قوعامدىق كەڭەس استانا بويىنشا قالالىق جانە قالا ماڭى قاتىناستارىندا جولاۋشىلار مەن باگاجدى اۆتوموبيلمەن تۇراقتى تاسىمالداۋ تاريفتەرىنىڭ كەيبىر ماسەلەلەرىن قارادى.
«استانا LRT» جشس باسشىسى بەكمىرزا يگەنبەردينوۆ ءسوز الىپ, قوعامدىق كولىكتە جولاقىسىن تولەۋدىڭ سارالانعان تاريف ەنگىزىلگەننەن بەرى جۇمىستىڭ قورىتىندىسىنا توقتالدى. بۇگىندە ءبىر كۇندىك اعىم 637 مىڭ جولاۋشىنى قۇرايدى. كولىك كارتاسىن قولدانۋشىلاردىڭ ۇلەسى 91 پايىزعا جەتىپ, 72 مىڭ ادام جەڭىلدىك كولىك كارتاسىن پايدالانىپ ءجۇر. قالا بويىنشا 6 ارنايى كاسسا, 30 تەرمينال, 61 ساۋدا نۇكتەلەرىندە جانە 800 اۆتوبۋستا كولىك كارتاسىن ساتىپ الۋعا بولادى.
– قوعامدىق كولىك پايدالانۋشىنىڭ قولايلىعى ءۇشىن ەلەكتروندى تولەۋدىڭ قوسىمشا سەرۆيستەرىن ەندىرۋ قاجەت, – دەدى بەكمىرزا يگەنبەردينوۆ. ول الداعى ۋاقىتتا SMS نە ءموبيلدى قوسىمشا ارقىلى تولەۋدىڭ قوسىمشا تاسىلدەرى ەنەتىنىن ايتتى. بۇل ءۇشىن ارناۋلى قىسقا ءنومىر ىسكە قوسىلماق.
ءموبيلدى قوسىمشا ارقىلى جولاۋشىنىڭ تاڭداۋى بويىنشا تەلەفون بالانسىنان, بانك كارتاسىنان, سونداي-اق ەلەكتروندى اقشامەن تولەۋگە بولادى. مۇنىڭ ارتىقشىلىعى تەك ءوزىڭىز ءۇشىن عانا ەمەس, باسقا جولاۋشى ءۇشىن دە تولەۋگە مۇمكىندىك بەرەدى. اتالمىش شارالار قالا تۇرعىندارى مەن قوناقتارىنىڭ جولاقىسىن قولما-قول اقشاسىز تولەۋگە ىنتالاندىرۋعا باعىتتالعان. جانە قوعامدىق كولىك سالاسىندا قاراجات اينالىمىنىڭ اشىقتىعىن ارتتىرۋعا مۇمكىندىك بەرەدى.
بەكمىرزا يگەنبەردينوۆتىڭ ايتۋىنشا, سارالانعان تاريف ەنگىزۋىنىڭ ارقاسىندا استانالىق تاسىمالداۋشىلاردىڭ تابىسى كوبەيگەن. جاڭا تاريف ەنگىزىلگەن العاشقى اپتالاردىڭ قورىتىندىلارى بويىنشا اۆتوپارك تابىسىنىڭ 15 پايىزى «كولەڭكەدەن» شىققان. ءتيىمدى ءادىستى جەتىلدىرۋگە ارنالعان شارالاردى قوعامدىق كەڭەستىڭ مۇشەلەرى ءبىراۋىزدان قولدادى.
