باس شاھاردا ەلباسىنىڭ «بولاشاققا باعدار: رۋحاني جاڭعىرۋ» باعدارلاماسى اياسىندا «بەرەكە بىرلىگىڭدە, ەلىم» اتتى رەسپۋبليكالىق اقىندار ايتىسى ءوتتى. ايتۋلى شارانى وتكىزۋگە Nur Otan پارتياسى مەن نۇر-سۇلتان قالاسى اكىمدىگى مۇرىندىق بولدى.
ءدۇبىرلى دوداعا تالاي بايگەدە توپ جارىپ, جۇرتشىلىقتىڭ ريزاشىلىعىنا بولەنىپ جۇرگەن سەرىكزات دۇيسەنعازين, جانسايا مۋسينا, ەركەبۇلان قاينازار, اسپانبەك شۇعاتاەۆ باستاعان ون التى اقىن قاتىستى. باس قالادا كوپتەن بەرى مۇنداي ايتىس وتپەگەن ەدى. سودان با, اسىل مۇرامىزعا سۋساپ قالعان حالىقتىڭ قاراسى مول بولدى.
ايتىس تىزگىنىن ۇستاعان كورنەكتى اقىن ءجۇرسىن ەرمان ءسوز سايىسىن تاماشالاۋعا كەلگەن اعايىنعا العىسىن ايتىپ, بايگەگە شاپقالى وتىرعان جۇيرىكتەرگە ساتتىلىك تىلەدى.
سەگىز جۇپقا بولىنگەن اقىندار ايتىسقا مىعىم دايىندىقپەن كەلىپ, ەلدىڭ بىرلىگى مەن بەرەكەسىن, ىرىسى مەن ىنتىماعىن جىر ارقاۋىنا اينالدىردى. ساحناعا العاش شىققان قاجىمۇقان مەن قانات ءسوز قاعىسىندا قاعىتپا قالجىڭعا دا ەرىك بەرىپ, اراسىندا كوپتىڭ كوكەيىندەگى الەۋمەتتىك پروبلەمالاردى ايشىقتى جىرلارىمەن ورە ءبىلدى. ايتىستىڭ ورەن ارعىماقتارىنا اينالعان ەركەبۇلان مەن اسپانبەكتىڭ سايىسىندا ەلدىك ماسەلە ءسوز بولدى. قاليجان مەن جانسايانىڭ ايتىسى əدەمى əزىلمەن ادىپتەلدى. ال سەرىكزات دۇيسەنعازى مەن بەكزات اسقاروۆتىڭ ايتىسى اعالىق قامقورلىق پەن ىنىلىك ىزەتتىلىكتىڭ ۇلگىسىنا اينالدى. ايتىستىڭ اسپانىندا الداسپانداي جارقىلداعان, مارقۇم ەرىك اعامىزدىڭ بالاسى بەكزات وسى كەشتىڭ جاڭالىعى بولدى دەسە بولادى.
ەلوردا تورىندەگى بايراعى جەلبىرگەن جىر دوداسىن ەلمەن بىرگە تاماشالاعان قالا باسشىسى التاي كولگىنوۆ پەن Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك ايتۋلى شارا دا حالىققا اقجارما تىلەكتەرىن ءبىلدىردى.
– حالقىمىزدىڭ ۇلتتىق ونەرگە دەگەن ىقىلاسى بولەك. اسىرەسە, سونىڭ ىشىندە ايتىس ونەرىن ەرەكشە بيىك كورەدى. قاي زاماندا دا ەلدىڭ ەڭسەسىن كوتەرىپ, ءسوزىن سويلەگەن اقىندار بولعان. بۇگىنگى ەلىمىزدىڭ جەتىستىگىنە بىرلىك پەن ەڭبەكتىڭ ارقاسىندا قول جەتكىزدىك. قازىر ۇلتتىق قۇندىلىقتارىمىزعا مەملەكەت تاراپىنان ەرەكشە كوڭىل ءبولىنىپ وتىر. پرەزيدەنتىمىز قاسىم-جومارت كەمەلۇلى جاقىندا ەلوردانى دامىتۋ جونىندەگى وتكەن جيىندا الۋەمەت پەن مادەنيەت سالاسىنا ايرىقشا نازار اۋدارىپ, كۇندەلىكتى قولداۋ كورسەتۋدى مىندەتتەدى. سول تاپسىرمالاردى جۇزەگە اسىرۋدىڭ ءبىر كورىنىسى وسى ايتىس دەۋگە بولادى. جىر دوداسىنىڭ تاقىرىبى دا بىرلىكتى ۇندەيدى. ءبىز ءۇشىن بىرلىكتەن ارتىق بايلىق جوق. سوندىقتان تاتۋلىقتى جىرلايتىن اقىنداردىڭ تاڭدايى تالماسىن, جاقتارى جاڭىلماسىن» دەدى التاي كولگىنوۆ.
ءوز كەزەگىندە Nur Otan پارتياسى توراعاسىنىڭ ءبىرىنشى ورىنباسارى باۋىرجان بايبەك: «ءبىزدىڭ ماقسات – ەلدىڭ رۋحىن كوتەرۋ. ارينە, سىن ايتىلۋ كەرەك. بىراق بارشامىزعا ورتاق مىندەت-مەملەكەتتىگىمىزدى ۇستاپ قالۋ. سوندىقتان ءبىر-ءبىرىمىزدى قولدايىق, بىرلىگىمىزدى قورعايىق. ايتىس ونەرى جاساي بەرسىن» دەدى.
سونىمەن باس قالادا دۇبىرلەپ وتكەن ايتىستىڭ باس جۇلدەسى, تالاي بايگە دە توپ جارعان ەلوردالىق اقىن ەركەبۇلان قاينازاروۆقا بۇيىردى. ءبىرىنشى ورىندى باتىس قازاقستاننان كەلگەن اقىن تالعات مىقي جەڭىپ الدى. ەكىنشى ورىندى بەكزات اسقاروۆ پەن جانسايا مۋسينا يەلەندى. ءۇشىنشى ورىندى اسپانبەك شۇعاتاەۆ پەن قاليجان بىلداشەۆ ءبولىستى. جۇلدەگەر اقىنداردىڭ ءبارى باعالى سىيلىقتارمەن ماراپاتتالدى.
