مىنەزى دە, ولەڭى دە وزگەلەردەن بولەكتەۋ اقىن مارالتاي رايىمبەكۇلىمەن سۇحباتتاسۋ كوپتەن ويىمىزدا جۇرگەن. ءسويتىپ جۇرگەندە «قازاق ادەبيەتى» گازەتىنەن ءبىر توپ جاڭا ولەڭىن وقىدىق. سول توپتامادان اقىننىڭ ومىردەن ولەڭ ىزدەگەن راحاتىن دا, ازابىن دا اڭعاردىق. جاڭا ولەڭدەرىنە ريزا كەيىپپەن شايىردى اڭگىمەگە شاقىرعان ەدىك. شىعارماشىلىعى جايلى باستالعان سۇحبات ادەبيەت جانكۇيەرلەرى كوز تىككەن بايگە – مەملەكەتتىك سىيلىققا بارىپ, ءبىر-اق تىرەلدى. ەكەۋارا اڭگىمەدە ەلوردانىڭ كوركەم, دەگدار, بەكزات بولمىسى ايتىلدى, اقىننىڭ ۇلتتىق يدەولوگيا توڭىرەگىندەگى ويلارىن دا بىلدىك.
– ادەبي باسىلىمدا جارىق كورگەن سوڭعى ولەڭدەرىڭىز جايلى وقىرمان تاراپىنان, ادەبيەتتەگى اعا-اپالارىڭىزدان پىكىر ەستىگەن بولارسىز؟ سول لەبىزدەردەن باستايىقشى اڭگىمەمىزدى…
– بۇرىن مەن كوپ ءمان بەرمەگەن ەكەنمىن, جاقسى ءسوز ادامنىڭ جانىن جىلىتىپ, ورىندى سىن اقىندى وسىرەدى ەكەن. بۇل – مەنىڭ سوڭعى بەس جىلدا جازعان ولەڭدەرىم, سوندىقتان مەن كۇتكەن دە, كۇتپەگەن دە پىكىرلەر ەستىدىم. كۇلاش احمەتوۆا اپامىزدان باستاپ, يران-عايىپ اعامىز, ادەبيەتتىڭ بىلگىرى امانگەلدى كەڭشىلىكۇلى پىكىر ايتىپ, حابارلاستى. الەۋمەتتىك جەلىدەن قانشاما ءىنى-قارىنداس اقجارما ويىن, شىنايى تىلەگىن جازدى. اقىنعا ولەڭ جازباۋ دەگەن – قىلمىس. ونى ەشقانداي دا سەبەپپەن اقتاپ الۋعا بولمايدى.
– قىزمەتپەن ءجۇرىپ, سوڭعى ۋاقىتتا ولەڭ جازۋدى سيرەكسىتىپ العان جوقسىز با؟
– اقىن جۇرەگى ۇنەمى جىرلاپ تۇرادى. جۇرەگىمىز دۇرسىلدەپ سوعىپ تۇرعاندا, كوڭىل ماڭگى جىردىڭ ۇستىندە تۇرادى, سولاي بولۋى كەرەك تە. كۇندە نەمەسە كۇنارا ولەڭ تۋدىراتىن ونەركاسىپ ەمەسپىن, بىراق جازىپ جاتىرمىز. ول جىرلاردىڭ بارلىعىن جىپكە تىزگەندەي جاريالاپ جاتپاساق تا, قالام قولىمىزدان, ولەڭ ويىمىزدان كەتكەن جوق. كەزىندە ءبىر جازۋشى: «رومان دايىن, تەك ونى جازىپ شىعۋ عانا قالدى» دەپ ايتقان ەكەن. سول سياقتى كوكەيدە جۇرگەن, ءپىسىپ-جەتىلىپ قالعان نارسەلەر كوپ. ءسوزىمنىڭ باسىندا ايتقانىمداي, ولەڭ جازباۋ – قىلمىسپەن تەڭ. ءتىپتى ولگەننەن كەيىن دە ولەڭىمىز وقىلا بەرەر.
مەملەكەتتىك سىيلىقتىڭ قالامگەرلەر
اراسىنا الا مىسىق جۇگىرتەتىن قولايسىزدىعى دا بار
– شىعارماشىلىق ادامى ءۇشىن ماڭىزدى بايگەنىڭ ءبىرى – مەملەكەتتىك سىيلىق. ەكى جىل بۇرىن ءوزىڭىز دە وسى دوداعا كىتابىڭىزدى قوستىڭىز. الەۋمەتتىك جەلىدە «وسى بايگە بيىل كىمگە بۇيىرادى؟» دەگەن ساۋال توڭىرەگىندە جازبالار جازىلىپ, ادەبيەت جانكۇيەرلەرى ءوزارا داۋلاسىپ تا ءجۇر. پروزادان مارحابات اعامىزدىڭ, پوەزيادان تىنىشتىقبەك پەن عالىم اعامىزدىڭ, اقۇشتاپ اپامىزدىڭ جانە وزگەلەردىڭ شىعارماشىلىعى باسكە تۇسەر بيىلعى بايگە جونىندە پىكىرىڭىزدى بىلگىم كەپ تۇرعانى…
– ەكى جىل سايىن ادەبيەت الەمىندە ۇلكەن ءدۇمپۋ, الاشاپقىن بولادى. ءبارىمىزدىڭ نازارىمىز وسى ماراپاتقا ۇسىنىلعاندارعا قاراي بۇرىلادى, بۇل – زاڭدى دا. مەملەكەتتىك سىيلىقتىڭ اقىن-جازۋشىلاردىڭ اراسىنا الا مىسىق جۇرگىزىپ قوياتىن قولايسىزدىعى دا بار. سونىسى كوڭىلدى كۇپتى ەتەدى. ءوز باسىم شىعارماشىلىق وكىلدەرىنىڭ ءبىر-بىرىنە تىلەۋلەس, تىلەۋقور بولعانى دۇرىس دەپ ويلايمىن. سۆەتقالي نۇرجان, ءشومىشباي ساريەۆ, بەكسۇلتان نۇرجەكەۇلى, مارقۇم راقىمجان وتارباەۆ اعالارىممەن بىرگە ەكى جىل بۇرىن وسى دوداعا مەن دە «قاراتاۋ عازالدارى» اتتى كىتابىمدى قوستىم. سوندا تىزىمدەگى 20 ادامنىڭ بارىنە تىلەكشى بولدىم. ويتكەنى كەز كەلگەن ادام ونەرگە ءوزىن مويىنداتۋ ءۇشىن كەلەدى. كورىپكەلدىك پەن ساۋەگەيلىك مەنىڭ تابيعاتىمدا جوق, سوندىقتان سۇراعىڭا پالەن دەپ جاۋاپ بەرە المايمىن. بيىلعى بايگەگە كىتابىن قوسقان اعا-اپالارىمنىڭ قاي-قايسىسى دا شىن جۇيرىك. ولاردىڭ ەشقايسىسىنىڭ ماعان جاتتىعى جوق.
مەمسىيلىقتى كىم السا دا, لايىقتى دەپ ويلايمىن. سەبەبى ولاردىڭ ارقايسىسى شىعارماشىلىققا تاعدىرلارىن ارنادى عوي. بالا-شاعالارىن ءبىر جاققا ىسىرىپ قويىپ, كۇندىز-ءتۇنى جازۋمەن اينالىستى, ادەبيەتپەن «اۋىردى». اللاعا شۇكىر, الەۋەتى جاعىنان مىقتى ەلمىز. مەملەكەتتىك سىيلىقتىڭ بايگەسىنە بەرىلەتىن قوماقتى قارجىنى قالامگەرلەردىڭ ارقايسىسىنا ۇستاتىپ, رازى قىلسا دا, قازاقستان ەش كەدەيلەنبەيدى.
كەزىندە 2000 جىلى مۇقاعالي ماقاتاەۆقا مەمسىيلىق بەرىلگەندە, رامازان توقتاروۆ, باققوجا مۇقاي اعالارىمىزعا دا قاتار بەرىلىپ, 5-6 ادام مەملەكەتتىك سىيلىقتىڭ يەسى اتاندى عوي. سىيلىق قاتارىنان وسىلاي بىرنەشە ادامعا بەرىلسە ەرسى ەمەس.
– قازىرگى جاستار وزىڭىزدەي اقىنداردى وقىعاننان گورى, تارسىل-كۇرسىلى كوپ ەسترادانىڭ جاعىندا. اقىن-جازۋشىلار ەمەس, انشىلەر العا وزعان زامان جايلى ويلاناسىز با كەي-كەيدە؟
– ۋاقىت پەن زامان اعىمى ويلاندىرماي قويمايدى, ارينە. كەزىندە جۇماتاي جاقىپباەۆتى زامانداستارى, وقىرماندارى «قۇدايسكي» اقىن ساناعان, مۇقاعاليدان ارتىق بولماسا, ءبىر ءپاس تە كەم ەمەس, مىقتى اقىن دەپ باعالادى. جۇماتايدىڭ ءاربىر ولەڭى شەدەۆر ەدى! سول جۇماتايدى كىم ايتىپ جاتىر قازىر؟ مەنى وسى سۇراق مازالايدى… بۇگىنگى جاستار ەسترادانى تىڭداۋمەن قاتار جۇماتاي جاقىپباەۆتىڭ, مارات وتاراليەۆتىڭ, كەڭشىلىك مىرزابەكوۆتىڭ, سەرىك تومانوۆتىڭ, ولاردان بەرگىدەگى ەسەنعالي راۋشانوۆ پەن تىنىشتىقبەك ابدىكاكىموۆتىڭ, قازاق پوەزياسىن دامىتۋعا ەڭبەگى بار باسقا دا اتى اتالماعان اقىنداردى وقىسا ەكەن دەيسىڭ.
اۋىلىما ءمادىنىڭ ەسكەرتكىش-ءبيۋستىن ورناتۋعا اتسالىستىم
– جىل باسىنان بەرى ەلىمىزدە رۋحاني جاڭعىرۋعا باعىتتالعان شارۋالار كوپتەپ اتقارىلىپ جاتىر. وسى باعىتتا ءوزىڭىز نە ءبىتىردىڭىز؟
– بۇگىندە ۇلتتىق مەملەكەتتىك كىتاپ پالاتاسىندا كورنەكتى قالامگەر الىبەك اسقاروۆپەن بىرگە جۇمىس جاسايمىن. استاناداعى اكادەميالىق كىتاپحانا مەن الماتىداعى ۇلتتىق كىتاپحانادا جوق قانشاما قۇندى كىتاپتىڭ نەگىزگى داناسى وسى مەكەمەدە ساقتاۋلى تۇر. ەلىمىزدىڭ اۋداندارىنان, وبلىس ورتالىقتارىنان شىققان گازەت-جۋرنالداردىڭ ارقايسىسىنا ءمور باسىلىپ, مەملەكەتتىڭ ماڭىزدى قۇجاتى رەتىندە ساقتالۋدا. كىتاپ پالاتاسىنا قىزمەتكە كەلگەلى ەلىمىزدىڭ جاۋھارى بولعان سول قۇندىلىقتاردىڭ ناسيحاتتالۋىنا كوڭىل ءبولىپ, رۋحاني كۇرەتامىردان قول ۇزبەۋگە باعىتتالعان شارالاردىڭ باسى-قاسىندا ءجۇرمىن. ەلباسىمىز نۇرسۇلتان نازارباەۆتىڭ «رۋحاني جاڭعىرۋ: بولاشاققا باعدار» باعدارلامالىق ماقالاسىندا ايتىلعان تۋعان جەرگە كوڭىل ءبولۋ, اتى اتالماي كەتكەن دارىنداردى ىزدەپ تابۋ دەگەن دۇنيەلەر كوزى قاراقتى ادامدى ويلانتپاي قويمايدى. مەنىڭ تۋعان اۋىلىم يگىلىكتەن ءمادى ءشاۋتىۇلى دەگەن ءبىرتۋار كۇيشى شىققان. مادىدەي قازاق كۇيىنىڭ بىلگىرىن ادامداردىڭ ءبىرى بىلسە, ءبىرى بىلمەيدى بۇگىندە. ون سەگىز جاسىندا شەشەك اۋرۋىمەن اۋىرىپ, ءمادىنىڭ ەكى جانارى سۋالىپ, ءاز بولىپ قالعان ەكەن. قۇدايدىڭ قۇدىرەتىمەن 70-كە كەلگەندە تۋىس نەمەرەسى ويناپ وتىرىپ, اتاسىنىڭ كوزىن تىرناپ الىپ, كۇيشىنىڭ كوزى شايداي اشىلىپ, زاعيپتىقتان قۇتىلعان. ءمادى ءشاۋتىۇلىنىڭ ارتىندا قالعان مۇراسىن جيناقتاۋدا مىرزاتاي جولداسبەكوۆ اعامىزدىڭ اتقارعان ەڭبەگى وراسان زور. قايبىر جىلى قازاق راديوسىندا جۇمىس ىستەپ جۇرگەنىمدە مەن دە وزىمشە جيناقتاعان بولدىم. بيىل ءبىزدىڭ سارىسۋ اۋدانىنىڭ 90 جىلدىعى عوي. سوعان وراي, «ءمادى» اتتى ەستەلىك-كىتاپ قۇراستىردىق. الدا, 29 قىركۇيەكتە – سول كىتاپتىڭ تۇساۋكەسەرى ءارى يگىلىكتەگى مادەنيەت ءۇيىنىڭ الدىنا تۇرعىزىلعان ءمادىنىڭ ەسكەرتكىش-بيۋستىنىڭ اشىلۋ ءراسىمى. وسىنداي ءىرىلى-ۇساقتى ىستەر اتقارىپ جۇرگەن جايىم بار.
– كەڭەس زامانى كەزىندە اقىن-جازۋشىلاردى يدەولوگيالىق جۇمىسقا جاقسى پايدالاندى. قازىر سولاي پايدالانۋعا بولاتىن قالامگەر بار ما؟
– ۋاقىتقا, زاماننىڭ اعىمىنا ءۇن قوسىپ, كەزەڭدىك دۇنيەلەر جازۋعا بولادى. بىراق شىعارماشىلىق ادامىن ىلعي وسى باعىتقا «جۇمساۋ» دا دۇرىس ەمەس, مەنىڭشە. ونەر ادامى ەركىن بولۋى كەرەك, ازات عۇمىر كەشۋى كەرەك. قوعامداعى ءارتۇرلى جاماندى-جاقسىلى قۇبىلىستار, سوڭعى جەتىستىكتەر اقىن شىعارماشىلىعىندا قالايدا كورىنىس تابادى. اقىننىڭ ءار ولەڭىندە ۋاقىت پەن كەزەڭنىڭ تابى بولادى ويتكەنى. باسقاعا بارماي-اق, جەكە وزىمنەن ايتايىن. ءبىراز بۇرىن استاناعا ارناپ «قازاق ەلى» اتتى ولەڭ جازدىم. وسى ولەڭگە ارمان ايتقاليۇلى جايىموۆ رومانس سىندى كەرەمەت شىعارما جازدى. بۇگىندە باس قالاداعى مادەني شارالاردىڭ شىمىلدىعى وسى انمەن ءتۇرىلىپ, جابىلىپ ءجۇر. ايتايىن دەگەنىم, شىعارماشىلىق ادامى قوعامدا بولىپ جاتقان جەتىستىكتەرگە وسىلاي شىن تامسانعاندا عانا جاقسى شىعارما تۋادى. بىزدەگى يدەولوگيانىڭ ءتۇپ-تامىرى, تورەسى – جەكە مەملەكەت بولىپ, ەڭسەمىزدى تىكتەگەنىمىز, كەشەگى بابالارىمىز ارمانداپ كەتكەن جەرگە اقوردا سالۋىمىز عوي. كەز كەلگەن شىعارماشىلىق ادامى استانانى ۇلىقتاۋعا مىندەتتى, ول ءاربىر ازاماتتىڭ پارىزى دەپ ويلايمىن. ءويتكەنى استانا – تاۋەلسىزدىك العالى, جەكە مەملەكەت بولعالى ءبىزدى الەمگە تانىتقان قالا.
استانا – ءوزىم سياقتى مەيىرىمدى,
مەندەي تاكاپپار, قايسار دا قاھارمان
– ءسىز استانادا ەمەس, الماتىدا تۇراسىز. ءايتكەنمەن, ەلوردانىڭ كەشەگى كەلبەتى مەن بۇگىنگى 20-عا كەلگەندەگى بەينەسىن سالىستىرعاندا نە بايقايسىز؟
– بۇدان 20 جىل بۇرىن مەملەكەتىمىزدىڭ استاناسىن الماتىدان اۋىستىراردا ەلباسى نۇرسۇلتان نازارباەۆتىڭ «جەر ءجانناتى – جەتىسۋعا سىيماي بارا جاتقان جوقپىز, قيماي بارا جاتىرمىز. بۇگىنگى ءداۋىر بىزدەن وسىنداي شەشىمدى تالاپ ەتۋدە» دەگەن ءسوزى بار. 20 جىل بۇرىن بۇل شەشىمگە ەلباسى بىلەگىن ءتۇرىپ, جۇرەگىن جەلدىڭ وتىنە قويىپ تۇرىپ كىرىستى. باستاپقىدا رۋحانيات پەن ادەبيەت الەمىندەگى كوپ ادام قولداي قويعان جوق. جاسى ۇلكەن زيالى كىسىلەردىڭ اۋزىنان «استانادا مادەني ورتا قالىپتاسقان جوق, ءالى دە بولسا جەرسىنبەي جاتىرمىز, رۋحاني جۇتاڭدىقتا ءجۇرمىز» دەگەندەي پىكىرلەر ايتىلىپ قالاتىن. قازىرگىدەي ساۋلەتتى استانامىزدىڭ بولاتىنىنا, وندا ۇلت رۋحانياتىنىڭ وكىلدەرى ورتا قالىپتاستىراتىنىنا سەنبەگەننىڭ ءبىرى مەن ەدىم. جەلدىڭ وتىندەگى جەردە ەرتەگىدەگىدەي قالا بوي كوتەرىپ, ونداعى بيىك عيماراتتاردا ەلىمىز ءۇشىن ماڭىزدى شەشىمدەر قابىلدانادى دەگەنگە العاشقىدا يلانبادىم. اقىن دەگەن مۇندايدا ەلدىڭ الدىندا ءجۇرۋى كەرەك قوي. بىراق كوپ وتپەي-اق, ەلباسىنىڭ ۇستانعان سارابدال ساياساتىنا, استانانىڭ كەسكىن-كەلبەتىنە ءتانتى بولدىق. سودان دا:
«اسپاعان ەلiم,
تاسپاعان ەلiم,
تاريحىن قايتا
باستاعان دەدiم.
جۇمىر جەر, كەنەت,
جۇزiك بوپ كەتسە,
گاۋھارداي جانعان –
استانام مەنiڭ!» دەپ ولەڭ جازدىم. استاناعا قازىر كۇللى الەم قىزىعا كوز تىگىپ قارايدى.
– استاناعا ارناعان وسى ولەڭىڭىزدى قاي جىلى جازدىڭىز؟
– وسىدان 10 جىلداي بۇرىن, ءسال ىلگەرىرەكتە جازدىم. ولەڭ جازىلاردان بۇرىن «ۇلتتىق تۇتاستىعىمىزدىڭ ماسەلەسi ەڭ وتكiر قويىلعان ارعى توقتامىس پەن ەدiگە, بەرگi تاۋكە مەن ابىلاي زاماندارىندا بيلiك ورداسىنىڭ وسى ماڭايعا قايتا-قايتا كوشiپ بارىپ, كوشiپ كەتۋiندە دە كوپ سىر بار» دەگەن ەلباسىنىڭ ءسوزى ويىما ورالا بەردى. مۇنىڭ ءوزى باس قالامىز ورنالاسقان ايماقتىڭ ماگيالىق سيپاتىن, ەلدىگىمىز بەن بىرلىگىمىزدىڭ قاسيەتىن بىلدىرسە كەرەك. سودان دا ەلوردا جايلى ولەڭىمە پرەزيدەنتىمىزدىڭ ءجيى ايتاتىن وسى ءسوزىن ەپيگراف ەتىپ العانمىن. استانا – ساياسي, الەۋمەتتىك, رۋحاني جاعىنان تۇتاستىعىمىزدىڭ كەپىلى بولاتىن قۇتتى وردامىز بۇگىندە. «ءبىر مەڭىڭە بۇقارا مەن سامارقاندى بەرەر ەم» دەيتىن باياعى قوجا حافيز سياقتى استانانى وزىمە يەمدەنىپ ايتار بولسام, استانا – ءوزىم سياقتى مەيىرىمدى, مەندەي تاكاپپار, قايسار دا قاھارمان. ەلوردا مىڭجىلدىقتار بويى كوزىمىزدىڭ نۇرى, جۇرەگىمىزدىڭ ءتىلى بولىپ قالا بەرمەك.
باسىمنان اۋىر كەزەڭدەر ءوتتى
– ەردىڭ جاسى – ەلۋىڭىز دە يەك استىندا تۇر. «ەلۋ – ەكى جيىرما بەس» دەسەك تە, وتكەن كۇندەرىڭىزگە, ارتىڭىزعا بۇرىلىپ قارايسىز با؟ نە كورەسىز؟
– ەلۋگە دەيىن ءتۇرلى تاراۋ جولداردان وتتىك. الماتىعا كەلگەن كەزدە الاتاۋداي كورگەن كەي اعالارىمنىڭ تاۋ ەمەس, جاي توبەشىك ەكەنىن اڭعاردىم. ىشكى شىندىعىم ءومىر شىندىعىمەن بەتپە-بەت كەلگەندە, مەن جىعىلىپ, جەڭىلىپ قالدىم. سودان دا كەزىندە كەڭسايعا شىعىپ, بەيىت كەزىپ كەتتىم. ءولى اقىندارمەن, ارۋاقتارمەن تىلدەسىپ, ءبىرىنىڭ ولەڭىن ەكىنشىسىنە بارىپ وقىپ, ءوزىم جاقسى كورگەن اقىندار مۇقاعالي, جۇماتايلاردىڭ رۋحىمەن تىلدەستىم. تالاي رەت ومىردەن ىزدەگەن اقيقاتىمدى تاپپاي, شىنشىل دەگەن ادامداردىڭ ەكىجۇزدىلىگىن كورگەندە, باۋكەڭنىڭ – باۋىرجان مومىشۇلىنىڭ بەيىتىنە بارىپ, كوزىمە جاس الىپ, ەگىلگەن ساتتەرىم بولدى. 9 جىل بويى جۇمىسسىز ءجۇردىم. ماڭدايىمنان سيپاپ, جانى اشىعان ادامدار بولدى, بىراق جۇمىسقا تۇرا المادىم. وعان ءبىر جاعىنان مەنىڭ ءجۇرىس-تۇرىسىم, مىنەزىم دە اسەر ەتتى مە, الدە ول كەزدە زامان سونداي ما, ايتەۋىر, باسىمنان اۋىر كەزەڭدەر ءوتتى. سول ۋاقىتتاردا مەنىڭ تاعدىرىم بىردە الماتىنىڭ كوشەسىندە, ءبىر قالادان ەكىنشى قالاعا اسىعا جۇيتكىگەن پويىزداردا, ودان باسقا قالالاردا ايلاپ-اپتالاپ ءوتىپ جاتاتىن.
– بۇل ىشتەگى رۋحتىڭ قوعاممەن, ۋاقىتپەن ساناسپاي, الاسۇرۋى ما؟ تىكە ايتسام, كەشىرىڭىزشى, ءسىزدىڭ ەسىمىڭىز اتالعاندا «مارالتاي بۇرىندارى تاعدىرلى اقىن بولىپ كورىنگىسى كەلەتىن» دەگەندەي اڭگىمەلەر ءالى دە ايتىلىپ قالادى. وسىنداي سوزدەردى ەستىگەندە قانداي كۇيدە بولاسىز, جالپى؟
– مەنىڭ تاعدىرىمدى اركىم قالاي قابىلدايدى, ونى وزدەرى بىلەدى. بىراق الماتىدا 9 جىل جۇمىسسىز جۇرگەنىم دە, كوشە كەزىپ, كەڭساي ارالاپ كەتكەنىم دە راس. ونى قازىر كىمگە بارىپ «ولاي ەمەس, بىلاي ەدى» دەپ ايتقاندايسىڭ. كەزىندە ابايدىڭ قادىرىنە جەتپەگەن, ماحامبەتتىڭ «باسىن كەسكەن», اقان مەن ءبىرجان سالدى «جىندانىپ كەتتى» دەپ «ارباعا بايلاپ ساباعان» قازاق مەنى اياسىن با؟ ويى وزىق ازاماتتاردىڭ ەل ىشىنەن, ءوز قازاعىنان ءزابىر كورمەگەنى كەمدە-كەم عوي. بىرەۋلەردەن ءسوز ەستىپ قالسام, وسى نارسەلەر ەسىمە تۇسەدى. ءسويتىپ, «قۇداي-اۋ, دانا اباي مەن باتىر ماحامبەتتىڭ, سال ءبىرجاننىڭ قاسىندا ءبىز كىم ەدىك؟» دەپ تاۋبەمىزگە كەلەمىز. بىراق بۇل قازاعىم جامان دەگەن ءسوز ەمەس. ءبىز سول بارىمىز بەن جوعىمىزدى بۇتىندەپ, ءبىر-ءبىرىمىزدى سۇيرەۋگە, ايالاۋعا ءتيىستى ەلمىز. مەنىڭ ومىرىمدەگى كوپ نارسە ءتاۋەلسىزدىكپەن بايلانىستى بولدى. ەلىمىز ەگەمەندىگىن العان جىلدارى مەن دە ەسىمدى جيىپ, جان-جاعىما قارادىم, بويىم مەن ويىمدى تۇزەپ, رۋحىمدى تىكتەدىم. ىشكى مۇمكىندىگىمدى تانىعان اعالار قىزمەتكە شاقىردى. مەنىڭ تاعدىرىم استانامەن تاعدىرلاس, باس قالامەن مەرەيلەس. استانادا مەنىڭ جىرىم ماڭگى كۇلىپ, سويلەپ تۇراتىن بولادى. مەنىڭ جىرىم دەگەنىم – قازاقتىڭ جىرى.
اڭگىمەلەسكەن
قارلىعا يبراگيم
