سارىارقانىڭ كوك تاسى ءجىبىپ, كۇن مەن ءتۇن تەڭەلەتىن قاسيەتتى كۇنى ناۋرىز مەيرامىن استاناداعى №16 مەكتەپ وقۋشىلارى دا ەرەكشە قۋانىشپەن قارسى الدى. وسىعان وراي, ءبىلىم ورداسىندا سالتاناتتى شارا ۇيىمداستىرىلدى.
مەرەكەگە قاتىسقان 1 «ا» سىنىبىنىڭ وقۋشىلارى ايرىقشا بەلسەندىلىك تانىتتى. ءمادينا قاليەۆانىڭ جەتەكشىلىگىمەن وسى سىنىپ الدىمەن مەرەكەگە ساي ۇلتتىق ناقىشتا بەزەندىرىلىپ, جەرگە قازاقتىڭ ويۋلى كورپەشەلەرى توسەلدى. جىلداعى داستۇرگە ساي مۇندا اق داستارقان جايىلىپ, ورتاداعى دوڭگەلەك ۇستەلدىڭ ءۇستى ۇلتتىق تاعامدارعا تولدى.
سىنىپ وقۋشىلارى شەتىنەن ءساندى كيىنىپ, ساحنانىڭ كوركىن قىزدىرا ءتۇستى. ۇلتتىق كورىنىستەر ارقىلى قازاق ءداستۇرىنىڭ سان-سالاسى اشىلدى.
اق تۇيەنىڭ قارنى جارىلعان كۇندى قارسى الۋ ءۇشىن ورتاعا قىدىر اتا بەينەسىن سومداعان وقۋشى ابدوللا سەرىك شىعىپ, بارشا جينالعان جۇرتشىلىقتى, اتا-انالار مەن مەكتەپ ۇجىمىن, وقۋشىلاردى ۇلىستىڭ ۇلى كۇنىمەن قۇتتىقتادى. ودان ءارى كاميلا, قامبار, ءمادينا, ارۋجان ەسىمدى وقۋشىلار ۇلتتىق سالت-داستۇردەن جاس سابيگە ات قويۋ ءراسىمىن كورسەتتى.
– ءبىزدىڭ مەكتەپتە وسىنداي شارالار ءجيى وتكىزىلەدى. مۇنداعى ماقساتىمىز – بۇلدىرشىندەردى قازاق سالت-داستۇرىنە ۇيرەتۋ, حالقىمىزدىڭ ەجەلگى تۇرمىسى جايىندا ايتۋ. بۇلدىرشىندەر بەلسەندى اتسالىسۋدا, – دەيدى كوڭىلدەنىپ مەكتەپ ديرەكتورى بالجان ايتمۇحامەتوۆا.
بالالار بولسا, حالىق اندەرىن شىرقاپ, «قارا جورعا» بيلەپ, ءوز ونەرلەرىن ورتاعا سالدى. شارا سوڭىندا قوناقتار مەن وقۋشىلار ۇلتتىق تاعامداردان جايىلعان داستارحان باسىنا جايعاسىپ, ناۋرىز مەرەكەسىنە وراي جەتى ءتۇرلى ءدام سالىپ دايىندالعان ناۋرىز كوجەدەن ءدام تاتتى.
گۇلبارشىن وكەشقىزى
astana-akshamy.kz
