وتكەن سەنبىدە استانا قالاسى تىلدەردى دامىتۋ باسقارماسىنىڭ ۇيىمداستىرۋىمەن اباي ەسكەرتكىشىنىڭ الدىندا قازاقتىڭ ۇلى اقىنىنىڭ تۋعان كۇنىنە ارنالعان «ابايدىڭ ءان الەمى» اتتى مەرەكەلىك شارا ءوتتى. تاعىلىمى مول باسقوسۋ دانىشپاننىڭ ەسكەرتكىشىنە گۇل شوقتارىن قويۋ راسىمىمەن باستالدى.
«ابايدىڭ سان قيلى مۇراسىن ناسيحاتتاۋ, الۋان تاقىرىپتاعى اندەرى ارقىلى سۋرەتكەردىڭ ەستەتيكالىق الەمىن تانىتۋ ماقساتىنداعى جيىننىڭ ۇرپاق ءۇشىن بەرەر رۋحاني ازىعى مول دەپ بىلەمىن. ءبىز ادامداردى الەمگە اباي شىعارمالارى ارقىلى قاراۋعا جانە مەملەكەتتىك ءتىلدى دامىتۋعا شاقىرامىز» دەيدى تىلدەردى دامىتۋ باسقارماسىنىڭ قىزمەتكەرى قۇرالاي اقسەيىتوۆا.
سالتاناتتى كەشتە قازاقستاننىڭ ەڭبەك سىڭىرگەن ءارتىسى كەنجەعالي مىرجىقباي ابايدىڭ «قالىڭ ەلىم, قازاعىم, قايران جۇرتىم», «ولسە دە تابيعات, ادام ولمەس», «قاراڭعى تۇندە تاۋ قالعىپ» اندەرىن, قازاقستاننىڭ ەڭبەك سىڭىرگەن قايراتكەرلەرى – جانات شىبىقباي «كوزىمنىڭ قاراسىن», گۇلزيرا بوكەيحان «تاتيانانىڭ ءانىن», تانىمال ءداستۇرلى ءانشى ەرلان رىسقالي «سەگىز اياق», «بويى بۇلعاڭ» سىندى تۋىندىلارىن ورىندادى. ق.قۋانىشباەۆ اتىنداعى مەملەكەتتىك اكادەميالىق قازاق مۋزىكالىق دراما تەاترىنىڭ ارتىستەرى اقىننىڭ ءومىرى مەن شىعارماشىلىعىنان دايىندالعان قويىلىم كورسەتتى.
«كەشكە اباي اقىننىڭ, اسىرەسە, اندەرىمەن جاقىنىراق تانىسۋ ءۇشىن كەلدىم. ول دۇنيەگە جانە قازاق حالقىنا كەرەمەت ولەڭدەر سىيلادى, ولاردى ءبىلىپ, ءاردايىم ەستە ساقتاپ, ۇرپاقتان-ۇرپاققا جەتكىزىپ ءجۇرۋ كەرەك» دەدى استانا تۇرعىنى ايمان ءجۇنىسوۆا.
اسحات رايقۇل
