نەمەسە ءدامى سۋ ساپاسىنىڭ ەڭ باستى كورسەتكىشى ەمەس
ەلىمىزدە بوتەلكەدەگى اۋىزسۋدى تۇتىنۋ وسىدان ون شاقتى جىل بۇرىن پايدا بولا باستادى. ءسال كەيىنىرەك ءۇي جاعدايىندا سۋ ءسۇزۋ قۇرىلعىلارىنىڭ نەشە ءتۇرى قاپتاپ كەتتى. ال, قازىر ەكى دۇكەننىڭ بىرىندە قۇبىرعا جالعاپ قويىپ, اۆتوماتتان سۋ ساتۋ بيزنەسى «گۇلدەپ» جاتقانى جاسىرىن ەمەس. بۇل ورايدا, سوڭعى جىلدارى استانالىقتاردىڭ اقىسى ارزان ەمەستىگىنە قاراماستان, بوتەلكەدەگى سۋدى بولەك كورىپ, اققۇلا كوشىپ العاندارىنا تاڭعالماسقا بولمايدى.
قالا حالقىنىڭ ورتالىقتاندىرىلعان قۇبىرداعى سۋدى ىشكىسى كەلمەي, بوتەلكەدەگى سۋدان بالاما تابۋىن مامان رەتىندە قاتە قالىپتاسقان پىكىر دەپ سەنىممەن ايتا الامىن. ءارى مۇنداي تەرىس تۇسىنىكتىڭ بەلەڭ الۋىنىڭ الەۋمەتتىك ءھام قالا كونتينگەنتىنە بايلانىستى تىكەلەي سەبەبى بار.
ويتكەنى, استانا حالقىنىڭ باسىم بولىگىن ەلىمىزدىڭ باسقا ايماقتارى مەن تمد ەلدەرىنەن كوشىپ كەلگەندەر قۇرايدى. البەتتە, ولارعا وزىنە ءتان وزگەشە دامىمەن ەرەكشەلەنەتىن حيميالىق قۇرامى مۇلدە باسقا سۋعا ۇيرەنۋ وڭايعا سوقپايدى.
الايدا, بۇل استانا سۋى لاس, ەشقانداي سانيتاريالىق-گيگيەنالىق تالاپتارعا جاۋاپ بەرمەيدى دەگەندى بىلدىرمەيدى. كەرىسىنشە, ۆياچەسلاۆ سۋ قويماسىنان كەلىپ, بىرنەشە مارتە تازالاۋدان ءوتىپ, قۇبىرلاردى قۋالاي ءار ۇيگە جەتەتىن استانانىڭ اۋىزسۋى 2011 جىلى 1 جەلتوقساندا ۇكىمەتتىڭ №1432 قاۋلىسىمەن بەكىتىلگەن سانيتاريالىق ەرەجەگە تولىقتاي ساي.
دەي تۇرعانمەن دە, كەيبىرەۋلەر, بالكي, تۇرعىنداردىڭ باسىم بولىگى استانا سۋىنىڭ تاڭدايدا ءسال كەرمەك ءدام قالدىراتىنىنان سەسكەنىپ, اسىرەساقتىقپەن, قالتاعا اجەپتاۋىر سالماق تۇسىرەتىنىنە قاراماستان اۋىزسۋدى الدىرتىپ ىشۋگە ۇيرەنگەن.
مامان رەتىندە ايتارىمىز, ءدامى–سۋ ساپاسىنىڭ ەڭ نەگىزگى كورسەتكىشى ەمەس. استانا سۋىنىڭ قۇرامى كالتسي, ماگني سياقتى اعزاعا پايدالى مينەرالدى زاتتارعا باي.
ايتا كەتەرلىگى, ىدىسقا قۇيىلىپ ساتىلاتىن اۋىزسۋدىڭ ساپاسى دا جوعارىدا اتالعان قاۋلىمەن بەكىتىلگەن سانيتاريالىق ەرەجەمەن رەتتەلەدى. ياعني, ونى شىعاراتىن ءوندىرىس ورنى, ساپاسى, سۋدىڭ الىناتىن كوزى, دايىنداۋ تەحنولوگياسى, ىدىستىڭ ماتەريالى, ءونىمدى ساقتاۋ مەرزىمى تۇگەلدەي ەسەپكە الىنادى. وسى تۇرعىدان العاندا, استانا قالاسىنىڭ سانيتاريالىق قاداعالاۋ قىزمەتى «ەكولايف», «تاۋ بۇلاق», «ءدامدى سۋ», «لەگەندا-اقبۇلاق» دەپ اتالاتىن اتى الۋان بولسا دا, زاتى ۇقساس سۋلاردىڭ ساپاسىن ۇدايى قاداعالاۋدا ۇستايدى. بارلىعى دا سەرتيفيكاتتالعان. «حرۋستالنايا» سۋىن ارناۋلى سكۆاجينادان الىپ دايىندايتىن «تاۋ سۋ لتد نس» كومپانياسىنان باسقالارى وندىرىستە كادىمگى قۇبىر سۋىن قولدانادى.
ءار ءوندىرىس ورنىندا قۇبىر سۋىن ءارتۇرلى ادىستەمەمەن تازارتادى. الايدا, نەگىزگى تاسىمىنە سۇيەنسەك, سۋ اۋەلى قويمالجىڭنان ارىلتىپ, ميكروبتاردى تۇتىپ قالۋ ماقساتىندا الدىن الا ءالسىز وڭدەۋدەن وتەدى, سودان سوڭ ۇزاق مەرزىمدى ساقتالۋ ءۇشىن زارارسىزداندىرىلادى.
الايدا, بوتەلكەدە وسىلاي بىرنەشە تۇتقىشتان ءوتىپ بارىپ تۇتىنۋشىعا جەتكەن سۋدىڭ دەنساۋلىققا كەرى اسەرى دە بار. ويتكەنى, ول تازارتۋ كەزىندە ماڭىزدى ەلەمەنتتەردەن ايىرىلىپ قالدى. اسىرەسە, ونى كىشكەنتاي بالالارعا, جاسوسپىرىمدەرگە, جۇكتى ايەلدەر مەن قارت ادامدارعا ۇنەمى ءىشۋ اسا ماقۇلدانبايدى. سەبەبى, پايدالى مينەرالداردان جۇرداي سۋ – ءولى سۋ.
بۇل تۇرعىدا بىلىكتى مامانداردىڭ كومەگىمەن ناقتى ءبىر كاسىپورىننىڭ سۋ ساپاسىنا, دايىنداۋ تەحنولوگياسىنا قاراي جەكە تەحنولوگيالىق رەگلامەنتىن جاساۋ وتە ماڭىزدى ءرول اتقارادى. تەك سوندا عانا حالىققا ساپاسى تالاپقا ساي سۋ تاراتىلادى.
س.جۇماتاەۆا,
استانا قالاسى بويىنشا تۇتىنۋشىلاردىڭ قۇقىقتارىن قورعاۋ دەپارتامەنتىنىڭ باس مامانى
