استانا سەنبى كۇنى ۆەلو-قالاعا اينالعانداي بولدى. اتا زاڭىمىز – كونستيتۋتسيا كۇنىنە جانە قازاقستاندىق ۆەلوسپورتتىڭ عاسىرلىق مەرەيتويىنا ارنالعان ۆەلوجورىقتى ەلوردا اكىمى يمانعالي تاسماعامبەتوۆ باستاپ شىقتى. ۆەلوسيپەدتى ەرتتەپ مىنگەن ەكى مىڭنان استام اۋەسقوي استانالىقتار قاتارىندا اتاعى جەر جارعان «تۋر دە فرانس-2014» كوپ كۇندىك جارىسىنىڭ جەڭىمپازى, «استانا» ۆەلوكلۋبىنىڭ كاپيتانى نيبالي ۆينچەنتسو جانە ونىڭ كوماندالاس شاباندوزدارى, وليمپيادا چەمپيوندارى الەكساندر ۆينوكۋروۆ پەن ۆلاديمير سميرنوۆ بولدى.
سالتانات سارايى الدىنداعى الاڭنان باستالعان جورىق « استانا-ارەنا» ستاديونى الدىنداعى الاڭدا مارەسىنە جەتتى. باس-اياعى 2200 ادام 4600 مەتردى ءجۇرىپ ءوتتى. سىرتىنان قاراپ تۇرعان بىزگە قابانباي داڭعىلى ۆەلوسيپەد پەن ادامداردىڭ تولقىنىنداي بولىپ كورىندى. يگىلىكتى شارا بولسا, يىمەيتىن كوڭىل بولمايدى ەكەن, ۆەلوسيپەد مىنگەن قالىڭ بۇقارانىڭ بايگەسىنە ءوزىمىزدىڭ قوسىلماي قالعانىمىزعا كادىمگىدەي وكىنىپ قالدىق. قانداي عاجاپ كورىنىس… مىڭداعان ادام دەنساۋلىقتىڭ مەرەكەسىن دۇبىرلەتىپ كەلەدى…
شاباندوزدار بىرتىندەپ «استانا ارەنا» الدىنداعى مارەگە توقتاپ جاتىر. ال ۆەلوسيپەدشىلەردى قارسى الىپ جاتقان قاۋىم دا از ەمەس ەكەن. ءار كەلۋگە قول سوعىپ جاتىر. ادەمى ءان شارىقتايدى, بارشانىڭ كوڭىلى ماسايرايدى. بۇقارالىق سپورتتىڭ قۇدىرەتى دەگەن وسى شىعار, مىڭداعان ادام يىق تىرەستىرىپ ءبىر ماقساتپەن, ءبىر سەنىممەن ۆەلوجورىققا شىقتى.
مارەگە جەتكەن بارلىق قاتىسۋشىلاردى قالا اكىمى كونستيتۋتسيا كۇنىمەن قۇتتىقتادى.
– كونستيتۋتسيا كۇنى قارساڭىندا ءبىز استاناداعى تاعى دا ءبىر ۇلكەن سپورتتىق شاراعا كۋا بولىپ وتىرمىز. مۇنداي ۆەلوجورىقتى ءبىز استانا كۇنىنىڭ قارساڭىندا دا وتكىزگەن بولاتىنبىز. وسى سايىسقا جاستاردىڭ كوپتەپ قاتىسقانى قۋانتادى. ەڭ باستىسى – استانا تۇرعىندارىنىڭ سپورتقا دەگەن قۇشتارلىعىن, قىزىعۋشىلىعىن كورسەتەدى. وزدەرىڭىز جاقسى بىلەسىزدەر, ەلباسىنىڭ ۇلكەن قامقورلىعىنىڭ, قولداۋىنىڭ ارقاسىندا ءبىزدىڭ استانامىز كۇن ساناپ ءوسىپ-وركەندەپ كەلە جاتىر. تىڭ جوبالار, وڭ وزگەرىستەر كوز الدىمىزدا ىسكە اسىپ جاتىر, – دەپ اتاپ ءوتتى يمانعالي تاسماعامبەتوۆ.
بيىل استانادا «ۆەلوبايك» جوباسى ىسكە اسىرىلا باستادى. استانا اكىمدىگى «سامۇرىق-قازىنا» ۇلتتىق ءال-اۋقات قورىمەن بىرلەسىپ, قالانىڭ كورىكتى ورىندارىندا 40 ۆەلوبەكەت ورناتتى. الداعى ۋاقىتتا ولاردىڭ سانى 100-گە دەيىن جەتكىزىلمەك. ال ۆەلوسيپەدتەر سانى 1000-نان اسىرىلماق. وسى يگىلىكتىڭ ءبارى قالا تۇرعىندارىنىڭ سالاۋاتتى ءومىر سالتىن ۇستانىپ, سپورتقا جاقىن بولۋىنا سەپتىگىن تيگىزەتىنى ءسوزسىز.
ۆەلوجورىق مارەسىنە ارنالعان شارا بارىسىندا وليمپيادا ويىندارىنىڭ چەمپيونى, «استانا» ۆەلوكلۋبىنىڭ باس مەنەدجەرى الەكساندار ۆينوكۋروۆ پەن «تۋر دە فرانس – 2014» ۆەلوبايگەسىنىڭ جەڭىمپازى ۆينچەنتسو نيبالي قالا اكىمى ي. تاسماعامبەتوۆكە «استانا» ۆەلوكومانداسىنىڭ جەيدەسىن سىيعا تارتتى. «استانا» پرەزيدەنتتىك كاسىبي سپورت كلۋبىنىڭ باس ديرەكتورى, وليمپيادا ويىندارىنىڭ جەڭىمپازى ۆلاديمير سميرنوۆ بارشا استانالىقتاردى مەرەكەمەن قۇتتىقتاپ, استانامىزدىڭ ناعىز سپورت قالاسىنا اينالا باستاعانىنا ريزاشىلىعىن جەتكىزدى.
ۆەلومەرەكە سوڭى سپورت سۇيەر قاۋىمعا اتالىمدار بويىنشا سىيلىقتار تاپسىرۋ راسىمىنە, لوتەرەيا ويىنىنا جانە كونتسەرتتىك باعدارلاماعا ۇلاستى.
عالىم قوجابەكوۆ
