حالىققا قول جەتىمدى امبۋلاتوريالىق-ەمحانالىق كومەك كورسەتۋ ماقساتىندا 10 قازاندا قالامىزداعى «دەمەۋ» وتباسى وقۋ-تاجىريبەلىك مەديتسينالىق كومەك كورسەتۋ ورتالىعىنىڭ فيليالى اشىلادى. وسىعان وراي, دەنساۋلىق ساقتاۋ باسقارماسى №8 قالالىق ەمحانادا تىركەلگەن 20 مىڭ حالىقتى سول ورتالىقتىڭ فيليالىنا بەرۋدى جوسپارلاپ وتىر.
تاۋەلسىزدىك كوشەسى №11/1 مەكەنجايىندا ورنالاساتىن بۇل ورتالىققا جاستار شاعىن اۋدانىنداعى, «اقبۇلاق» كەنتى مەن «ەنەرگەتيك» كەنتىندەگى ۇيلەر, ياعني, №2 جالپى تاجىريبەدەگى دارىگەر ءبولىمىنىڭ 89-دان 96-عا دەيىنگى جانە №30 جانە №5 ۋچاسكەلەرى قارايتىن بولدى. اتالمىش شاعىن اۋداندار «دەمەۋ» وتباسى وقۋ-تاجىريبەلىك مەديتسينالىق كومەك كورسەتۋ ورتالىعىنىڭ فيليالىنا جاقىن ورنالاسقان ءارى وعان جەتۋ ءۇشىن شاعىن اۋدان تۇرعىندارى اۆتوبۋستان اۆتوبۋسقا اۋىسىپ سارىلمايدى.
وزدەرىڭىزگە بەلگىلى, استاناداعى №8 قالالىق ەمحانا قالانىڭ تۇرعىندارى كوپ شوعىرلانعان كونە بولىگىندە ورنالاسقان. مەكەمەدە جوسپارلانعان 50-60 مىڭ تۇرعىننىڭ ورنىنا, تىركەۋدە تۇرعان 87 203 تۇرعىنعا قىزمەت كورسەتۋگە ءماجبۇر. تولاستامايتىن ۇزاق-سونار كەزەكتىڭ تۋىنداۋى, سايىپ كەلگەندە, مەديتسينالىق قىزمەت كورسەتۋدىڭ ساپاسى مەن كولەمىنە اسەر ەتەدى.
قازىرگى ۋاقىتتا ەمحانا قىزمەت كورسەتەتىن اۋماقتىڭ 40 پايىزى جەكە سەكتورعا جاتادى, ياعني جەر ۇيلەر مەن تسەلينوگراد كەزىنەن كەلە جاتقان ەسكى «حرۋشەۆكالار». ولاردى سىرعاننان كەيىن ورنىنا تۇرعىزىلعان جاڭا كوپ قاباتتى عيماراتتار ەسەبىنەن ەمحاناعا قارايتىن تۇرعىندار سانى دا كوبەيە تۇسۋدە. سوندىقتان, ماماندار بۇل وزگەرىستەر مەديتسينالىق قىزمەت كورسەتۋدىڭ ساپاسىن كوتەرىپ ەمدەلۋشىلەردى قابىلداۋدى جەڭىلدەتۋ ءۇشىن جاسالعانىن تۇسىنىستىكپەن قابىلداۋدى وتىنەدى.
گۇلبارشىن وكەشقىزى
