ەلوردا ءۇشىن ءساتسىز تۋر بولدى

فۋتبولدان قازاقستان چەمپيوناتىنىڭ پرەمەر-ليگاسىندا ءۇشىنشى تۋردىڭ ويىن­دارى ءوتتى.

ەلىمىزدىڭ 6 دۇركىن چەمپيونى «استانا» كومانداسى جوعارى توپقا بيىل قايتا قوسىلعان «ەلىم-اي» كلۋبىنان ۇتىلدى. سەمەيدە وتكەن ويىننىڭ ءبىرىنشى تايمىندا ەسەپ اشىلمادى. بىراق ماتچتىڭ اياقتالۋىنا 3 مينۋت قالعاندا «ەلىم-اي» شابۋىلشىسى رومان مۇرتازاەۆ استانالىق كوماندانىڭ قاقپاسىنان ساڭىلاۋ تاۋىپ كەتتى. ال ماتچ باستالعالى ويىننىڭ تىزگىنىن ۇستاعان «استانا» فۋتبولشىلارى قالعان ۋاقىتتا قانشا ارەكەت ەتكەنىمەن, قارىمتا دوپ سوعا المادى.

سونداي-اق ەلوردانىڭ تاعى ءبىر ۇجىمى, ۇزاق جىلدار پرەمەر-ليگادا ويناماعان «جەڭىس» كومانداسى دا جەڭىلىستىڭ اششى ءدامىن تاتتى. «جەڭىس» بۇل جولى ەلىمىزدىڭ 5 دۇركىن چەمپيونى «اقتوبە» كلۋبىنان ويسىراي ۇتىلدى. اقتوبەدە وتكەن ويىندا 3:0 ەسەبى تىركەلدى.

تۋردىڭ باسقا ويىندارىندا مىناداي ناتيجەلەر تىركەلدى: «شاحتەر» (قاراعاندى) – «تۇران» (تۇركىستان) 0:2, «اتىراۋ» – «جەتىسۋ» (تالدىقورعان) 0:1, «قىزىلجار» (پەتروپاۆل) – «توبىل» (قوستاناي) 0:0, «ورداباسى» (شىمكەنت) – «قايرات» (الماتى) 1:2.

ازىرگە تۋرنير كەستەسىن 7 ۇپاي يەلەنگەن
«توبىل» باستاپ تۇر. «استانا» – ءتورتىنشى, «جەڭىس» ونىنشى ورىندا كەلەدى.

پرەمەر-ليگانىڭ كەلەسى تۋرى 6-7 ءساۋىر كۇندەرى وتەدى. «قىزىلجار» – «جەڭىس», «ەلىم-اي» – «قايسار», «قايرات» – «جەتىسۋ», «اقتوبە» – «اتىراۋ», «شاحتەر» – «استانا», «تۇران» – «ورداباسى» كوماندالارى ءوزارا كەزدەسەدى.