اپتا سوڭىندا استانادا قازاق كۇرەسىنەن ازيا چەمپيوناتى شىمىلدىق تۇرەدى. بايراقتى باسەكەدە ەلىمىز بەن جاپونيا, شري-لانكا, وزبەكستان, تاجىكستان, تۇرىكمەنستان, موڭعوليا, يران, پاكىستان, قىرعىزستان, ءۇندىستان مەملەكەتتەرىنىڭ 80 بالۋانى باق سىناماق.
بوزكىلەم تورىندە ازيانىڭ كىل مىقتىلارى 8 سالماق دارەجەسى بويىنشا بەلدەسىپ, تۇيەپالۋاندىق جۇلدەنى دە ساراپقا سالماق. مادەنيەت جانە سپورت مينيسترلىگى مەن استانا قالاسىنىڭ اكىمدىگىنىڭ, «سامۇرىق-قازىنا» ۇلتتىق ءال-اۋقات قورىنىڭ جانە ERG ەۋرازيالىق توبىنىڭ قولداۋىمەن, حالىقارالىق قازاق كۇرەسى فەدەراتسياسىنىڭ ۇيىمداستىرۋىمەن وتەتىن چەمپيوناتتا 16 سپورت تورەشىسى جۇمىس ىستەيدى.
قازاق كۇرەسى قازاق حالقىنىڭ ۇلتتىق سپورت ءتۇرى عانا ەمەس, سونداي-اق يۋنەسكو-نىڭ ماتەريالدى ەمەس مۇرالار تىزىمىنە دە كىرگەن بولاتىن. ايتا كەتۋ كەرەك, وتكەن جىلى قۇرىلعان حالىقارالىق قازاق كۇرەسى فەدەراتسياسىنىڭ پرەزيدەنتى بولىپ ەنەرگەتيكا ءمينيسترى قانات بوزىمباەۆ تاعايىندالعان-دى. ال فەدەراتسيانىڭ ۆيتسە-پرەزيدەنتتەرى قاتارىندا قازاقتان شىققان تۇڭعىش وليمپيادا چەمپيونى جاقسىلىق ۇشكەمپىروۆ پەن داڭقتى بالۋان داۋلەت تۇرلىحانوۆ جانە قحر مەن پولشا فەدەراتسيالارىنىڭ جەتەكشىلەرى بار.
جالپى, جىل سايىن وسى ۇلتتىق سپورت تۇرىنەن بىرنەشە حالىقارالىق جانە رەسپۋبليكالىق جارىستار ءداستۇرلى تۇردە ءوتىپ تۇرادى. اتاپ ايتار بولساق, سوڭعى 5-6 جىلدان بەرى وتكىزىلىپ كەلە جاتقان «قازاقستان بارىسى», «ەۋرازيا بارىسى», «الەم بارىسى» تۋرنيرلەرى التى الاشتان بولەك, التى قۇرلىقتىڭ نازارىنان تىس قالمايدى دەسەك, ارتىق ايتقاندىق بولماس. سونداي-اق, قازاق كۇرەسىنەن وتكەن بىلتىرعى الەم چەمپيوناتىنا 40 ەلدەن 160 بالۋان قاتىسقان بولاتىن.
حالىقارالىق قازاق كۇرەسى فەدەراتسياسىنىڭ باس حاتشىسى ازامات تىلەۋلەسوۆتىڭ ايتۋىنشا, الداعى ازيا چەمپيوناتىنىڭ جۇلدە قورى 20 مىڭ اقش دوللارىن قۇرايدى.
