ەڭبەك ادامى تۋرالى ەرىنبەي جازۋعا بولادى. ارامىزدا ءوزى جۇرەگىمەن قالاعان مارتەبەلى ماماندىقتىڭ بىلگىرى اتانىپ, ابىرويى اسقان ازاماتتار از ەمەس. سولاردىڭ ءبىرى – قالاداعى قۇرىلىستىڭ دامۋىنا ايتارلىقتاي ۇلەس قوسىپ, ەرەن ەڭبەكتىڭ يەسى اتانعان «سترويكونسترۋكتسيا» اق-نىڭ باسشىسى, استانانىڭ قۇرمەتتى ازاماتى ۆيكتور بۋللەر.
ول باسقارعان كومپانيانىڭ تاريحى وتكەن عاسىردىڭ ورتا كەزىنەن باستالادى. 1959 جىلى «گلاۆتسەلينپرومستروي» تەمىربەتون بۇيىمدار مەن كونسترۋكتسيالار كومبيناتى رەتىندە اشىلدى. ۆيكتور بۋللەر العاش ەڭبەك جولىن وسى كومبيناتتا ارماتۋرالىق تسەحتىڭ اعا شەبەرى بولىپ باستايدى. قانداي جۇمىس ىستەسە دە, تياناقتى ورىندايتىن بەساسپاپ ماماننىڭ قابىلەتىن اعا بۋىن وكىلدەرى جوعارى باعالايدى. ونىڭ كەز كەلگەن ءىستى ۇرشىقتاي ءيىرىپ الىپ كەتەتىندىگىنە ريزا بولادى.
كەڭەس داۋىرىندە تالاي قۇرىلىستىڭ كوركىن اشقان كومبينات ەلىمىز تاۋەلسىزدىك العاننان كەيىن, ياعني 1992 جىلى «سترويكونسترۋكتسيا» اكتسيونەرلىك كومپانياسى بولىپ قايتا قۇرىلدى. توقسانىنشى جىلدارداعى قيىنشىلىق ءبارىمىزدىڭ ەسىمىزدە. ءتىپتى, اتاعى كوپكە تانىلعان زاۋىتتاردىڭ ءوزى تۇرالاپ جاتتى. سونداي كەزەڭدە ءبىز ءسوز ەتىپ وتىرعان كاسىپورىننىڭ شاڭىراعى شايقالمادى. بىلگىر باسشى مەن ۇتىمدى ۇيىمداستىرۋشىلىق قابىلەتتىڭ ارقاسىندا نارىقتىق قاتىناستىڭ كىلتىن تابا ءبىلدى. كادرلىق قۇرامدى ساقتاپ, تاجىريبەلى جۇمىسشىلاردى جوعالتپادى. «سول كەزدەگى باسقا كومپانيالار سەكىلدى ءبىزدىڭ زاۋىت تا قيىن كەزەڭدى باستان وتكەردى. بىراق سولاي ەكەن دەپ, قول قۋسىرىپ وتىرۋعا ارىم جىبەرمەدى. ويتكەنى مەكەمەنىڭ ارتىندا قانشاما ادامنىڭ تاعدىرى تۇردى. سوندىقتان جۇمىس ىستەۋگە, ىزدەنۋگە تۋرا كەلدى» دەپ وتكەن كۇندەردى ەسكە الادى ۆيكتور بۋللەر.
ءبىزدىڭ كەيىپكەرىمىز كەرەكۋ ءوڭىرىنىڭ شارباقتى اۋدانىندا دۇنيەگە كەلگەن. بالالىق شاعى سوعىستان كەيىنگى جىلدارعا تاپ كەلەدى. ەلدىڭ ءىشى قيىندىقتان ءالى ەڭسە كوتەرە قويماعان كەز. «بالا كۇنىمنەن اۋىل ادامدارىنىڭ تىنىم تاپپاي جۇمىس ىستەگەنىن كورىپ ءوستىم. تاڭنىڭ اتىسى مەن كۇننىڭ باتىسىندا ەگىس باسى مەن قىرمان اراسىندا شاپقىلاپ جۇرەدى. سوندا دا ولاردىڭ قاباقتارىندا كىربىڭ بولمايدى. ءبارى دە كوڭىلدى, جادىراپ, ەرتەڭگى كۇنگە دەگەن سەنىممەن ءومىر سۇرەدى. مەن سونداي قايراتى مول, قاجىرلى ادامداردان ۇلگى الدىم. ءوزىم دە ەڭبەككە جاستاي ارالاستىم. سول ءۇشىن تاعدىرىما ريزامىن» دەيدى ول بالالىق شاعىنان ۇزىك سىر تارتىپ.
بۇگىندە ەلوردانىڭ كوركەم كەلبەتى جايىندا كوپ جازىلادى. ەڭسەسى بيىك عيماراتتارعا تامسانىپ قارايمىز. بىراق ولاردىڭ سالىنۋ جولدارى ايتىلا بەرمەيدى. قازاقستاننىڭ قۇرمەتتى قۇرىلىسشىسى ۆيكتور بۋللەر جەتەكشىلىك ەتەتىن «سترويكونسترۋكتسيا» كومپانياسى باس قالاداعى «بايتەرەك» مونۋمەنتى, بەيبىتشىلىك جانە كەلىسىم سارايى, تاۋەلسىزدىك سارايى, «نۇر استانا», «ازىرەت سۇلتان» مەشىتى, «دۋمان» ويىن-ساۋىق ورتالىعى, «سينەما سيتي», «مەگا», «حان شاتىر», ەلوردالىق تسيرك, «الاتاۋ», «قازاقستان» سپورت كەشەندەرى, پرەزيدەنتتىڭ مادەنيەت ورتالىعى, ۇلتتىق كىتاپحانا, وقۋشىلار سارايى جانە وپەرا تەاترى سەكىلدى ءىرى قۇرىلىس جوبالارىنا بەلسەنە اتسالىستى.
اتالعان كاسىپورىنمەن تىعىز بايلانىستا جۇمىس ىستەيتىن قۇرىلىس كومپانيالارى ءارىپتەستەرى تۋرالى دا جىلى سوزدەرىن ايامايدى.
«وسى زاۋىتپەن جۇمىس ىستەگەنىمىزگە 10 جىلدان استى. ول – استاناداعى شىعاراتىن ءونىمى بويىنشا ەڭ سەنىمدى كومپانيا. ماماندارعا بەتوندى «سترويكونسترۋكتسيا» اق-نان الدىق دەسەك, تەحنيكالىق باقىلاۋدا باسقا سۇراق تۋىندامايدى. «بۋللەرلىك ونىمدەر» نەمەسە «سترويكونسترۋكتسيانى» ءبارى ماقتايدى» دەيدى «بيكوم ينجينيرينگ» جشس-ءنىڭ باسشىسى جانات باتپەنوۆ.
قازىرگى تاڭدا كومپانيا ەۋروپانىڭ ەڭ وزىق جەلىلەرىمەن جاراقتالعان. ونىڭ شىعاراتىن ونىمدەرى ەلىمىزدىڭ بارلىق ايماقتارىنا تانىلعان. بۇگىندە زاۋىتتا 660 ادام ەڭبەك ەتەدى, ونىڭ 159-ى – ايەل, ولار كوبىنەسە كران جانە دانەكەرلەۋ ماشينالارىندا جۇمىس ىستەيدى.
مىنە, وسىنداي ەلدىڭ يگىلىگى ءۇشىن جان سالىپ جۇمىس ىستەگەن اسىل ازامات ۆيكتور بۋللەردىڭ ەڭبەگى كىم-كىمگە دە ۇلگى دەپ ايتۋعا بولادى.
ازامات ەسەنجول
