جۋىردا ەلوردا باسشىسى التاي كولگىنوۆ قالانىڭ شەتكى ايماقتارىن ارالاپ, تۇرعىندارمەن كەزدەستى. حالىق اكىمگە بىرقاتار وزەكتى ماسەلەلەردى شەشۋ قاجەتتىگىن ايتتى. العاشقى ات باسىن تىرەگەن جەر – «قىرقىنشى» ستانساسىنداعى جابىق اسكەري قالاشىق. ونىڭ اۋماعىندا 470 پاتەرلىك 6 ءۇي, 36 بولمەسى بار جاتاقحانا ورنالاسقان. جالپى العاندا, بۇل جەردە 432 وتباسى تۇرادى. قالاشىق تۇرعىندارى ءدارىحانا, مەديتسينالىق بەكەت, بالاباقشا جانە مەكتەپتەردىڭ جوقتىعىن ايتىپ, شاعىمداندى.
«بالالاردى «قىرقىنشى» ستانساسىنداعى مەكتەپكە اپارامىز. بۇل جەردە ايالداما دا جوق, كوپتەگەن باعىتتىق اۆتوبۋستار تاس جولدىڭ ناشارلىعىنان قالاشىققا كىرمەيدى. ال ورتالىقتا جالعىز №15 باعىتتاعى اۆتوبۋس جۇرەدى, بىراق ونى وتە ۇزاق كۇتۋگە تۋرا كەلەدى» دەگەن مۇڭ-زارىن جەتكىزدى تۇرعىندار.
التاي كولگىنوۆ احۋالدى زەردەلەپ, ماسەلەلەردى رەت-رەتىمەن شەشۋ جولدارىن قاراستىرۋعا, حالىقتىڭ ءومىر ءسۇرۋ ساپاسىن جاقسارتۋ ءۇشىن بارلىق ءىس-ارەكەتتەر جاسالاتىنىنا ۋادە ەتتى. «ءبىز اسكەري قىزمەتكەرلەردىڭ ەڭبەگىن باعالايمىز. ويتكەنى ولار ءبىزدى, وتاندى قورعايدى. بارلىق تۇرعىنداردىڭ ساپالى ءومىر سۇرۋگە قاقىسى بار. سوندىقتان اكىمدىك الداعى ۋاقىتتا قالاشىق تۇرعىندارىنىڭ ءومىر ءسۇرۋ ساپاسىن جاقسارتۋدى زەرتتەپ, ءبىر قورىتىندى شىعارادى» دەدى قالا باسشىسى.
سونداي-اق التاي سەيدىرۇلى «ينتەرناتسيونالنىي» كەنتىنىڭ تۇرعىندارىمەن دە جۇزدەستى. ولار جەرگىلىكتى جەردەگى ەمحانانىڭ سانيتارلىق تالاپتارعا ساي كەلمەيتىنىن جەتكىزدى. بۇل جەردە 351 ءۇي بار, 7 مىڭنان اسا حالىق تۇرادى. كەنت تۇرعىندارى ورتالىق جىلۋ, سۋ بۇرۋ جانە نوسەر سۋلارى اعاتىن كاناليزاتسيانىڭ جوقتىعىن تىلگە تيەك ەتتى. 26 كوشەنىڭ 12-سىنە عانا اسفالت توسەلىپتى. «ءبىزدىڭ ەمحانامىز سانيتارلىق جانە تەحنيكالىق نورمالارعا ساي كەلمەيدى. مەكتەپكە بالالار سىيمايدى, سوندىقتان جاڭاسىن سالۋ كەرەك. اۆتوبۋستار بۇرىلاتىن الاڭقايدى قايتا جوندەپ, كوبىرەك ايالدامالار سالىنسا دەيمىز. ەلورداعا جاقىن بولساق تا, ورەكەنيەتتەن الىسپىز» دەگەن وتىنىشتەرىن جەتكىزدى تۇرعىندار. قالا باسشىلىعى شەتكى ايماق تۇرعىندارىنىڭ بارلىق ماسەلەلەرىن ەگجەي-تەگجەيلى زەرتتەپ, قاراستىرماقشى. ايتپاقشى, ۇكىمەت باسشىسى اسقار مامين نۇر-سۇلتان قالاسىنىڭ شەتكى ايماقتارىن دامىتۋعا ارنالعان 9 جوبانى ىسكە اسىرۋعا ۇكىمەت 22,5 ملرد تەڭگە بولىنەتىنىن ءمالىم ەتتى.
