ەلوردا ەمحانالارىندا جۇكتى ايەلدەر ءۇشىن «جاسىل دالىزدەر» ۇيىمداستىرىلىپ جاتىر. بۇل تۋرالى استانا قالالىق دەنساۋلىق ساقتاۋ باسقارماسىنىڭ باس شتاتتان تىس اكۋشەر-گينەكولوگى حاليدا شاريپوۆا مالىمدەدى.
ونىڭ ايتۋىنشا, بۇل شارا جۇكتىلىكتىڭ ەرتە كەزەڭىندە ايەلدەردى ۋاقىتىندا ءارى ساپالى تەكسەرىستەن وتكىزۋ ءۇشىن ەنگىزىلگەن. سوندىقتان دا ول ساپالى ءارى ۋاقتىلى مەديتسينالىق كومەك كورسەتۋ ءۇشىن «جاسىل دالىزدەر» ۇيىمداستىرۋ اسا ماڭىزدى ەكەنىن اتتاپ ءوتتى.
– جۇكتى ايەلدەر ءۇشىن ارنايى تىركەۋ بار. ولار مىندەتتى تۇردە اكۋشەر-گينەكولوگ دارىگەرگە, تەراپەۆتكە جانە وزگە دە ماماندارعا جىبەرىلەدى. ياعني, اۋىرىپ جۇرگەن باسقا ەمدەلۋشىلەرمەن بىرگە ورتاق كەزەكتە تۇرمايدى. ويتكەنى پروفيلاكتيكالىق تەكسەرىس جۇكتى ايەلدەردە ەكستراگەنيتالدى پاتولوگيانى دەر كەزىندە انىقتاۋعا مۇمكىندىك بەرەدى. ايەلدەر ساۋ بالانى دۇنيەگە اكەلۋ ءۇشىن, اياعى اۋىر كەزدە كەرى اسەر بولماۋ ءۇشىن ۋاقىتىندا اۋماقتىق ەمحانالارعا بارىپ تۇرۋ كەرەك, الدىن الا دايىندىق جۇرگىزۋ قاجەت. وكىنىشكە قاراي, كەيبىر ايەلدەر دارىگەرگە جۇكتى بولعان كەزدە عانا كەلەدى, – دەيدى دارىگەر.
قالالىق دەنساۋلىق ساقتاۋ باسقارماسىنىڭ مالىمەتىنشە, 2017 جىل باسىنان بەرى استانادا 6 مىڭنان استام بالا دۇنيەگە كەلگەن. ورتا ەسەپپەن ەلوردادا تاۋلىگىنە بۇگىنگى ۋاقىتتا جۇمىس ىستەپ تۇرعان ءۇش پەريناتالدى ورتالىقتا 60-65 بالا ومىرگە كەلەدى. سالىستىرار بولساق, وتكەن جىلى استانادا 27 244 بالا تۋىلعان. بۇل 2015 جىلمەن سالىستىرعاندا 8%-عا كوپ جانە رەكوردتى كورسەتكىش بولىپ سانالادى.
سەرىك جولداسباي
