استانادا كاسىپكەرلەر ءۇشىن حالىق اراسىندا ناشاقورلىقتىڭ تارالۋىنا قارسى ءىس-قيمىل بويىنشا پروفيلاكتيكالىق اڭگىمە وتكىزىلدى, دەپ حابارلايدى astana-akshamy.kz
تۇنگى كلۋبتاردىڭ, مەيرامحانالار مەن كافەلەردىڭ باسشىلارى قوعامنىڭ وزەكتى ماسەلەلەرىنىڭ ءبىرى – ناشاقورلىقتى تالقىلاۋ ءۇشىن جينالدى.
ەلوردا اكىمدىگىنىڭ, ونىڭ ىشىندە قوعامدىق دەنساۋلىق ساقتاۋ باسقارماسىنىڭ, پوليتسيا دەپارتامەنتىنىڭ وكىلدەرى ەسىرتكى زاتتارىنا قارسى ءىس-قيمىل, ولاردى تاراتۋ جانە قولدانۋ بولىگىندە قر زاڭناماسىنىڭ نورمالارىن ءتۇسىندىردى.
«ستاتيستيكا كورسەتكەندەي, ەسىرتكىگە تاۋەلدىلىك جاڭا كۇردەلى فورمالارعا يە بولادى. ەسىرتكى زاتتارىن تاراتۋعا جانە تۇتىنۋعا جول بەرمەۋ ءۇشىن جاۋاپكەرشىلىككە ەرەكشە نازار اۋدارىلادى. بۇل باعىتتا قالانىڭ ەڭ كوپ باراتىن ويىن-ساۋىق مەكەمەلەرىنىڭ وكىلدەرىمەن كەزدەسۋلەر وتكىزىلەدى. بۇل ماسەلەنى شەشۋدە ءارتۇرلى بيلىك ورگاندارى مەن كاسىپكەرلىك قوعامداستىق اراسىنداعى ءوزارا ءىس-قيمىل ماڭىزدى بولىپ سانالادى. سوندىقتان ءبىز بارلىق قاتىسۋشىلاردى ءوز جۇمىستارىن جانە قولداۋدى جانداندىرۋعا شاقىرامىز», – دەدى قالالىق ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆ.
قالالىق پوليتسيا دەپارتامەنتىنىڭ ەسىرتكى قىلمىسىنا قارسى ءىس-قيمىل باسقارماسىنىڭ ءبولىم باستىعى ولجاس راحيموۆ اتاپ وتكەندەي, تۇنگى كلۋبتاردا سينتەتيكالىق ەسىرتكىلەر كەڭ تارالعان.
«مەكەمەلەر اقبتك-ءنىڭ 422-بابى بويىنشا «ەسىرتكى قۇرالدارىن, پسيحوتروپتىق زاتتار مەن پرەكۋرسورلاردى وتكىزۋ جانە (نەمەسە) مەديتسينالىق ەمەس تۇتىنۋدىڭ جولىن كەسۋ شارالارىن قولدانباۋ» بويىنشا اكىمشىلىك جاۋاپتىلىقتا بولادى.
ايىپپۇل 1000 اەك-كە دەيىن سالىنادى. بىراق ءبىز مەكەمە يەلەرىنە ەسىرتكىنىڭ تارالۋىن باقىلاۋ وتە قيىن ەكەنىن تۇسىنەمىز. تىيىم سالىنعان زاتتاردى تەك قىزمەتكەرلەر عانا ەمەس, مەكەمە قوناقتارى دا الا الادى. سوندىقتان ءبىز پروفيلاكتيكالىق اڭگىمەلەر ۇيىمداستىرىپ, قىراعى بولۋىڭىزدى سۇرايمىز», – دەدى ولجاس راحيموۆ.
ەلوردالىق پسيحيكالىق دەنساۋلىق ورتالىعى ديرەكتورىنىڭ ورىنباسارى دانيار شالتاقوۆ ناشاقورلىق پروبلەماسىنىڭ اۋىرلىعىن دا اتاپ ءوتتى.
ونىڭ ايتۋىنشا, استانادا ەسىرتكى ەسەبىندە تۇرعان ازاماتتار سانىنىڭ تومەندەۋ ءۇردىسى بايقالادى.
الايدا ناشاقورلىققا تاپ بولعان بارلىق قالا تۇرعىندارى مەديتسينالىق مەكەمەلەردەن كومەك سۇرامايدى.
كەزدەسۋ سوڭىندا ينۆەستيتسيالار جانە كاسىپكەرلىكتى دامىتۋ باسقارماسى باسشىسىنىڭ ورىنباسارى ماقسات جاڭاباەۆ استانا كاسىپكەرلەرىن الەۋمەتتىك جاۋاپكەرشىلىكتى ەستە ساقتاۋعا جانە مەملەكەتكە ەسىرتكى قىلمىسىنا قارسى ءىس-قيمىلعا جاردەمدەسۋگە شاقىردى.
