قورجىندا – 1 التىن, 2 كۇمىس, 3 قولا
يندونەزيانىڭ جاكارتا جانە پالەمبانگ قالالارىندا 19 تامىز كۇنى كەزەكتى XVIII ازيا ويىندارى سورەدەن شىقتى. ءتۋرنيردىڭ ءبىرىنشى كۇنى مۇندا 21 مەدالدار جيىنتىعى ساراپقا سالىندى. ازىرگە قىتاي سپورتشىلارى توپ باستاپ كەلەدى. وسى ارالىقتا قازاقستان كومانداسى قورجىنعا 1 التىن, 2 كۇمىس جانە 3 قولا مەدال ءتۇسىردى.
مۇندا قازاق ەلىنىڭ نامىسىن 440 سپورتشى قورعاعالى تۇر. ولار 25 وليمپيالىق سپورت ءتۇرى بويىنشا وتەتىن 37 جارىستا كۇش سىناسادى.
ويىندار 2 قىركۇيەك كۇنى مارەگە جەتەدى.
19 تامىز, ءبىرىنشى كۇن
دميتري الەكسانين – التىن جۇلدەگەر. ويىنداردىڭ بەتاشار كۇنى قازاقستان قۇراماسىنىڭ قورجىنىنا سەمسەرلەسۋشى دميتري الەكسانين العاشقى التىن مەدالدى سالدى. ول جارتىلاي فينالدا 2012 جىلعى لوندون وليمپياداسىنىڭ قولا جۇلدەگەرى كورەيالىق دجۋنگ دجين سۋندى 15:12 ۇپايىمەن جەڭدى. ال فينالدا دميتري تاعى ءبىر كورەي اتلەتى – 2016 جىلعى ريو وليمپياداسىنىڭ چەمپيونى پاك سان ەندى 15:12 ەتىپ تىزە بۇكتىردى.
جالپى, بۇل – ديمانىڭ ازياداداعى ەكىنشى جۇلدەسى. ول 2014 جىلى سەۋلدە وتكەن ويىنداردا كوماندالىق جارىستا قولا جۇلدەگەر اتانعان. ءبىزدىڭ التىن جۇلدەگەر جارىس سوڭىندا ءوزىنىڭ بۇل تابىسىن جاقىندا كىسى قولىنان قازا تاپقان مانەرلەپ سىرعاناۋشى دەنيس تەنگە ارنايتىنىن ايتتى.
دانيار قايسەنوۆ – كۇمىس جۇلدەگەر. ەركىن كۇرەستەن 74 كيلوعا دەيىنگىلەر اراسىندا ەل نامىسىن قورعاعان سپورتشىمىز فينالدا وزبەك بەكزود ابدۋراحمونوۆقا 2:3 ەسەبىمەن ەسە جىبەرىپ الدى. ول فينالعا دەيىن ەكى قارسىلاسىنان باسىم ءتۇستى.
ساياتبەك وقاسوۆ – قولا جۇلدەگەر. تۋرنيردە 65 كيلوعا دەيىنگى سالماقتا بوز كىلەمگە شىققان ساياتبەك وقاسوۆ ءۇشىنشى ورىن ءۇشىن تالاستا ابىروي بيىگىنەن كورىندى. ول تۇرىكمەن باتىر بوردجاكوۆتان ايلاسىن اسىرا ءبىلدى – 5:2.
ادىلەت داۋلىمباەۆ – قولا ءجۇلدەگەر. كومانداعا ەكىنشى قولا جۇلدەنى دە ەركىن كۇرەس شەبەرى اكەلدى. 86 كگ سالماقتا كۇش سىناسقان پالۋانىمىز قىرعىزستاندىق اليگادجي گاميدگادجيەۆتى 3:0 ەسەبىمەن ۇتتى.
تەننيس. قازاقستاننىڭ ەكى ارالاس جۇبى ءبىرىنشى كۇنگى شايقاستاردا جەڭىسكە جەتتى. اتاپ ايتقاندا, اننا دانيلينا – الەكساندر نەدوۆەسوۆ ۆەتنامدىق كسيللا فودور – مينح تۋان فامدى 6:4, 6:4 ەتىپ تىزە بۇكتىرسە, گوزال اينيتدينوۆا – تيمۋر حابيبۋلين ۆەتنامنىڭ كەلەسى وكىلدەرى فۋونگ ۆان نگۋەن – ساۆاننا نگۋەندى 6:2, 6:2 ەسەبىمەن ۇتىپ شىقتى.
كوگالداعى حوككەي. ەلىمىزدىڭ ايەلدەر قۇراماسى ءبىرىنشى ماتچىندا تايلاند كومانداسىنان 3:1 ەسەبىمەن باسىم ءتۇستى. ءبىزدىڭ قىزدار اراسىندا ۆەرا دوماشنەۆا, ناتاليا گاتاۋلينا جانە ناتاليا سازونتوۆا مەرگەندىكتەرىمەن تانىلدى.
ۆاتەرپول. تاعى ءبىر ايەلدەر قۇراماسى گونكونگتان كەلگەن ارىپتەستەرىن 22:2 ەسەبىمەن كۇيرەتە جەڭدى. مۇنىڭ الدىندا ولار تاي قىزدارىن 13:4 ۇپايىمەن ۇتىپ, قىتايلىقتاردان 4:11 بولىپ جەڭىلىپ قالعان ەدى.
ۆولەيبول. تاسپا دوپتان ەلىمىزدىڭ ايەلدەر قۇراماسى ءوزىنىڭ ءبىرىنشى كەزدەسۋىندە تايپەي قىزدارىن 3:1 ەتىپ ۇتتى.
گاندبول. قازاقستاننىڭ قول دوبىشى قىزدارى كحدر جاساعىنا 33:37 ەسەبىمەن جول بەرىپ الدى. مۇنىڭ الدىندا ولار ۇندىستاندىق قۇربىلارىن 36:19, قىتايلىقتاردى 27:26 ەسەبىمەن جەڭگەن بولاتىن.
باسكەتبول. ەلىمىزدىڭ باسكەتبولشى قىزدارى ءبىرىنشى كۇنى يندونەزيا قۇراماسىنان 85:73 ەسەبىمەن باسىم ءتۇستى. مۇنىڭ الدىندا ءبىزدىڭ قۇراما تايپەيدەن 42:72 بولىپ ۇتىلىپ, ءۇندىستاندى 79:61 ەتىپ جەڭگەن ەدى.
20 تامىز, ەكىنشى كۇن
فاريزا الدونعاروۆا – قولا جۇلدەگەر. قازاقستاندىق تاەكۆوندوشى 53 كگ سالماقتا ەل قورجىنىنا ءۇشىنشى قولا مەدالدى سالدى. العاشقى اينالىمدا وزبەكستاندىق دينوراحان ماماديبراگيموۆانى, شيرەك فينالدا يراندىق ەلاح شەيدايدى جەڭگەن الدونعاروۆا جارتىلاي فينالدا تايپەيلىك سي پو يانعا ەسە جىبەردى.
جۇلدىز ەشىموۆا – كۇمىس ءجۇلدەگەر. ول 53 كگ سالماقتا كۇرەسىپ, فينالدا سولتۇستىك كورەيانىڭ بالۋانى پاك يونگ ميدەن جەڭىلدى. وعان دەيىن لي چەن حەنى (وڭتۇستىك كورەيا), دجانتيما ۆيرانگسانى (تايلاند) جانە ەردەنەچيمەگەي سۋميانى (موڭعوليا) جەڭدى.
دايىنداعان
دامير قوجامقۇل