسىرما بەردى.
