الماتى اۋدانىنا قاراستى «تەمىرجولشىلار» تۇرعىن الابىنداعى قىرقىنشى – وسى وڭىردەگى ەڭ بايىرعى تەمىرجول بەكەتى. 1931 جىلى تسەليننىي تەمىرجولى اقمولا بولىمشەسىنىڭ ەكىنشى كلاستى ستانساسى رەتىندە قۇرىلعان. بۇگىندە 92 جىلدىق تاريحى بار ءبىرىنشى ساناتتى ستانسادا ەلورداعا عانا ەمەس, اقمولا وڭىرىنە ۆاگوندارمەن كەلەتىن بارلىق جۇك قابىلدانىپ, تۇسىرىلەدى.
اكىمشىلىك عيماراتىنىڭ الدىنان ءبىزدى ستانسا باستىعى الەكسەي چەرناي جىلىۇشىراي جانە تىلشىلەر كەلە جاتىر دەگەن سوڭ, ءسال تولقىنىسپەن قارسى الدى. ءوزى دە تەمىرجولشىلار اۋلەتىنەن شىققان ول ءۇش جىلدان بەرى وسى مەكەمەنى باسقارىپ, بەس باعىتتا تەمىرجول تاسىمالىن جۇزەگە اسىراتىن ستانسا جۇمىسىن ۇيلەستىرىپ وتىر.
– بۇل جەرگە نەگىزىنەن, جۇك پويىزدارى توقتايدى, سونىمەن قاتار 1 جولاۋشىلار, 2 ەلەكتر پويىزى ايالدايدى. تەك استانا قالاسىنا عانا ەمەس, جالپى اقمولا وبلىسىنا پويىزبەن جەتكىزىلەتىن جۇكتەردىڭ بارلىق تۇرلەرى وسى ستانسادان تۇسىرىلەدى جانە كەتەتىن جۇكتەر تيەلەدى. مۇنداي اۋقىمدى جۇك تيەۋ, ءتۇسىرۋ جۇمىستارى ەسكى استانا-1 ستانساسىندا دا جۇرگىزىلمەيدى. سوندىقتان استانانىڭ, جالپى اقمولا ءوڭىرىنىڭ ەكونوميكاسى ءۇشىن قىرقىنشى ستانساسىنىڭ ماڭىزى زور, – دەپ باستادى ءسوزىن ول.
كەزىندە اقمولانىڭ ىرگەسىندەگى جالعىز بەلدى اۋىل بولعان تەمىرجولشىلار كەنتىنىڭ اتاۋى وسى ستانسامەن بايلانىستى پايدا بولعان. سەبەبى مۇندا, نەگىزىنەن, ستانسادا قىزمەت ەتەتىن تەمىرجولشىلار ءومىر سۇرگەن. ال بۇگىندە قالا كەڭەيىپ كەنتكە دەيىن جەتكەندىكتەن, ەلوردانىڭ شەت ايماقتارىنىڭ ءبىرى رەتىندە دامىتىلۋدا. دەگەنمەن ءالى دە بۇرىنعى اتاۋىنا ساي سيپاتى مەن ماڭىزى وزگەرگەن جوق. ويتكەنى اقمولا استانا بولىپ اۋىسقاننان كەيىن مۇنداعى جۇك اينالىمى ودان سايىن ارتا ءتۇستى. اقمولا جۇك تاسىمالى بولىمشەسى بويىنشا جۇك اينالىمىنىڭ ەڭ كوپ بولىگى وسىندا جۇزەگە اسىرىلادى.
– جولاۋشىلار پويىزدارى كوپ توقتامايتىندىقتان, مۇندا ۆوكزال سالىنباعان. دەگەنمەن ءۇش پويىزعا مىنەتىن جولاۋشىلار ءۇشىن اكىمشىلىك عيماراتى جانىنا قىستا جىلىتىلاتىن كونتەينەر قويدىق. بىزدە ءبىرىنشى كەزەكتە بارلىق الەۋمەتتىك ماڭىزدى جۇكتەردى ءتۇسىرۋ جۇمىستارى جۇرگىزىلەدى. بۇل جۇكتەر – ەلورداداعى جول سالۋ, تۇرعىن ۇيلەر قۇرىلىسى ءۇشىن اسا قاجەت تسەمەنت, كىرپىش, پليتا سياقتى قۇرىلىس ماتەريالدارى جانە كۇزدە جەتكىزىلەتىن كومىر. ماۋسىمدىق جۇمىستار كەزىندە قالا جانە الماتى اۋدانى اكىمدىكتەرىمەن تىعىز جۇمىس جۇرگىزەمىز. ودان باسقا دا نارىقتا قانداي جۇك ءتۇرى بار, سونىڭ ءبارى وسىندا كەلىپ, جان-جاققا تارالادى. وسى جۇكتەردى قابىلداپ الاتىن 90 كىرمە جول بار, سول جولداردا تاۋلىگىنە 300 ۆاگون جۇك تۇسىرىلەدى. جۇكتەردى جونەلتۋ جانە قابىلداپ الۋ قىزمەتىنە تاپسىرىس بەرەتىن 240 كليەنتتىڭ كوڭىلىن تاۋىپ, ولارمەن بىرلەسە جۇمىس ىستەيمىز. ستانتسيادا 15 جول بولسا, سونىڭ بەسەۋى – جولاۋشىلار پويىزدارىن وتكىزۋگە, تورتەۋى – ۆاگونداردى كىرمە جولعا بەرۋگە دايىنداۋعا, قالعاندارى جۇك پويىزدارىن جونەلتۋگە ارنالعان, – دەيدى ا.چەرناي.
ستانسا اۋماعىندا ءىرى وندىرىستىك ايماقتىڭ بولۋى, بىرنەشە الىپ زاۋىتتاردىڭ ورنالاسۋى دا تەمىرجول تاسىمالىنىڭ جۇگىن ەسەلەي تۇسەدى. بيىل جىل باسىنان بەرى ستانسادا 46 مىڭ ۆاگون جۇك تۇسىرىلگەن. ءبىر ۆاگون ورتاشا ەسەپپەن 50 تونناداي جۇكتەن تۇرسا, بارلىعى – 3 ميلليوننان استام توننا جۇك ءتۇسىرىلدى دەگەن ءسوز. تەمىرجولشىلاردىڭ ايتۋىنشا, ستانسا ەكى قايتا قۇرۋ كەزەڭىنەن وتكەن. ءبىرىنشىسى 1985 جىلدارى تسەلينوگراد قالاسىن دامىتۋ ءۇشىن قۇرىلىس نىساندارىن سالۋمەن بايلانىستى جۇك اينالىمىنىڭ وسۋىنە بايلانىستى بولعان. سول كەزدە شاعىن بەكەت توراپتىق جانە جۇك ستانتسياسى دەگەن مارتەبە العان. ەكىنشى قايتا قۇرۋ «نۇرلى جول» ۆوكزال كەشەنىنىڭ اشىلۋىمەن بايلانىستى بولدى.
مەكەمەدە 124 تەمىرجولشى ەڭبەك ەتسە, سونىڭ 30 پايىزى اتالعان كەنتتە ءومىر سۇرەدى. سونىڭ ىشىندە 5 ستانسا كەزەكشىسى, 9 پويىز قۇراستىرۋشى, 5 كەزەكشى كومەكشىسى, 14 تاۋار كاسسيرى, مانەۆرلىك ديسپەتچەرلەر, جۇك قابىلداپ, جونەلتۋشىلەر, كەڭسە قىزمەتكەرلەرى بار. ولاردىڭ اراسىندا 143 جىلدىق ەڭبەك ءوتىلى بار اۋلەتتەردىڭ وكىلدەرى جۇمىس ىستەيدى.
